൨-൪. അധിവുത്തിപദസുത്താദിവണ്ണനാ

൨൨-൨൪. ദുതിയേ അധിവചനപദാനന്തി പഞ്ഞത്തിപദാനം. ദാസാദീസു സിരിവഡ്ഢകാദിസദ്ദാ വിയ വചനമത്തമേവ അധികാരം കത്വാ പവത്തിയാ അധിവചനം പഞ്ഞത്തി. അഥ വാ അധിസദ്ദോ ഉപരിഭാഗേ. വുച്ചതീതി വചനം, ഉപരി വചനം അധിവചനം, ഉപാദാഭൂതരൂപാദീനം ഉപരി പഞ്ഞപിയമാനാ ഉപാദാപഞ്ഞത്തീതി അത്ഥോ, തസ്മാ പഞ്ഞത്തിദീപകപദാനീതി അത്ഥോ ദട്ഠബ്ബോ. തസ്സ പദാനി പദട്ഠാനാനി അധിവചനപദാനി. തേനാഹ ‘‘തേസം യേ’’തിആദി. തേസന്തി അധിവചനാനം. യേതി ഖന്ധാദയോ. അധിവുത്തിതായ അധിവുത്തിയോതി ദിട്ഠിയോ വുച്ചന്തി. അധികഞ്ഹി സഭാവധമ്മേസു സസ്സതാദിം, പകതിആദിം, ദ്രബ്യാദിം, ജീവാദിം, കായാദിഞ്ച, അഭൂതം അത്ഥം അജ്ഝാരോപേത്വാ ദിട്ഠിയോ പവത്തന്തീതി. തേനാഹ ‘‘അഥ വാ’’തിആദി. തതിയചതുത്ഥാനി സുവിഞ്ഞേയ്യാനി.

അധിവുത്തിപദസുത്താദിവണ്ണനാ നിട്ഠിതാ.