൧൧. സുനിക്ഖിത്തവിമാനവത്ഥു

൧൨൮൨. ‘‘ഉച്ചമിദം മണിഥൂണം വിമാനം, സമന്തതോ ദ്വാദസ യോജനാനി;

കൂടാഗാരാ സത്തസതാ ഉളാരാ, വേളുരിയഥമ്ഭാ രുചകത്ഥതാ സുഭാ.

൧൨൮൩. ‘‘തത്ഥച്ഛസി പിവസി ഖാദസി ച, ദിബ്ബാ ച വീണാ പവദന്തി വഗ്ഗും;

ദിബ്ബാ രസാ കാമഗുണേത്ഥ പഞ്ച, നാരിയോ ച നച്ചന്തി സുവണ്ണഛന്നാ.

൧൨൮൪. ‘‘കേന തേതാദിസോ വണ്ണോ, കേന തേ ഇധ മിജ്ഝതി;

ഉപ്പജ്ജന്തി ച തേ ഭോഗാ, യേ കേചി മനസോ പിയാ.

൧൨൮൫. ‘‘പുച്ഛാമി ‘തം ദേവ മഹാനുഭാവ, മനുസ്സഭൂതോ കിമകാസി പുഞ്ഞം;

കേനാസി ഏവം ജലിതാനുഭാവോ, വണ്ണോ ച തേ സബ്ബദിസാ പഭാസതീ’’തി.

൧൨൮൬. സോ ദേവപുത്തോ അത്തമനോ, മോഗ്ഗല്ലാനേന പുച്ഛിതോ;

പഞ്ഹം പുട്ഠോ വിയാകാസി, യസ്സ കമ്മസ്സിദം ഫലം.

൧൨൮൭. ‘‘ദുന്നിക്ഖിത്തം മാലം സുനിക്ഖിപിത്വാ, പതിട്ഠപേത്വാ സുഗതസ്സ ഥൂപേ;

മഹിദ്ധികോ ചമ്ഹി മഹാനുഭാവോ, ദിബ്ബേഹി കാമേഹി സമങ്ഗിഭൂതോ.

൧൨൮൮. ‘‘തേന മേതാദിസോ വണ്ണോ,

തേന മേ ഇധ മിജ്ഝതി;

ഉപ്പജ്ജന്തി ച മേ ഭോഗാ,

യേ കേചി മനസോ പിയാ.

൧൨൮൯. ‘‘അക്ഖാമി തേ ഭിക്ഖു മഹാനുഭാവ,

മനുസ്സഭൂതോ യമഹം അകാസിം;

തേനമ്ഹി ഏവം ജലിതാനുഭാവോ,

വണ്ണോ ച മേ സബ്ബദിസാ പഭാസതീ’’തി.

സുനിക്ഖിത്തവിമാനം ഏകാദസമം.

സുനിക്ഖിത്തവഗ്ഗോ സത്തമോ നിട്ഠിതോ.

തസ്സുദ്ദാനം –

ദ്വേ ദലിദ്ദാ വനവിഹാരാ, ഭതകോ ഗോപാലകണ്ഡകാ;

അനേകവണ്ണമട്ഠകുണ്ഡലീ, സേരീസകോ സുനിക്ഖിത്തം;

പുരിസാനം തതിയോ വഗ്ഗോ പവുച്ചതീതി.

ഭാണവാരം ചതുത്ഥം നിട്ഠിതം.