൬. കിലേസസംയുത്തം

൧. ചക്ഖുസുത്തം

൩൨൨. സാവത്ഥിനിദാനം. ‘‘യോ, ഭിക്ഖവേ, ചക്ഖുസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ സോതസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ ഘാനസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ ജിവ്ഹായ ഛന്ദരാഗോ, ചിത്തസ്സേസോ ഉപക്കിലേസോ. യോ കായസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ മനസ്മിം ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ ഇമേസു ഛസു ഠാനേസു ചേതസോ ഉപക്കിലേസോ പഹീനോ ഹോതി, നേക്ഖമ്മനിന്നഞ്ചസ്സ ചിത്തം ഹോതി. നേക്ഖമ്മപരിഭാവിതം ചിത്തം കമ്മനിയം ഖായതി, അഭിഞ്ഞാ സച്ഛികരണീയേസു ധമ്മേസൂ’’തി. പഠമം.

൨. രൂപസുത്തം

൩൨൩. സാവത്ഥിനിദാനം. ‘‘യോ, ഭിക്ഖവേ, രൂപേസു ഛന്ദരാഗോ, ചിത്തസ്സേസോ ഉപക്കിലേസോ. യോ സദ്ദേസു… യോ ഗന്ധേസു… യോ രസേസു… യോ ഫോട്ഠബ്ബേസു… യോ ധമ്മേസു ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ ഇമേസു ഛസു ഠാനേസു ചേതസോ ഉപക്കിലേസോ പഹീനോ ഹോതി, നേക്ഖമ്മനിന്നഞ്ചസ്സ ചിത്തം ഹോതി. നേക്ഖമ്മപരിഭാവിതം ചിത്തം കമ്മനിയം ഖായതി, അഭിഞ്ഞാ സച്ഛികരണീയേസു ധമ്മേസൂ’’തി. ദുതിയം.

൩. വിഞ്ഞാണസുത്തം

൩൨൪. സാവത്ഥിനിദാനം. ‘‘യോ, ഭിക്ഖവേ, ചക്ഖുവിഞ്ഞാണസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ സോതവിഞ്ഞാണസ്മിം… യോ ഘാനവിഞ്ഞാണസ്മിം… യോ ജിവ്ഹാവിഞ്ഞാണസ്മിം… യോ കായവിഞ്ഞാണസ്മിം… യോ മനോവിഞ്ഞാണസ്മിം ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ ഇമേസു ഛസു ഠാനേസു ചേതസോ ഉപക്കിലേസോ പഹീനോ ഹോതി, നേക്ഖമ്മനിന്നഞ്ചസ്സ ചിത്തം ഹോതി. നേക്ഖമ്മപരിഭാവിതം ചിത്തം കമ്മനിയം ഖായതി, അഭിഞ്ഞാ സച്ഛികരണീയേസു ധമ്മേസൂ’’തി. തതിയം.

൪. സമ്ഫസ്സസുത്തം

൩൨൫. സാവത്ഥിനിദാനം. ‘‘യോ, ഭിക്ഖവേ, ചക്ഖുസമ്ഫസ്സസ്മിം ഛന്ദരാഗോ, ചിത്തസ്സേസോ ഉപക്കിലേസോ. യോ സോതസമ്ഫസ്സസ്മിം… യോ ഘാനസമ്ഫസ്സസ്മിം… യോ ജിവ്ഹാസമ്ഫസ്സസ്മിം… യോ കായസമ്ഫസ്സസ്മിം… യോ മനോസമ്ഫസ്സസ്മിം ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ…പേ… അഭിഞ്ഞാ സച്ഛികരണീയേസു ധമ്മേസൂ’’തി. ചതുത്ഥം.

൫. സമ്ഫസ്സജസുത്തം

൩൨൬. സാവത്ഥിനിദാനം. ‘‘യോ, ഭിക്ഖവേ, ചക്ഖുസമ്ഫസ്സജായ വേദനായ ഛന്ദരാഗോ, ചിത്തസ്സേസോ ഉപക്കിലേസോ. യോ സോതസമ്ഫസ്സജായ വേദനായ… യോ ഘാനസമ്ഫസ്സജായ വേദനായ… യോ ജിവ്ഹാസമ്ഫസ്സജായ വേദനായ… യോ കായസമ്ഫസ്സജായ വേദനായ… യോ മനോസമ്ഫസ്സജായ വേദനായ ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ…പേ… അഭിഞ്ഞാ സച്ഛികരണീയേസു ധമ്മേസൂ’’തി. പഞ്ചമം.

൬. സഞ്ഞാസുത്തം

൩൨൭. സാവത്ഥിനിദാനം. ‘‘യോ, ഭിക്ഖവേ, രൂപസഞ്ഞായ ഛന്ദരാഗോ, ചിത്തസ്സേസോ ഉപക്കിലേസോ. യോ സദ്ദസഞ്ഞായ… യോ ഗന്ധസഞ്ഞായ… യോ രസസഞ്ഞായ… യോ ഫോട്ഠബ്ബസഞ്ഞായ… യോ ധമ്മസഞ്ഞായ ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ…പേ… അഭിഞ്ഞാ സച്ഛികരണീയേസു ധമ്മേസൂ’’തി. ഛട്ഠം.

൭. സഞ്ചേതനാസുത്തം

൩൨൮. സാവത്ഥിനിദാനം. ‘‘യോ, ഭിക്ഖവേ, രൂപസഞ്ചേതനായ ഛന്ദരാഗോ, ചിത്തസ്സേസോ ഉപക്കിലേസോ. യോ സദ്ദസഞ്ചേതനായ… യോ ഗന്ധസഞ്ചേതനായ… യോ രസസഞ്ചേതനായ… യോ ഫോട്ഠബ്ബസഞ്ചേതനായ… യോ ധമ്മസഞ്ചേതനായ ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ…പേ… അഭിഞ്ഞാ സച്ഛികരണീയേസു ധമ്മേസൂ’’തി. സത്തമം.

൮. തണ്ഹാസുത്തം

൩൨൯. സാവത്ഥിനിദാനം. ‘‘യോ, ഭിക്ഖവേ, രൂപതണ്ഹായ ഛന്ദരാഗോ, ചിത്തസ്സേസോ ഉപക്കിലേസോ. യോ സദ്ദതണ്ഹായ… യോ ഗന്ധതണ്ഹായ… യോ രസതണ്ഹായ… യോ ഫോട്ഠബ്ബതണ്ഹായ… യോ ധമ്മതണ്ഹായ ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ…പേ… അഭിഞ്ഞാ സച്ഛികരണീയേസു ധമ്മേസൂ’’തി. അട്ഠമം.

൯. ധാതുസുത്തം

൩൩൦. സാവത്ഥിനിദാനം. ‘‘യോ, ഭിക്ഖവേ, പഥവീധാതുയാ ഛന്ദരാഗോ, ചിത്തസ്സേസോ ഉപക്കിലേസോ. യോ ആപോധാതുയാ… യോ തേജോധാതുയാ… യോ വായോധാതുയാ… യോ ആകാസധാതുയാ… യോ വിഞ്ഞാണധാതുയാ ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ ഇമേസു ഛസു ഠാനേസു ചേതസോ ഉപക്കിലേസോ പഹീനോ ഹോതി, നേക്ഖമ്മനിന്നഞ്ചസ്സ ചിത്തം ഹോതി. നേക്ഖമ്മപരിഭാവിതം ചിത്തം കമ്മനിയം ഖായതി, അഭിഞ്ഞാ സച്ഛികരണീയേസു ധമ്മേസൂ’’തി. നവമം.

൧൦. ഖന്ധസുത്തം

൩൩൧. സാവത്ഥിനിദാനം. ‘‘യോ, ഭിക്ഖവേ, രൂപസ്മിം ഛന്ദരാഗോ, ചിത്തസ്സേസോ ഉപക്കിലേസോ…പേ… യോ വിഞ്ഞാണസ്മിം ഛന്ദരാഗോ, ചിത്തസ്സേസോ ഉപക്കിലേസോ. യതോ ഖോ, ഭിക്ഖവേ, ഭിക്ഖുനോ ഇമേസു പഞ്ചസു ഠാനേസു ചേതസോ ഉപക്കിലേസോ പഹീനോ ഹോതി, നേക്ഖമ്മനിന്നഞ്ചസ്സ ചിത്തം ഹോതി. നേക്ഖമ്മപരിഭാവിതം ചിത്തം കമ്മനിയം ഖായതി, അഭിഞ്ഞാ സച്ഛികരണീയേസു ധമ്മേസൂ’’തി. ദസമം.

കിലേസസംയുത്തം സമത്തം.