൯. നവമോ പരിച്ഛേദോ

ദസാനുസ്സതിവിഭാഗോ

൧൧൦൦. സദ്ധാപബ്ബജിതോ യോഗീ, ഭാവേന്തോനുസ്സതിം പന;

ദസാനുസ്സതിഭേദേസു, ഭാവേയ്യഞ്ഞതരം കഥം.

൧൧൦൧. അരഹം സുഗതോ ലോകേ, ഭഗവാ ലോകപാരഗൂ;

വിജ്ജാചരണസമ്പന്നോ, വിമുത്തിപരിനായകോ.

൧൧൦൨. ജേട്ഠോ സമ്മാഭിസമ്ബുദ്ധോ, സേട്ഠോ പുരിസസാരഥീ;

സത്ഥാ ദേവമനുസ്സാനം, ബുദ്ധോ അപ്പടിപുഗ്ഗലോ.

൧൧൦൩. സബ്ബലോകഹിതോ ബന്ധു, സമത്തരതനാലയോ;

സത്താനമനുകമ്പായ, ജാതോ നാഥോ സിവംകരോ.

൧൧൦൪. ചക്ഖുമാ തിത്ഥകുസലോ, ധമ്മസ്സാമീ തഥാഗതോ;

മച്ചുധേയ്യവിമോക്ഖായ, പടിപാദയി പാണിനോ.

൧൧൦൫. സത്ഥവാഹോ മഹായോഗ്ഗോ, മഗ്ഗാമഗ്ഗയുധന്ധരോ;

സിരിസത്ഥമധിഗ്ഗയ്ഹ, വിചരിത്ഥ മഹാപഥം,

൧൧൦൬. അനോമോ അസമോ ധീരോ,

ലോകഹീതപരക്കമോ;

സബ്ബാകാരവരോപേതോ,

അച്ഛേരബ്ഭുതപുഗ്ഗലോ.

൧൧൦൭. അത്ഥഭൂതോ ധമ്മഭൂതോ,

ബ്രഹ്മഭൂതോ മഹായസോ;

ഞാണാലോകപരിച്ഛിന്ന-

ഞേയ്യാസേസപരിഗ്ഗഹോ.

൧൧൦൮. ആനുഭാവവസിപ്പത്തോ, ആസഭണ്ഡാനനിച്ചലോ;

മഹന്തമരിയാദോയമനന്തഗതിഗോചരോ.

൧൧൦൯. സബ്ബാ ഭിഞ്ഞാബലപ്പത്തോ, വേസാരജ്ജവിസാരദോ;

സബ്ബസമ്പത്തിനിട്ഠാനോ, ഗുണപാരമിപൂരകോ.

൧൧൧൦. അപ്പമേയ്യോ മഹാനാഗോ, മഹാവീരോ മഹാമുനി;

മഹേസീ മഹിതാചാരോ, മഹാമഹോ മഹിദ്ധികോ.

൧൧൧൧. സബ്ബത്ഥസിദ്ധിസഞ്ചാരോ, മഹേസീഗണപൂജിതോ;

രാജാധിരാജമഹിതോ, ദേവബ്രഹ്മാഭിവന്ദിതോ.

൧൧൧൨. അഭിഭൂയ തയോ ലോകേ, ആദിച്ചോവ നഭന്തരേ;

വിരോചതി മഹാതേജോ, അന്ധകാരേ പഭങ്കരോ.

൧൧൧൩. ബ്യാമപ്പഭാപരിക്ഖിത്തോ, കേതുമാലാഹലങ്കതോ;

ദ്വത്തിംസലക്ഖണാസീതിഅനുബ്യഞ്ജനസോഭിതോ.

൧൧൧൪. ഛബ്ബണ്ണരംസിലലിതോ, രതനഗ്ഘിയസന്നിഭോ;

സമിദ്ധിരൂപസോഭഗ്ഗോ, ദസ്സനേയ്യംവ പിണ്ഡിതം.

൧൧൧൫. ഫുല്ലം പദുമസണ്ഡംവ, കപ്പരുക്ഖോവലങ്കതോ;

നഭംവ താരകാകിണ്ണം, ഉത്തമോ പടിദിസ്സതി.

൧൧൧൬. സത്ഥുകപ്പമഹാവീരപുത്തേഹി പരിവാരിതോ;

സബ്ബലോകമഹിദ്ധായ, ധമ്മരാജാ സയംവസീ.

൧൧൧൭. നിദ്ധോതമലചന്ദോവ, നക്ഖത്തപരിവാരിതോ;

ഖത്തസങ്ഘപരിബ്യുള്ഹോ, ചക്കവത്തീവ സോഭതി.

൧൧൧൮. ഇച്ചാനന്തഗുണാകിണ്ണമസേസമലനിസ്സടം;

സബ്ബസമ്പത്തിദാതാരം, വിപത്തിവിനിബന്ധകം.

൧൧൧൯. ദയാപരമഹോരത്തം, ഭഗവന്തമനുസ്സരം;

ഭാവേതി പഞ്ഞവാ യോഗീ, ബുദ്ധാനുസ്സതിഭാവനം.

൧൧൨൦. സ്വാഖാതോ തേന സദ്ധമ്മോ, സമ്ബുദ്ധേന സതീമതാ;

പച്ചത്തപടിവേധേന, പസ്സിതബ്ബോ യഥാരഹം.

൧൧൨൧. തണ്ഹാദലിദ്ദനാസായ, മനോരഥസമിദ്ധിയാ;

കാലന്തരമനാഗമ്മ, പച്ചക്ഖഫലദായകോ.

൧൧൨൨. ഉപനിസ്സയവന്താനം, ‘‘ഏഹി പസ്സാ’’തി ദസ്സിയോ;

പച്ചത്തമേവ വിഞ്ഞൂഹി, വേദിതബ്ബോ സഭാവതോ.

൧൧൨൩. സബ്ബാസവസമുഗ്ഘാതീ, സുദ്ധോ സോവത്ഥികോ സിവോ;

പിഹിതാപായകുമ്മഗ്ഗോ, മഗ്ഗോ നിബ്ബാനപത്തിയാ.

൧൧൨൪. ക്ലേസസംകടദുഗ്ഗമ്ഹാ, ദുക്ഖക്ഖന്ധമഹബ്ഭയാ;

ഖേമന്തഭൂമിം നിയ്യാതി, അച്ചന്തമനുപദ്ദവം.

൧൧൨൫. പുഞ്ഞതിത്ഥമിദം നാമ, മങ്ഗലഞ്ച സിവങ്കരം;

ഹിതോദയസുഖാധാന-മമതാഹാരമുത്തമം.

൧൧൨൬. അവിജ്ജാപടലുദ്ധാരവിജ്ജാനേത്തോസധം വരം;

പഞ്ഞാധാരമിദം സത്ഥം, ക്ലേസഗണ്ഡപ്പഭേദകം.

൧൧൨൭. ചതുരോഘനിമുഗ്ഗാനം, സേതുബന്ധോ സമുഗ്ഗതോ;

ഭവചാരകരുദ്ധാനം, മഹാദ്വാരോ അപാരുതോ.

൧൧൨൮. സോകോപായാസവിദ്ധാനം, പരിദേവസമങ്ഗിനം;

സല്ലനീഹരണോപായോ, അച്ചന്തസുഖമീരിതോ.

൧൧൨൯. ബ്യസനോപദ്ദവാപേതോ, സംക്ലേസമലനിസ്സടോ;

ഉജുസമ്മത്തനിയതോ, പടിപത്തിവിസുദ്ധിയാ.

൧൧൩൦. സുദ്ധസീലപരിക്ഖാരോ, സമാധിമയപഞ്ജരോ;

സമ്മാസങ്കപ്പചക്കങ്ഗോ, സമ്മാവായാമവാഹനോ.

൧൧൩൧. സതിസാരഥിസംയുത്തോ, സമ്മാദിട്ഠിപുരേജവോ;

ഏസ ധമ്മരഥോ യാതി, യോഗക്ഖേമസ്സ പത്തിയാ.

൧൧൩൨. വിപത്തിപടിബാഹായ, സബ്ബസമ്പത്തിസിദ്ധിയാ;

സബ്ബഖന്ധവിമോക്ഖായ, ധമ്മം ദേസേസി ചക്ഖുമാ.

൧൧൩൩. ഹിതേസീ സബ്ബപാണീനം, ദയാപന്നോ മഹാമുനി;

ധമ്മാലോകം പകാസേസി, ചക്ഖുമന്താനമുത്തമോ.

൧൧൩൪. യം ധമ്മം സമ്മദഞ്ഞായ, ഖേമമഗ്ഗപ്പതിട്ഠിതാ;

പാപകാപഗതാ ധീരാ, പസ്സദ്ധിദരഥാസയാ.

൧൧൩൫. ഭവയോഗാ വിനിമുത്താ, പഹീനഭയഭേരവാ;

അച്ചന്തസുഖമേധേന്തി, സോത്ഥിപത്താ മഹേസയോ.

൧൧൩൬. തമേവമുത്തമം ധമ്മം, ചിന്തേന്തോ പന പണ്ഡിതോ;

ഭാവേതീതി പകാസേന്തി, ധമ്മാനുസ്സതിഭാവനം.

൧൧൩൭. ചത്താരോ ച പടിപന്നാ, ചത്താരോ ച ഫലേ ഠിതാ;

ഏസ സങ്ഘോ ഉജുഭൂതോ, പഞ്ഞാസീലസമാഹിതോ.

൧൧൩൮. പലാപാപഗതോ സുദ്ധോ, പടിപത്തിപതിട്ഠിതോ;

പരിഗ്ഗഹിതസദ്ധമ്മോ, സമിദ്ധിഗുണസോഭിതോ.

൧൧൩൯. പഹീനാപായഗമനോ, പാപക്ലേസവിനിസ്സടോ;

പരിപന്ഥസമുച്ഛേദീ, ഭവചാരകഭേദകോ.

൧൧൪൦. ഉത്തമദമഥപ്പത്തോ, സുവിനീതോ മഹേസിനാ;

വിജ്ജാവിമുത്തിവോദാതോ, ആജാനീയപഥേ ഠിതോ.

൧൧൪൧. സുഗതോരസി സമ്ഭൂതോ, സുചിധമ്മസിരിന്ധരോ;

പടിപാദിതസമ്പത്തോ, ധമ്മസാസനസേവിതോ.

൧൧൪൨. ഭയഭേരവനിസ്സങ്ഗോ, ജിനതേജാനുപാലിതോ;

മോനേയ്യപഥസഞ്ചാരോ, സുഗതോവാദഭാജനോ.

൧൧൪൩. അപ്പമാദപരിത്താണോ, സീലാലങ്കാരഭൂസിതോ;

ചേതോസമാധിസന്നദ്ധോ, പഞ്ഞായുധസമുജ്ജലോ.

൧൧൪൪. ഉജുമഗ്ഗമധിട്ഠായ, മാരകായപ്പദാലനോ;

അപരാജിതസങ്ഗാമോ, ലലിതോദാതവിക്കമോ.

൧൧൪൫. മച്ചുധേയ്യമതിക്കന്തോ, ബോധിധമ്മപ്പതിട്ഠിതോ;

ഛളാഭിഞ്ഞാബലപ്പത്തോ, സമാരാധിതസാസനോ.

൧൧൪൬. അനുബോധിമനുപ്പത്തോ, പഭിന്നപടിസമ്ഭിദോ;

സാമഞ്ഞപാരമിപ്പത്തോ, തോസേതി ജിനമാനസം.

൧൧൪൭. നേകാകാരവരൂപേതോ, നാനാസമ്പത്തിഫുല്ലിതോ;

വിപത്തിപഥനിത്തിണ്ണോ, അഭിബുദ്ധിപരായണോ.

൧൧൪൮. ആഹുനേയ്യോ പാഹുനേയ്യോ,

ദക്ഖിണേയ്യോ സുദുല്ലഭോ;

സദേവകസ്സ ലോകസ്സ,

പുഞ്ഞക്ഖേത്തമനുത്തരം.

൧൧൪൯. യത്ഥ സുദ്ധിമ്ഹി നിദ്ദോസേ, സദ്ധാബീജം പതിട്ഠിതം;

അച്ചന്തം പരിപാചേതി, സമ്പത്തിഫലമുത്തമം.

൧൧൫൦. യം ഫലം പരിഭുഞ്ജന്താ, വിമുത്തിരസസേവനം;

അച്ചന്തസുഖിതാ ധീരാ, ഭവന്തി അജരാമരാ.

൧൧൫൧. തം ഫലം പത്ഥയന്തേന, സങ്ഘാനുസ്സതിഭാവനാ;

ഭാവേതബ്ബാ പനിച്ചേവമിതി ഭാസന്തി പണ്ഡിതാ.

൧൧൫൨. പഞ്ചസീലം ദസസീലം, പാതിമോക്ഖമുപോസഥം;

ചാതുപാരിസുദ്ധിസീലം, ധുതങ്ഗപരിവാരിതം.

൧൧൫൩. ഏവമേതേസു യം കിഞ്ചി, സമാദായ രഹോഗതോ;

തമാനിസംസം ഗുണതോ, ഫലതോ ച വിചിന്തയേ.

൧൧൫൪. ആദി ചേതം പതിട്ഠാ ച, മുഖം പമുഖമുത്തമം;

മൂലം കുസലധമ്മാനം, പഭവം പടിപത്തിയാ.

൧൧൫൫. സാസനോതരണദ്വാരം, തിത്ഥം സദ്ധമ്മവാപിയാ;

പാരിസുദ്ധിപദട്ഠാനം, മഗ്ഗോ ഖേമന്തപാപകോ.

൧൧൫൬. സാധു സിക്ഖാസമാദാനം, ബാഹുസച്ചവിഭൂസനം;

അരിയാചാരചാരിത്ത-മവണ്ണമലവജ്ജനം.

൧൧൫൭. കുലപുത്തഅലങ്കാരോ, പാപജല്ലപവാഹനം;

അനപായി സുഗന്ധഞ്ച, മഹാപുരിസസേവിതം.

൧൧൫൮. പച്ഛാനുതാപഹരണം, പീതിപാമോജ്ജവഡ്ഢനം;

നേക്ഖമ്മഭാവനോപേതം, പബ്ബജ്ജാവേസസോഭനം.

൧൧൫൯. സോപാനം സഗ്ഗലോകസ്സ, ദള്ഹാപായവിധാനകം;

അനുപദ്ദവസമ്പത്തി, സമത്ഥഗുണസൂദനീ.

൧൧൬൦. ക്ലേസപഞ്ജരവിച്ഛേദി, വിപത്തിപഥവാരണം;

സോത്ഥികമ്മസമുട്ഠാനം, അസാധാരണമങ്ഗലം.

൧൧൬൧. ‘‘സുലദ്ധാ വത മേ ലദ്ധാ, സദ്ധാ സുഗതസാസനേ;

സീലം മേ യസ്സ കല്യാണം, പരിസുദ്ധമഖണ്ഡിതം.

൧൧൬൨. ‘‘ദുല്ലഭോ വത മേ ലദ്ധോ,

മഹാലാഭോ അനപ്പകോ;

യോഹമക്ഖലിതാചാരോ,

ഉപഘാതവിവജ്ജിതോ.

൧൧൬൩. ‘‘ധമ്മങ്കുരിതസന്താനോ, മൂലജാതോസ്മി സാസനേ;

ഉജുമഗ്ഗം സമാരുള്ഹോ, പിഹിതാ സഭയാ ദിസാ.

൧൧൬൪. ‘‘അവഞ്ചാ വത മേ ജാതി, ആരദ്ധാ ഖണസമ്പദാ;

പതിട്ഠിതോമ്ഹി സദ്ധമ്മേ, സഫലം മമ ജീവിതം’’.

൧൧൬൫. ഇത്ഥം നാനപ്പകാരേന, ചിന്തേന്തോ ഗുണമത്തനോ;

സീലക്ഖന്ധസ്സ ഭാവേതി, സീലാനുസ്സതിഭാവനം.

൧൧൬൬. സദ്ധായ സീലവന്തേസു, ദത്വാ ദാനം യഥാരഹം;

നിദ്ധോതമലമച്ഛേരോ, വിവിത്തോ തമനുസ്സരേ.

൧൧൬൭. ദാനം നിധാനമനുഗം, അസാധാരണമുത്തമം;

അവിനാസസുഖാധാനം, അച്ചന്തം സബ്ബകാമദം.

൧൧൬൮. കോപദാഹോപസമനം, മച്ഛേരമലസോധനം;

പമാദനിദ്ദാവുട്ഠാനം, ലോഭപാസവിമോചനം.

൧൧൬൯. ചേതോവികാരദമനം, മിച്ഛാമഗ്ഗനിവാരണം;

വിത്തിലാഭസുഖസ്സാദോ, വിഭവോദയമങ്ഗലം.