൪-൧൨. സാരഗന്ധാദിദാതാസുത്തനവകം

൪൪൧-൪൪൯. സാവത്ഥിനിദാനം. ഏകമന്തം നിസിന്നോ ഖോ സോ ഭിക്ഖു ഭഗവന്തം ഏതദവോച – ‘‘കോ നു ഖോ, ഭന്തേ, ഹേതു, കോ പച്ചയോ, യേന മിധേകച്ചോ കായസ്സ ഭേദാ പരം മരണാ സാരഗന്ധേ അധിവത്ഥാനം ദേവാനം…പേ… ഫേഗ്ഗുഗന്ധേ അധിവത്ഥാനം ദേവാനം… തചഗന്ധേ അധിവത്ഥാനം ദേവാനം… പപടികഗന്ധേ അധിവത്ഥാനം ദേവാനം… പത്തഗന്ധേ അധിവത്ഥാനം ദേവാനം… പുപ്ഫഗന്ധേ അധിവത്ഥാനം ദേവാനം… ഫലഗന്ധേ അധിവത്ഥാനം ദേവാനം… രസഗന്ധേ അധിവത്ഥാനം ദേവാനം… ഗന്ധഗന്ധേ അധിവത്ഥാനം ദേവാനം സഹബ്യതം ഉപപജ്ജതീ’’തി? ‘‘ഇധ, ഭിക്ഖു, ഏകച്ചോ കായേന സുചരിതം ചരതി, വാചായ സുചരിതം ചരതി, മനസാ സുചരിതം ചരതി. തസ്സ സുതം ഹോതി – ‘സാരഗന്ധേ അധിവത്ഥാ ദേവാ ദീഘായുകാ വണ്ണവന്തോ സുഖബഹുലാ’തി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ സാരഗന്ധേ അധിവത്ഥാനം ദേവാനം…പേ… ഫേഗ്ഗുഗന്ധേ അധിവത്ഥാനം ദേവാനം… തചഗന്ധേ അധിവത്ഥാനം ദേവാനം… പപടികഗന്ധേ അധിവത്ഥാനം ദേവാനം… പത്തഗന്ധേ അധിവത്ഥാനം ദേവാനം… പുപ്ഫഗന്ധേ അധിവത്ഥാനം ദേവാനം… ഫലഗന്ധേ അധിവത്ഥാനം ദേവാനം… രസഗന്ധേ അധിവത്ഥാനം ദേവാനം… ഗന്ധഗന്ധേ അധിവത്ഥാനം ദേവാനം സഹബ്യതം ഉപപജ്ജേയ്യ’ന്തി. സോ ദാതാ ഹോതി സാരഗന്ധാനം…പേ… സോ ദാതാ ഹോതി ഫേഗ്ഗുഗന്ധാനം… സോ ദാതാ ഹോതി തചഗന്ധാനം… സോ ദാതാ ഹോതി പപടികഗന്ധാനം… സോ ദാതാ ഹോതി പത്തഗന്ധാനം… സോ ദാതാ ഹോതി പുപ്ഫഗന്ധാനം… സോ ദാതാ ഹോതി ഫലഗന്ധാനം… സോ ദാതാ ഹോതി രസഗന്ധാനം… സോ ദാതാ ഹോതി ഗന്ധഗന്ധാനം. സോ കായസ്സ ഭേദാ പരം മരണാ ഗന്ധഗന്ധേ അധിവത്ഥാനം ദേവാനം സഹബ്യതം ഉപപജ്ജതി. അയം ഖോ, ഭിക്ഖു, ഹേതു, അയം പച്ചയോ, യേന മിധേകച്ചോ കായസ്സ ഭേദാ പരം മരണാ ഗന്ധഗന്ധേ അധിവത്ഥാനം ദേവാനം സഹബ്യതം ഉപപജ്ജതീ’’തി. ദ്വാദസമം.