൭. കണ്ഡകവിമാനവത്ഥു

൧൧൭൧. ‘‘പുണ്ണമാസേ യഥാ ചന്ദോ, നക്ഖത്തപരിവാരിതോ;

സമന്താ അനുപരിയാതി, താരകാധിപതീ സസീ.

൧൧൭൨. ‘‘തഥൂപമം ഇദം ബ്യമ്ഹം, ദിബ്ബം ദേവപുരമ്ഹി ച;

അതിരോചതി വണ്ണേന, ഉദയന്തോവ രംസിമാ.

൧൧൭൩. ‘‘വേളുരിയസുവണ്ണസ്സ, ഫലികാ രൂപിയസ്സ ച;

മസാരഗല്ലമുത്താഹി, ലോഹിതങ്ഗമണീഹി ച.

൧൧൭൪. ‘‘ചിത്രാ മനോരമാ ഭൂമി, വേളൂരിയസ്സ സന്ഥതാ;

കൂടാഗാരാ സുഭാ രമ്മാ, പാസാദോ തേ സുമാപിതോ.

൧൧൭൫. ‘‘രമ്മാ ച തേ പോക്ഖരണീ, പുഥുലോമനിസേവിതാ;

അച്ഛോദകാ വിപ്പസന്നാ, സോവണ്ണവാലുകസന്ഥതാ.

൧൧൭൬. ‘‘നാനാപദുമസഞ്ഛന്നാ, പുണ്ഡരീകസമോതതാ [സമോത്ഥതാ (ക.), സമോഗതാ (സ്യാ.)];

സുരഭിം സമ്പവായന്തി, മനുഞ്ഞാ മാലുതേരിതാ.

൧൧൭൭. ‘‘തസ്സാ തേ ഉഭതോ പസ്സേ, വനഗുമ്ബാ സുമാപിതാ;

ഉപേതാ പുപ്ഫരുക്ഖേഹി, ഫലരുക്ഖേഹി ചൂഭയം.

൧൧൭൮. ‘‘സോവണ്ണപാദേ പല്ലങ്കേ, മുദുകേ ഗോണകത്ഥതേ [ചോലസന്ഥതേ (സീ.)];

നിസിന്നം ദേവരാജംവ, ഉപതിട്ഠന്തി അച്ഛരാ.

൧൧൭൯. ‘‘സബ്ബാഭരണസഞ്ഛന്നാ, നാനാമാലാവിഭൂസിതാ;

രമേന്തി തം മഹിദ്ധികം, വസവത്തീവ മോദസി.

൧൧൮൦. ‘‘ഭേരിസങ്ഖമുദിങ്ഗാഹി, വീണാഹി പണവേഹി ച;

രമസി രതിസമ്പന്നോ, നച്ചഗീതേ സുവാദിതേ.

൧൧൮൧. ‘‘ദിബ്ബാ തേ വിവിധാ രൂപാ, ദിബ്ബാ സദ്ദാ അഥോ രസാ;

ഗന്ധാ ച തേ അധിപ്പേതാ, ഫോട്ഠബ്ബാ ച മനോരമാ.

൧൧൮൨. ‘‘തസ്മിം വിമാനേ പവരേ, ദേവപുത്ത മഹപ്പഭോ;

അതിരോചസി വണ്ണേന, ഉദയന്തോവ ഭാണുമാ.

൧൧൮൩. ‘‘ദാനസ്സ തേ ഇദം ഫലം, അഥോ സീലസ്സ വാ പന;

അഥോ അഞ്ജലികമ്മസ്സ, തം മേ അക്ഖാഹി പുച്ഛിതോ’’.

൧൧൮൪. സോ ദേവപുത്തോ അത്തമനോ…പേ… യസ്സ കമ്മസ്സിദം ഫലം.

൧൧൮൫. ‘‘അഹം കപിലവത്ഥുസ്മിം, സാകിയാനം പുരുത്തമേ;

സുദ്ധോദനസ്സ പുത്തസ്സ, കണ്ഡകോ സഹജോ അഹം.

൧൧൮൬. ‘‘യദാ സോ അഡ്ഢരത്തായം, ബോധായ മഭിനിക്ഖമി;

സോ മം മുദൂഹി പാണീഹി, ജാലി [ജാല (സീ.)] തമ്ബനഖേഹി ച.

൧൧൮൭. ‘‘സത്ഥിം ആകോടയിത്വാന, വഹ സമ്മാതി ചബ്രവി;

അഹം ലോകം താരയിസ്സം, പത്തോ സമ്ബോധിമുത്തമം.

൧൧൮൮. ‘‘തം മേ ഗിരം സുണന്തസ്സ, ഹാസോ മേ വിപുലോ അഹു;

ഉദഗ്ഗചിത്തോ സുമനോ, അഭിസീസിം [അഭിസിംസിം (സീ.), അഭിസീസി (പീ.)] തദാ അഹം.

൧൧൮൯. ‘‘അഭിരൂള്ഹഞ്ച മം ഞത്വാ, സക്യപുത്തം മഹായസം;

ഉദഗ്ഗചിത്തോ മുദിതോ, വഹിസ്സം പുരിസുത്തമം.

൧൧൯൦. ‘‘പരേസം വിജിതം ഗന്ത്വാ, ഉഗ്ഗതസ്മിം ദിവാകരേ [ദിവങ്കരേ (സ്യാ. ക.)];

മമം ഛന്നഞ്ച ഓഹായ, അനപേക്ഖോ സോ അപക്കമി.

൧൧൯൧. ‘‘തസ്സ തമ്ബനഖേ പാദേ, ജിവ്ഹായ പരിലേഹിസം;

ഗച്ഛന്തഞ്ച മഹാവീരം, രുദമാനോ ഉദിക്ഖിസം.

൧൧൯൨. ‘‘അദസ്സനേനഹം തസ്സ, സക്യപുത്തസ്സ സിരീമതോ;

അലത്ഥം ഗരുകാബാധം, ഖിപ്പം മേ മരണം അഹു.

൧൧൯൩. ‘‘തസ്സേവ ആനുഭാവേന, വിമാനം ആവസാമിദം;

സബ്ബകാമഗുണോപേതം, ദിബ്ബം ദേവപുരമ്ഹി ച.

൧൧൯൪. ‘‘യഞ്ച മേ അഹുവാ ഹാസോ, സദ്ദം സുത്വാന ബോധിയാ;

തേനേവ കുസലമൂലേന, ഫുസിസ്സം ആസവക്ഖയം.

൧൧൯൫. ‘‘സചേ ഹി ഭന്തേ ഗച്ഛേയ്യാസി, സത്ഥു ബുദ്ധസ്സ സന്തികേ;

മമാപി നം വചനേന, സിരസാ വജ്ജാസി വന്ദനം.

൧൧൯൬. ‘‘അഹമ്പി ദട്ഠും ഗച്ഛിസ്സം, ജിനം അപ്പടിപുഗ്ഗലം;

ദുല്ലഭം ദസ്സനം ഹോതി, ലോകനാഥാന താദിന’’ന്തി.

൧൧൯൭. സോ കതഞ്ഞൂ കതവേദീ, സത്ഥാരം ഉപസങ്കമി;

സുത്വാ ഗിരം ചക്ഖുമതോ, ധമ്മചക്ഖും വിസോധയി.

൧൧൯൮. വിസോധേത്വാ ദിട്ഠിഗതം, വിചികിച്ഛം വതാനി ച;

വന്ദിത്വാ സത്ഥുനോ പാദേ, തത്ഥേവന്തരധായഥാതി [തത്ഥേവന്തരധായതീതി (ക.)].

കണ്ഡകവിമാനം സത്തമം.