൨൦. വീസതിമോ പരിച്ഛേദോ

മഗ്ഗാമഗ്ഗഞാണദസ്സനവിസുദ്ധിനിദ്ദേസോ

൧൨൬൩. കലാപസമ്മസനേനേവ,

യോഗോ കരണിയോ സിയാ;

മഗ്ഗാമഗ്ഗേ തു ഞാണം ത-

മധിഗന്തും പനിച്ഛതാ.

൧൨൬൪. പച്ചുപ്പന്നസ്സ ധമ്മസ്സ, നിബ്ബത്തി ഉദയോ മതോ;

വയോ വിപരിണാമോതി, തസ്സേവ സമുദീരിതാ.

൧൨൬൫. അനുപസ്സനാപി ഞാണന്തി, വരഞാണേന ദേസിതം;

സോ പനേവം പജാനാതി, യോഗാവചരമാണവോ.

൧൨൬൬. ഇമസ്സ നാമരൂപസ്സ, പുബ്ബേ ഉപ്പത്തിതോ പന;

നിചയോ രാസി വാ നത്ഥി, തഥാ ഉപ്പജ്ജതോപി ച.

൧൨൬൭. രാസിതോ നിചയാ വാപി, നത്ഥി ആഗമനന്തി ച;

തഥാ നിരുജ്ഝമാനസ്സ, ന ദിസാഗമനന്തി ച.

൧൨൬൮. നിരുദ്ധസ്സാപി ഏകസ്മിം, ഠാനേ നത്ഥി ചയോതി ച;

ഏത്ഥ വീണൂപമാ വുത്താ, ഏതസ്സത്ഥസ്സ ദീപനേ.

൧൨൬൯. ഉദബ്ബയമനക്കാരമേവം സങ്ഖേപതോ പന;

കത്വാ തസ്സേവ ഞാണസ്സ, വിഭങ്ഗസ്സ വസേന തു.

൧൨൭൦. ‘‘അവിജ്ജാസമുദയാ രൂപസമുദയോ’’തി ഹി ആദിനാ;

നയേനേകേകഖന്ധസ്സ, ഉദയബ്ബയദസ്സനേ.

൧൨൭൧. ദസ ദസാതി കത്വാന, വുത്താ പഞ്ഞാസലക്ഖണാ;

തേസം പന വസേനാപി, ധമ്മേ സമനുപസ്സതി.

൧൨൭൨. ഏവം രൂപുദയോ ഹോതി, ഏവമസ്സ വയോ ഇതി;

ഉദേതി ഏവം രൂപമ്പി, ഏവം രൂപം തു വേതി ച.

൧൨൭൩. ഏവം പച്ചയതോപേത്ഥ, ഖണതോ ഉദയബ്ബയം;

പസ്സതോ സബ്ബധമ്മാ ച, പാകടാ ഹോന്തി തസ്സ തേ.

൧൨൭൪. ഉദകേ ദണ്ഡരാജീവ, ആരഗ്ഗേരിവ സാസപോ;

വിജ്ജുപ്പാദാവ ധമ്മാ തേ, പരിത്തട്ഠായിനോ സിയും.

൧൨൭൫. കദലീസുപിനാലാതചക്കമായുപമാ ഇമേ;

അസാരാ പന നിസ്സാരാ, ഹുത്വാ ഖായന്തി യോഗിനോ.

൧൨൭൬. ഏവമേത്താവതാ തേന, ഉദയബ്ബയദസ്സനം;

ലക്ഖണാനി ച പഞ്ഞാസ, പടിവിജ്ഝ ഠിതം പന.

൧൨൭൭. ഞാണം അധിഗതം ഹോതി, തരുണം പഠമം പന;

യസ്സ ചാധിഗമാ യോഗീ, ഹോതാരദ്ധവിപസ്സകോ.

൧൨൭൮. വിപസ്സനായ ഹേതായ,

കരുണായാഥ യോഗിനോ;

വിപസ്സകസ്സ ജായന്തേ,

ഉപക്ലേസാ ദസേവിമേ.

൧൨൭൯. ഓഭാസോ പീതി പസ്സദ്ധി, ഞാണം സദ്ധാ സതീ സുഖം;

ഉപേക്ഖാ വീരിയം നികന്തീതി, ഉപക്ലേസാ ദസേവിമേ.

൧൨൮൦. സമ്പത്തപടിവേധസ്സ, സോതാപന്നാദിനോപി ച;

തഥാ വിപ്പടിപന്നസ്സ, ഉപക്ലേസാ ന ജായരേ.

൧൨൮൧. സമ്മാവ പടിപന്നസ്സ, യുത്തയോഗസ്സ ഭിക്ഖുനോ;

സദാ വിപസ്സകസ്സേവ, ഉപ്പജ്ജന്തി കിരസ്സു തേ.

൧൨൮൨. വിപസ്സനായ ഓഭാസോ, ഓഭാസോതി പവുച്ചതി;

തസ്മിം പന സമുപ്പന്നേ, യോഗാവചരഭിക്ഖു സോ.

൧൨൮൩. മഗ്ഗപ്പത്തോ ഫലപ്പത്തോ, അഹമസ്മീതി ഗണ്ഹതി;

അമഗ്ഗംയേവ മഗ്ഗോതി, തസ്സേവം പന ഗണ്ഹതോ.

൧൨൮൪. ഏവം വിപസ്സനാവീഥി,

ഓക്കന്താ നാമ ഹോതി സാ;

ഓഭാസമേവ സോ ഭിക്ഖു,

അസ്സാദേന്തോ നിസീദതി.

൧൨൮൫. പീതി വിപ്പസ്സനാപീതി, തസ്സ തസ്മിം ഖണേ പന;

തദാ പഞ്ചവിധാ പീതി, ജായന്തേ ഖുദ്ദികാദികാ.

൧൨൮൬. വിപസ്സനായ പസ്സദ്ധി, പസ്സദ്ധീതി പവുച്ചതി;

യോഗിനോ കായചിത്താനി, പസ്സദ്ധാനേവ ഹോന്തി ഹി.

൧൨൮൭. ലഹൂനി ച മുദൂനേവ, കമ്മഞ്ഞാനേവ ഹോന്തി ഹി;

പസ്സദ്ധാദീഹി സോ ഭിക്ഖു, അനുഗ്ഗഹിതമാനസോ.

൧൨൮൮. അമാനുസിം രതിം നാമ,

അനുഭോതി അനുത്തരം;

യം സന്ധായ ച ഗാഥായോ,

ഭാസിതാ ഹി മഹേസിനാ.

൧൨൮൯. ‘‘സുഞ്ഞാഗാരം പവിട്ഠസ്സ, സന്തചിത്തസ്സ ഭിക്ഖുനോ;

അമാനുസീ രതി ഹോതി, സമ്മാ ധമ്മം വിപസ്സതോ.

൧൨൯൦. ‘‘യതോ യതോ സമ്മസതി, ഖന്ധാനം ഉദയബ്ബയം;

ലഭതീ പീതിപാമോജ്ജം, അമതം തം വിജാനത’’ന്തി.

൧൨൯൧. ഞാണാദയോ ഉപക്ലേസാ, ഞേയ്യാ വുത്തനയേനിധ;

ഏതേ ദസ ഉപക്ലേസാ, വജ്ജനീയാവ യോഗിനാ.

൧൨൯൨. ഏത്ഥോഭാസാദയോ ധമ്മാ,

ഉപക്ലേസസ്സ വത്ഥുതോ;

ഉപക്ലേസാതി നിദ്ദിട്ഠാ,

ഉപക്ലേസനികന്തി തു.

൧൨൯൩. തം തമാവജ്ജമാനസ്സ, ഭാവനാ പരിഹായതി;

അസത്തേ സത്തസഞ്ഞീ ച, ഹോതി അപ്പസ്സുതോ നരോ.

൧൨൯൪. സബ്ബോഭാസാദയോ ധമ്മേ, ന മഗ്ഗോതി വിചാരയം;

മഗ്ഗോ വിപസ്സനാഞാണം, ഇച്ചേവം പന പണ്ഡിതോ.

൧൨൯൫. വവത്ഥപേതി മഗ്ഗഞ്ച, അമഗ്ഗഞ്ചേവ ചേതസാ;

തസ്സ ചേവം അയം മഗ്ഗോ, നായം മഗ്ഗോതി യോഗിനോ.

൧൨൯൬. മഗ്ഗാമഗ്ഗഞ്ച വിഞ്ഞായ, ഠിതഞാണമിദം പന;

മഗ്ഗാമഗ്ഗേസുഞാണന്തി, ഭൂരിഞാണേന ദേസിതം.

൧൨൯൭. മഗ്ഗാമഗ്ഗഞാണദസ്സനേസു കോവിദാ,

സാരാസാരവേദിനോ സമാഹിതാഹിതാ;

മഗ്ഗാമഗ്ഗഞാണദസ്സനന്തി തം ഇദം,

ബുദ്ധാ ബുദ്ധസാവകാ വദന്തി വാദിനോ.

ഇതി അഭിധമ്മാവതാരേ മഗ്ഗാമഗ്ഗഞാണദസ്സനവിസുദ്ധിനിദ്ദേസോ

നാമ വീസതിമോ പരിച്ഛേദോ.