നിഗമനകഥാവണ്ണനാ

൧൪൦൧. സുമതിമതിവിചാരബോധനോതി സുമതീനം സുന്ദരപഞ്ഞാനം കവീനം മതിയാ വിചാരസ്സ ബോധനോ. വിമതിവിമോഹവിനാസനോതി വിമതീനം ബാലാനം വിമോഹസ്സ വിനാസനോ. കുമതിമതിമഹാതമോനാസോതി കുമതീനം ബാലാനം മഹാതമസന്നിഭായ മതിയാ നാസകോ. പടുമതിഭാസകരോതി പടൂനം പണ്ഡിതാനം തിക്ഖപഞ്ഞായ ഓഭാസകരോ.

൧൪൦൨. സുമതിനാമകോ ഭിക്ഖു അസമാനതോ അസദിസായ പൂജായ മമ ആയാചിതോ യതോ യസ്മാ കാരണാ, തതോ തസ്മാ കാരണാ അയം അഭിധമ്മാവതാരോ. പദാതോ പദാതി കോട്ഠാസതോ കോട്ഠാസതോ. ഹിതവിഭാവനാ ഭാവനാതി ഹിതപ്പകാസനായ ഭാവനായ മയാ രചിതോ. അഥ വാ അഹം സുമതിനാ ഭിക്ഖുനാ അസമാനതോ മാനതോ ആയാചിതോ യതോ യസ്മാ, തതോ തസ്മാ.

൧൪൦൫. തിവിധാ ബ്യപ്പഥാനഞ്ഹി ഗതിയോതി ബ്യപ്പഥാനം വചനാനം അത്ഥഗന്ഥയുത്തിവസേന തിവിധാ ഗതിയോ.

൧൪൦൬. നികായന്തരലദ്ധീഹീതി അഞ്ഞസ്മിം നികായേ ലദ്ധീഹി. വാചനാമഗ്ഗനിസ്സിതോതി വചനപ്പബന്ധനിസ്സിതോ.

൧൪൧൦. അസംകിണ്ണകുലാകുലേതി അസമ്മിസ്സകുലേഹി ആകിണ്ണേ. സുപസന്നസിതോദകേതി മധുരസീതോദകേ.

൧൪൧൧. സങ്കടേതി സമ്ബാധേ.

൧൪൧൨. കേലാസസിഖരാകാരപാസാദപടിമണ്ഡിതേതി രജതപബ്ബതമത്ഥകനിഭേഹി പാസാദേഹി അലങ്കതേ.

൧൪൧൩. വിവിധാകാരചാരുപാകാരഗോപുരേതി വിവിധസണ്ഠാനമനുഞ്ഞപാകാരദ്വാരകോട്ഠകേ.

൧൪൧൪. സല്ലേഖാതി സല്ലേഖവുത്തി. സാഖല്യേതി സഖിലഭാവേ. സതാതി സതിസമ്പന്നേന.

൧൪൧൫. വസ്സവലാഹകാ ദേവാതി വസ്സവലാഹകഭൂതാ ദേവാ അമരാ.

നിഗമനകഥാവണ്ണനാ നിട്ഠിതാ.

അഭിധമ്മാവതാരപുരാണടീകാ നിട്ഠിതാ.

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ

അഭിധമ്മാവതാര-അഭിനവടീകാ

(പഠമോ ഭാഗോ)

ഗന്ഥാരമ്ഭകഥാ

(ക) വിസുദ്ധകരുണാഞാണം, ബുദ്ധം സമ്ബുദ്ധപൂജിതം;

ധമ്മം സദ്ധമ്മസമ്ഭൂതം, വന്ദേ സംഘം നിരങ്ഗണം.

(ഖ) സാരിപുത്തം മഹാഥേരം, പരിയത്തിവിസാരദം;

നമാമി സന്തവുത്തിം മേ, ഗുരും ഗാരവഭാജനം.

(ഗ) വന്ദന്തേന മയാ ഏവം,

യാ ലദ്ധാ പുഞ്ഞസമ്പദാ;

ഹിത്വാ തസ്സാനുഭാവേന,

അന്തരായേ അസേസതോ.

(ഘ) മഹാവിഹാരവാസീനം, ഥേരാനം ഥിരസീലിനം;

വംസാലങ്കാരഭൂതേന, ഭൂതാനുഗ്ഗഹകാരിനാ.

(ങ) ഥേരേന ബുദ്ധദത്തേന, രചിതം യം മനോരമം;

പിടകേ അഭിധമ്മസ്മിം, ഓതാരുപായഭാവതോ.

(ച) അഭിധമ്മാവതാരോതി, ലദ്ധനാമേന വിസ്സുതം;

നാനാനിപുണഗമ്ഭീരനയം പകരണുത്തമം.

(ഛ) അത്ഥസംവണ്ണനം തസ്സ, ആരഭിസ്സം യഥാബലം;

പാമോജ്ജജനനത്ഥായ, ആഭിധമ്മികഭിക്ഖുനന്തി.