൫-൧൩. മച്ഛരിനീസുത്താദിവണ്ണനാ

൧൧൫-൧൨൩. പഞ്ചമേ ആവാസമച്ഛരിയാദീനി പഞ്ച ഇധ ഭിക്ഖുനിയാ വസേന ആഗതാനി, ഭിക്ഖുസ്സ വസേനപി താനി വേദിതബ്ബാനി. ആവാസമച്ഛരിയേന ഹി സമന്നാഗതോ ഭിക്ഖു ആഗന്തുകം ദിസ്വാ ‘‘ഏത്ഥ ചേതിയസ്സ വാ സങ്ഘസ്സ വാ പരിക്ഖാരോ ഠപിതോ’’തിആദീനി വത്വാ സങ്ഘികആവാസം ന ദേതി. കുലമച്ഛരിയേന സമന്നാഗതോ ഭിക്ഖു തേഹി തേഹി കാരണേഹി ആദീനവം ദസ്സേത്വാ അത്തനോ ഉപട്ഠാകേ കുലേ അഞ്ഞേസം പവേസമ്പി നിവാരേതി. ലാഭമച്ഛരിയേന സമന്നാഗതോ സങ്ഘികമ്പി ലാഭം മച്ഛരായന്തോ യഥാ അഞ്ഞേ ന ലഭന്തി, ഏവം കരോതി അത്തനാ വിസമനിസ്സിതതായ ബലവനിസ്സിതതായ ച. വണ്ണമച്ഛരിയേന സമന്നാഗതോ അത്തനോ വണ്ണം വണ്ണേതി, പരേസം വണ്ണേ ‘‘കിം വണ്ണോ ഏസോ’’തി തം തം ദോസം വദതി. വണ്ണോതി ചേത്ഥ സരീരവണ്ണോപി, ഗുണവണ്ണോപി വേദിതബ്ബോ.

ധമ്മമച്ഛരിയേന സമന്നാഗതോ – ‘‘ഇമം ധമ്മം പരിയാപുണിത്വാ ഏസോ മം അഭിഭവിസ്സതീ’’തി അഞ്ഞസ്സ ന ദേതി. യോ പന – ‘‘അയം ഇമം ധമ്മം ഉഗ്ഗഹേത്വാ അഞ്ഞഥാ അത്ഥം വിപരിവത്തേത്വാ നാസേസ്സതീ’’തി ധമ്മനുഗ്ഗഹേന വാ – ‘‘അയം ഇമം ധമ്മം ഉഗ്ഗഹേത്വാ ഉദ്ധതോ ഉന്നളോ അവൂപസന്തചിത്തോ അപുഞ്ഞം പസവിസ്സതീ’’തി പുഗ്ഗലാനുഗ്ഗഹേന വാ ന ദേതി, ന തം മച്ഛരിയം. ധമ്മോതി ചേത്ഥ പരിയത്തിധമ്മോ അധിപ്പേതോ. പടിവേധധമ്മോ ഹി അരിയാനംയേവ ഹോതി, തേ ച നം ന മച്ഛരായന്തി മച്ഛരിയസ്സ സബ്ബസോ പഹീനത്താതി തസ്സ അസമ്ഭവോ ഏവ. തത്ഥ ആവാസമച്ഛരിയേന ലോഹഗേഹേ പച്ചതി, യക്ഖോ വാ പേതോ വാ ഹുത്വാ തസ്സേവ ആവാസസ്സ സങ്കാരം സീസേന ഉക്ഖിപിത്വാ ചരതി. കുലമച്ഛരിയേന അപ്പഭോഗോ ഹോതി. ലാഭമച്ഛരിയേന ഗൂഥനിരയേ നിബ്ബത്തതി, സങ്ഘസ്സ വാ ഗണസ്സ വാ ലാഭം മച്ഛരായിത്വാ പുഗ്ഗലികപരിഭോഗേന വാ പരിഭുഞ്ജിത്വാ യക്ഖോ വാ പേതോ വാ മഹാഅജഗരോ വാ ഹുത്വാ നിബ്ബത്തതി. വണ്ണമച്ഛരിയേന ഭവേസു നിബ്ബത്തസ്സ വണ്ണോ നാമ ന ഹോതി. ധമ്മമച്ഛരിയേന കുക്കുളനിരയേ നിബ്ബത്തതി. ഛട്ഠാദീനി ഉത്താനത്ഥാനേവ.

മച്ഛരിനീസുത്താദിവണ്ണനാ നിട്ഠിതാ.

അന്ധകവിന്ദവഗ്ഗവണ്ണനാ നിട്ഠിതാ.