(൭) ൨. സഞ്ഞാവഗ്ഗോ

൧-൫. സഞ്ഞാസുത്താദിവണ്ണനാ

൬൧-൬൫. ദുതിയസ്സ പഠമേ ‘‘മഹപ്ഫലാ മഹാനിസംസാ’’തി ഉഭയമ്പേതം അത്ഥതോ ഏകം, ബ്യഞ്ജനമേവ നാനന്തി ആഹ ‘‘മഹപ്ഫലാ’’തിആദി. ‘‘പഞ്ചിമേ ഗഹപതയോ ആനിസംസാ’’തിആദീസു (ഉദാ. ൭൬) ആനിസംസ-സദ്ദോ ഫലപരിയായോപി ഹോതി. മഹതോ ലോകുത്തരസ്സ സുഖസ്സ പച്ചയാ ഹോന്തീതി മഹാനിസംസാ. അമതോഗധാതി അമതബ്ഭന്തരാ അമതം അനുപ്പവിട്ഠാ നിബ്ബാനദിട്ഠത്താ, തതോ പരം ന ഗച്ഛന്തി. തേന വുത്തം ‘‘അമതപരിയോസാനാ’’തി. അമതം പരിയോസാനം അവസാനം ഏതാസന്തി അമതപരിയോസാനാ. മരണസഞ്ഞാതി മരണാനുപസ്സനാഞാണേന സഞ്ഞാ. ആഹാരേ പടികൂലസഞ്ഞാതി ആഹാരം ഗമനാദിവസേന പടികൂലതോ പരിഗ്ഗണ്ഹന്തസ്സ ഉപ്പന്നസഞ്ഞാ. ഉക്കണ്ഠിതസ്സാതി നിബ്ബിന്ദന്തസ്സ കത്ഥചിപി അസജ്ജന്തസ്സ. ദുതിയാദീനി ഉത്താനത്ഥാനേവ.

സഞ്ഞാസുത്താദിവണ്ണനാ നിട്ഠിതാ.

൬-൧൦. സാജീവസുത്താദിവണ്ണനാ

൬൬-൭൦. ഛട്ഠേ സഹ ആജീവന്തി ഏത്ഥാതി സാജീവോ, പഞ്ഹസ്സ പുച്ഛനം വിസ്സജ്ജനഞ്ച. തേനാഹ ‘‘സാജീവോതി പഞ്ഹപുച്ഛനഞ്ചേവ പഞ്ഹവിസ്സജ്ജനഞ്ചാ’’തിആദി. അഭിസങ്ഖതന്തി ചിതം. സത്തമാദീനി ഉത്താനത്ഥാനേവ.

സാജീവസുത്താദിവണ്ണനാ നിട്ഠിതാ.

സഞ്ഞാവഗ്ഗവണ്ണനാ നിട്ഠിതാ.