൮. അനുപാദാപരിനിബ്ബാനസുത്തം

൪൮. സാവത്ഥിനിദാനം. ‘‘സചേ വോ, ഭിക്ഖവേ, അഞ്ഞതിത്ഥിയാ പരിബ്ബാജകാ ഏവം പുച്ഛേയ്യും – ‘കിമത്ഥിയം, ആവുസോ, സമണേ ഗോതമേ ബ്രഹ്മചരിയം വുസ്സതീ’തി, ഏവം പുട്ഠാ തുമ്ഹേ, ഭിക്ഖവേ, തേസം അഞ്ഞതിത്ഥിയാനം പരിബ്ബാജകാനം ഏവം ബ്യാകരേയ്യാഥ – ‘അനുപാദാപരിനിബ്ബാനത്ഥം ഖോ, ആവുസോ, ഭഗവതി ബ്രഹ്മചരിയം വുസ്സതീ’തി. സചേ പന വോ, ഭിക്ഖവേ, അഞ്ഞതിത്ഥിയാ പരിബ്ബാജകാ ഏവം പുച്ഛേയ്യും – ‘അത്ഥി പനാവുസോ, മഗ്ഗോ, അത്ഥി പടിപദാ അനുപാദാപരിനിബ്ബാനായാ’തി, ഏവം പുട്ഠാ തുമ്ഹേ, ഭിക്ഖവേ, തേസം അഞ്ഞതിത്ഥിയാനം പരിബ്ബാജകാനം ഏവം ബ്യാകരേയ്യാഥ – ‘അത്ഥി ഖോ, ആവുസോ, മഗ്ഗോ, അത്ഥി പടിപദാ അനുപാദാപരിനിബ്ബാനായാ’തി. കതമോ ച, ഭിക്ഖവേ, മഗ്ഗോ, കതമാ ച പടിപദാ അനുപാദാപരിനിബ്ബാനായ? അയമേവ അരിയോ അട്ഠങ്ഗികോ മഗ്ഗോ, സേയ്യഥിദം – സമ്മാദിട്ഠി…പേ… സമ്മാസമാധി. അയം, ഭിക്ഖവേ, മഗ്ഗോ, അയം പടിപദാ അനുപാദാപരിനിബ്ബാനായാതി. ഏവം പുട്ഠാ തുമ്ഹേ, ഭിക്ഖവേ, തേസം അഞ്ഞതിത്ഥിയാനം പരിബ്ബാജകാനം ഏവം ബ്യാകരേയ്യാഥാ’’തി. അട്ഠമം.

അഞ്ഞതിത്ഥിയപേയ്യാലവഗ്ഗോ പഞ്ചമോ.

തസ്സുദ്ദാനം –

വിരാഗസംയോജനം അനുസയം, അദ്ധാനം ആസവാ ഖയാ;

വിജ്ജാവിമുത്തിഞാണഞ്ച, അനുപാദായ അട്ഠമീ.