൮. ദുതിയഏകധമ്മപേയ്യാലവഗ്ഗോ

൧. കല്യാണമിത്തസുത്തം

൭൭. സാവത്ഥിനിദാനം. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി, യേന അനുപ്പന്നോ വാ അരിയോ അട്ഠങ്ഗികോ മഗ്ഗോ ഉപ്പജ്ജതി, ഉപ്പന്നോ വാ അരിയോ അട്ഠങ്ഗികോ മഗ്ഗോ ഭാവനാപാരിപൂരിം ഗച്ഛതി, യഥയിദം, ഭിക്ഖവേ, കല്യാണമിത്തതാ. കല്യാണമിത്തസ്സേതം, ഭിക്ഖവേ, ഭിക്ഖുനോ പാടികങ്ഖം – അരിയം അട്ഠങ്ഗികം മഗ്ഗം ഭാവേസ്സതി, അരിയം അട്ഠങ്ഗികം മഗ്ഗം ബഹുലീകരിസ്സതി. കഥഞ്ച, ഭിക്ഖവേ, ഭിക്ഖു കല്യാണമിത്തോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതി? ഇധ, ഭിക്ഖവേ, ഭിക്ഖു സമ്മാദിട്ഠിം ഭാവേതി വിവേകനിസ്സിതം…പേ… സമ്മാസമാധിം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഖോ, ഭിക്ഖവേ, ഭിക്ഖു കല്യാണമിത്തോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതീ’’തി. പഠമം.

൨-൬. സീലസമ്പദാദിസുത്തപഞ്ചകം

൭൮-൮൨. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി, യേന അനുപ്പന്നോ വാ അരിയോ അട്ഠങ്ഗികോ മഗ്ഗോ ഉപ്പജ്ജതി, ഉപ്പന്നോ വാ അരിയോ അട്ഠങ്ഗികോ മഗ്ഗോ ഭാവനാപാരിപൂരിം ഗച്ഛതി, യഥയിദം, ഭിക്ഖവേ, സീലസമ്പദാ…പേ… യഥയിദം, ഭിക്ഖവേ, ഛന്ദസമ്പദാ…പേ… യഥയിദം, ഭിക്ഖവേ, അത്തസമ്പദാ…പേ… യഥയിദം, ഭിക്ഖവേ, ദിട്ഠിസമ്പദാ…പേ… യഥയിദം, ഭിക്ഖവേ, അപ്പമാദസമ്പദാ…പേ…. ഛട്ഠം.

൭. യോനിസോമനസികാരസമ്പദാസുത്തം

൮൩. ‘‘യഥയിദം, ഭിക്ഖവേ, യോനിസോമനസികാരസമ്പദാ. യോനിസോമനസികാരസമ്പന്നസ്സേതം, ഭിക്ഖവേ, ഭിക്ഖുനോ പാടികങ്ഖം – അരിയം അട്ഠങ്ഗികം മഗ്ഗം ഭാവേസ്സതി, അരിയം അട്ഠങ്ഗികം മഗ്ഗം ബഹുലീകരിസ്സതി. കഥഞ്ച, ഭിക്ഖവേ, ഭിക്ഖു യോനിസോമനസികാരസമ്പന്നോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതി? ഇധ, ഭിക്ഖവേ, ഭിക്ഖു സമ്മാദിട്ഠിം ഭാവേതി വിവേകനിസ്സിതം…പേ… സമ്മാസമാധിം ഭാവേതി വിവേകനിസ്സിതം വിരാഗനിസ്സിതം നിരോധനിസ്സിതം വോസ്സഗ്ഗപരിണാമിം. ഏവം ഖോ, ഭിക്ഖവേ, ഭിക്ഖു യോനിസോമനസികാരസമ്പന്നോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതീ’’തി. സത്തമം.

൧. കല്യാണമിത്തസുത്തം

൮൪. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി, യേന അനുപ്പന്നോ വാ അരിയോ അട്ഠങ്ഗികോ മഗ്ഗോ ഉപ്പജ്ജതി, ഉപ്പന്നോ വാ അരിയോ അട്ഠങ്ഗികോ മഗ്ഗോ ഭാവനാപാരിപൂരിം ഗച്ഛതി, യഥയിദം, ഭിക്ഖവേ, കല്യാണമിത്തതാ. കല്യാണമിത്തസ്സേതം, ഭിക്ഖവേ, ഭിക്ഖുനോ പാടികങ്ഖം – അരിയം അട്ഠങ്ഗികം മഗ്ഗം ഭാവേസ്സതി, അരിയം അട്ഠങ്ഗികം മഗ്ഗം ബഹുലീകരിസ്സതി. കഥഞ്ച, ഭിക്ഖവേ, ഭിക്ഖു കല്യാണമിത്തോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതി? ഇധ, ഭിക്ഖവേ, ഭിക്ഖു സമ്മാദിട്ഠിം ഭാവേതി രാഗവിനയപരിയോസാനം ദോസവിനയപരിയോസാനം മോഹവിനയപരിയോസാനം…പേ… സമ്മാസമാധിം ഭാവേതി രാഗവിനയപരിയോസാനം ദോസവിനയപരിയോസാനം മോഹവിനയപരിയോസാനം. ഏവം ഖോ, ഭിക്ഖവേ, ഭിക്ഖു കല്യാണമിത്തോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതീ’’തി. പഠമം.

൨-൬. സീലസമ്പദാദിസുത്തപഞ്ചകം

൮൫-൮൯. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി, യേന അനുപ്പന്നോ വാ അരിയോ അട്ഠങ്ഗികോ മഗ്ഗോ ഉപ്പജ്ജതി, ഉപ്പന്നോ വാ അരിയോ അട്ഠങ്ഗികോ മഗ്ഗോ ഭാവനാപാരിപൂരിം ഗച്ഛതി, യഥയിദം, ഭിക്ഖവേ, സീലസമ്പദാ…പേ… യഥയിദം, ഭിക്ഖവേ, ഛന്ദസമ്പദാ…പേ… യഥയിദം, ഭിക്ഖവേ, അത്തസമ്പദാ…പേ… യഥയിദം, ഭിക്ഖവേ, ദിട്ഠിസമ്പദാ…പേ… യഥയിദം, ഭിക്ഖവേ, അപ്പമാദസമ്പദാ…പേ…. ഛട്ഠം.

൭. യോനിസോമനസികാരസമ്പദാസുത്തം

൯൦. ‘‘യഥയിദം, ഭിക്ഖവേ, യോനിസോമനസികാരസമ്പദാ. യോനിസോമനസികാരസമ്പന്നസ്സേതം, ഭിക്ഖവേ, ഭിക്ഖുനോ പാടികങ്ഖം – അരിയം അട്ഠങ്ഗികം മഗ്ഗം ഭാവേസ്സതി, അരിയം അട്ഠങ്ഗികം മഗ്ഗം ബഹുലീകരിസ്സതി. കഥഞ്ച, ഭിക്ഖവേ, ഭിക്ഖു യോനിസോമനസികാരസമ്പന്നോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതി? ഇധ, ഭിക്ഖവേ, ഭിക്ഖു സമ്മാദിട്ഠിം ഭാവേതി രാഗവിനയപരിയോസാനം ദോസവിനയപരിയോസാനം മോഹവിനയപരിയോസാനം…പേ… സമ്മാസമാധിം ഭാവേതി രാഗവിനയപരിയോസാനം ദോസവിനയപരിയോസാനം മോഹവിനയപരിയോസാനം. ഏവം ഖോ, ഭിക്ഖവേ, ഭിക്ഖു യോനിസോമനസികാരസമ്പന്നോ അരിയം അട്ഠങ്ഗികം മഗ്ഗം ഭാവേതി, അരിയം അട്ഠങ്ഗികം മഗ്ഗം ബഹുലീകരോതീ’’തി. സത്തമം.

ദുതിയഏകധമ്മപേയ്യാലവഗ്ഗോ അട്ഠമോ.

തസ്സുദ്ദാനം –

കല്യാണമിത്തം സീലഞ്ച, ഛന്ദോ ച അത്തസമ്പദാ;

ദിട്ഠി ച അപ്പമാദോ ച, യോനിസോ ഭവതി സത്തമം.