൮. സമണബ്രാഹ്മണവഗ്ഗോ

൧. ജരാമരണസുത്തം

൭൧. ഏവം മേ സുതം – ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തത്ര ഖോ ഭഗവാ…പേ… ‘‘യേ ഹി കേചി, ഭിക്ഖവേ, സമണാ വാ ബ്രാഹ്മണാ വാ ജരാമരണം നപ്പജാനന്തി, ജരാമരണസമുദയം നപ്പജാനന്തി, ജരാമരണനിരോധം നപ്പജാനന്തി, ജരാമരണനിരോധഗാമിനിം പടിപദം നപ്പജാനന്തി, ന മേ തേ, ഭിക്ഖവേ, സമണാ വാ ബ്രാഹ്മണാ വാ സമണേസു വാ സമണസമ്മതാ ബ്രാഹ്മണേസു വാ ബ്രാഹ്മണസമ്മതാ, ന ച പന തേ ആയസ്മന്തോ സാമഞ്ഞത്ഥം വാ ബ്രഹ്മഞ്ഞത്ഥം വാ ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരന്തി.

‘‘യേ ച ഖോ കേചി, ഭിക്ഖവേ, സമണാ വാ ബ്രാഹ്മണാ വാ ജരാമരണം പജാനന്തി…പേ… പടിപദം പജാനന്തി, തേ ഖോ മേ, ഭിക്ഖവേ, സമണാ വാ ബ്രാഹ്മണാ വാ സമണേസു ചേവ സമണസമ്മതാ ബ്രാഹ്മണേസു ച ബ്രാഹ്മണസമ്മതാ, തേ ച പനായസ്മന്തോ സാമഞ്ഞത്ഥഞ്ച ബ്രഹ്മഞ്ഞത്ഥഞ്ച ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരന്തീ’’തി. (സുത്തന്തോ ഏകോ). പഠമം.

൨-൧൧. ജാതിസുത്താദിദസകം

൭൨. സാവത്ഥിയം വിഹരതി…പേ… ജാതിം നപ്പജാനന്തി…പേ….

(൩) ഭവം നപ്പജാനന്തി…പേ….

(൪) ഉപാദാനം നപ്പജാനന്തി…പേ….

(൫) തണ്ഹം നപ്പജാനന്തി…പേ….

(൬) വേദനം നപ്പജാനന്തി…പേ….

(൭) ഫസ്സം നപ്പജാനന്തി…പേ….

(൮) സളായതനം നപ്പജാനന്തി…പേ….

(൯) നാമരൂപം നപ്പജാനന്തി…പേ….

(൧൦) വിഞ്ഞാണം നപ്പജാനന്തി…പേ….

(൧൧) ‘‘സങ്ഖാരേ നപ്പജാനന്തി, സങ്ഖാരസമുദയം നപ്പജാനന്തി, സങ്ഖാരനിരോധം നപ്പജാനന്തി, സങ്ഖാരനിരോധഗാമിനിം പടിപദം നപ്പജാനന്തി…പേ… സങ്ഖാരേ പജാനന്തി…പേ… സയം അഭിഞ്ഞാ സച്ഛികത്വാ ഉപസമ്പജ്ജ വിഹരന്തീ’’തി. ഏകാദസമം.

സമണബ്രാഹ്മണവഗ്ഗോ അട്ഠമോ.

തസ്സുദ്ദാനം –

പച്ചയേകാദസ വുത്താ, ചതുസച്ചവിഭജ്ജനാ;

സമണബ്രാഹ്മണവഗ്ഗോ, നിദാനേ ഭവതി അട്ഠമോ.

വഗ്ഗുദ്ദാനം –

ബുദ്ധോ ആഹാരോ ദസബലോ, കളാരോ ഗഹപതിപഞ്ചമോ;

ദുക്ഖവഗ്ഗോ മഹാവഗ്ഗോ, അട്ഠമോ സമണബ്രാഹ്മണോതി.