൧൦. സേരീസകവിമാനവത്ഥു

൧൨൨൮. [പേ. വ. ൬൦൪] സുണോഥ യക്ഖസ്സ ച വാണിജാന ച, സമാഗമോ യത്ഥ തദാ അഹോസി;

യഥാ കഥം ഇതരിതരേന ചാപി, സുഭാസിതം തഞ്ച സുണാഥ സബ്ബേ.

൧൨൨൯. ‘‘യോ സോ അഹു രാജാ പായാസി നാമ [നാമോ (സീ.)], ഭുമ്മാനം സഹബ്യഗതോ യസസ്സീ;

സോ മോദമാനോവ സകേ വിമാനേ, അമാനുസോ മാനുസേ അജ്ഝഭാസീതി.

൧൨൩൦. ‘‘വങ്കേ അരഞ്ഞേ അമനുസ്സട്ഠാനേ, കന്താരേ അപ്പോദകേ അപ്പഭക്ഖേ;

സുദുഗ്ഗമേ വണ്ണുപഥസ്സ മജ്ഝേ, വങ്കം ഭയാ [ധങ്കംഭയാ (ക.)] നട്ഠമനാ മനുസ്സാ.

൧൨൩൧. ‘‘നയിധ ഫലാ മൂലമയാ ച സന്തി, ഉപാദാനം നത്ഥി കുതോധ ഭക്ഖോ;

അഞ്ഞത്ര പംസൂഹി ച വാലുകാഹി ച, തതാഹി ഉണ്ഹാഹി ച ദാരുണാഹി ച.

൧൨൩൨. ‘‘ഉജ്ജങ്ഗലം തത്തമിവം കപാലം, അനായസം പരലോകേന തുല്യം;

ലുദ്ദാനമാവാസമിദം പുരാണം, ഭൂമിപ്പദേസോ അഭിസത്തരൂപോ.

൧൨൩൩. ‘‘അഥ തുമ്ഹേ കേന [കേന നു (സ്യാ. ക.)] വണ്ണേന, കിമാസമാനാ ഇമം പദേസം ഹി;

അനുപവിട്ഠാ സഹസാ സമേച്ച, ലോഭാ ഭയാ അഥ വാ സമ്പമൂള്ഹാ’’തി.

൧൨൩൪. ‘‘മഗധേസു അങ്ഗേസു ച സത്ഥവാഹാ, ആരോപയിത്വാ പണിയം പുഥുത്തം;

തേ യാമസേ സിന്ധുസോവീരഭൂമിം, ധനത്ഥികാ ഉദ്ദയം പത്ഥയാനാ.

൧൨൩൫. ‘‘ദിവാ പിപാസം നധിവാസയന്താ, യോഗ്ഗാനുകമ്പഞ്ച സമേക്ഖമാനാ,

ഏതേന വേഗേന ആയാമ സബ്ബേ [സബ്ബേ തേ (ക.)], രത്തിം മഗ്ഗം പടിപന്നാ വികാലേ.

൧൨൩൬. ‘‘തേ ദുപ്പയാതാ അപരദ്ധമഗ്ഗാ, അന്ധാകുലാ വിപ്പനട്ഠാ അരഞ്ഞേ;

സുദുഗ്ഗമേ വണ്ണുപഥസ്സ മജ്ഝേ, ദിസം ന ജാനാമ പമൂള്ഹചിത്താ.

൧൨൩൭. ‘‘ഇദഞ്ച ദിസ്വാന അദിട്ഠപുബ്ബം, വിമാനസേട്ഠഞ്ച തവഞ്ച യക്ഖ;

തതുത്തരിം ജീവിതമാസമാനാ, ദിസ്വാ പതീതാ സുമനാ ഉദഗ്ഗാ’’തി.

൧൨൩൮. ‘‘പാരം സമുദ്ദസ്സ ഇമഞ്ച വണ്ണും [വനം (സ്യാ.), വണ്ണം (ക.)], വേത്താചരം [വേത്തം പരം (സ്യാ.), വേത്താചാരം (ക.)] സങ്കുപഥഞ്ച മഗ്ഗം;

നദിയോ പന പബ്ബതാനഞ്ച ദുഗ്ഗാ, പുഥുദ്ദിസാ ഗച്ഛഥ ഭോഗഹേതു.

൧൨൩൯. ‘‘പക്ഖന്ദിയാന വിജിതം പരേസം, വേരജ്ജകേ മാനുസേ പേക്ഖമാനാ;

യം വോ സുതം വാ അഥ വാപി ദിട്ഠം, അച്ഛേരകം തം വോ സുണോമ താതാ’’തി.

൧൨൪൦. ‘‘ഇതോപി അച്ഛേരതരം കുമാര, ന തോ സുതം വാ അഥ വാപി ദിട്ഠം;

അതീതമാനുസ്സകമേവ സബ്ബം, ദിസ്വാന തപ്പാമ അനോമവണ്ണം.

൧൨൪൧. ‘‘വേഹായസം പോക്ഖരഞ്ഞോ സവന്തി, പഹൂതമല്യാ [പഹൂതമാല്യാ (സ്യാ.)] ബഹുപുണ്ഡരീകാ;

ദുമാ ചിമേ [ദുമാ ച തേ (സ്യാ. ക.)] നിച്ചഫലൂപപന്നാ, അതീവ ഗന്ധാ സുരഭിം പവായന്തി.

൧൨൪൨. ‘‘വേളൂരിയഥമ്ഭാ സതമുസ്സിതാസേ, സിലാപവാളസ്സ ച ആയതംസാ;

മസാരഗല്ലാ സഹലോഹിതങ്ഗാ, ഥമ്ഭാ ഇമേ ജോതിരസാമയാസേ.

൧൨൪൩. ‘‘സഹസ്സഥമ്ഭം അതുലാനുഭാവം, തേസൂപരി സാധുമിദം വിമാനം;

രതനന്തരം കഞ്ചനവേദിമിസ്സം, തപനീയപട്ടേഹി ച സാധുഛന്നം.

൧൨൪൪. ‘‘ജമ്ബോനദുത്തത്തമിദം സുമട്ഠോ, പാസാദസോപാണഫലൂപപന്നോ;

ദള്ഹോ ച വഗ്ഗു ച സുസങ്ഗതോ ച [വഗ്ഗു സുമുഖോ സുസങ്ഗതോ (സീ.)], അതീവ നിജ്ഝാനഖമോ മനുഞ്ഞോ.

൧൨൪൫. ‘‘രതനന്തരസ്മിം ബഹുഅന്നപാനം, പരിവാരിതോ അച്ഛരാസങ്ഗണേന;

മുരജആലമ്ബരതൂരിയഘുട്ഠോ, അഭിവന്ദിതോസി ഥുതിവന്ദനായ.

൧൨൪൬. ‘‘സോ മോദസി നാരിഗണപ്പബോധനോ, വിമാനപാസാദവരേ മനോരമേ;

അചിന്തിയോ സബ്ബഗുണൂപപന്നോ, രാജാ യഥാ വേസ്സവണോ നളിന്യാ [നളിഞ്ഞം (ക.)].

൧൨൪൭. ‘‘ദേവോ നു ആസി ഉദവാസി യക്ഖോ, ഉദാഹു ദേവിന്ദോ മനുസ്സഭൂതോ;

പുച്ഛന്തി തം വാണിജാ സത്ഥവാഹാ, ആചിക്ഖ കോ നാമ തുവംസി യക്ഖോ’’തി.

൧൨൪൮. ‘‘സേരീസകോ [സേരിസ്സകോ (സീ. സ്യാ.)] നാമ അഹമ്ഹി യക്ഖോ, കന്താരിയോ വണ്ണുപഥമ്ഹി ഗുത്തോ;

ഇമം പദേസം അഭിപാലയാമി, വചനകരോ വേസ്സവണസ്സ രഞ്ഞോ’’തി.

൧൨൪൯. ‘‘അധിച്ചലദ്ധം പരിണാമജം തേ, സയം കതം ഉദാഹു ദേവേഹി ദിന്നം;

പുച്ഛന്തി തം വാണിജാ സത്ഥവാഹാ, കഥം തയാ ലദ്ധമിദം മനുഞ്ഞ’’ന്തി.

൧൨൫൦. ‘‘നാധിച്ചലദ്ധം ന പരിണാമജം മേ, ന സയം കതം ന ഹി ദേവേഹി ദിന്നം;

സകേഹി കമ്മേഹി അപാപകേഹി, പുഞ്ഞേഹി മേ ലദ്ധമിദം മനുഞ്ഞ’’ന്തി.

൧൨൫൧. ‘‘കിം തേ വതം കിം പന ബ്രഹ്മചരിയം, കിസ്സ സുചിണ്ണസ്സ അയം വിപാകോ;

പുച്ഛന്തി തം വാണിജാ സത്ഥവാഹാ, കഥം തയാ ലദ്ധമിദം വിമാന’’ന്തി.

൧൨൫൨. ‘‘മമം പായാസീതി അഹു സമഞ്ഞാ, രജ്ജം യദാ കാരയിം കോസലാനം;

നത്ഥികദിട്ഠി കദരിയോ പാപധമ്മോ, ഉച്ഛേദവാദീ ച തദാ അഹോസിം.

൧൨൫൩. ‘‘സമണോ ച ഖോ ആസി കുമാരകസ്സപോ, ബഹുസ്സുതോ ചിത്തകഥീ ഉളാരോ;

സോ മേ തദാ ധമ്മകഥം അഭാസി [അകാസി (സീ.)], ദിട്ഠിവിസൂകാനി വിനോദയീ മേ.

൧൨൫൪. ‘‘താഹം തസ്സ [താഹം (ക.)] ധമ്മകഥം സുണിത്വാ, ഉപാസകത്തം പടിവേദയിസ്സം;

പാണാതിപാതാ വിരതോ അഹോസിം, ലോകേ അദിന്നം പരിവജ്ജയിസ്സം;

അമജ്ജപോ നോ ച മുസാ അഭാണിം, സകേന ദാരേന ച അഹോസി തുട്ഠോ.

൧൨൫൫. ‘‘തം മേ വതം തം പന ബ്രഹ്മചരിയം, തസ്സ സുചിണ്ണസ്സ അയം വിപാകോ;

തേഹേവ കമ്മേഹി അപാപകേഹി, പുഞ്ഞേഹി മേ ലദ്ധമിദം വിമാന’’ന്തി.

൧൨൫൬. ‘‘സച്ചം കിരാഹംസു നരാ സപഞ്ഞാ, അനഞ്ഞഥാ വചനം പണ്ഡിതാനം;

യഹിം യഹിം ഗച്ഛതി പുഞ്ഞകമ്മോ, തഹിം തഹിം മോദതി കാമകാമീ.

൧൨൫൭. ‘‘യഹിം യഹിം സോകപരിദ്ദവോ ച, വധോ ച ബന്ധോ ച പരിക്കിലേസോ;

തഹിം തഹിം ഗച്ഛതി പാപകമ്മോ, ന മുച്ചതി ദുഗ്ഗതിയാ കദാചീ’’തി.

൧൨൫൮. ‘‘സമ്മൂള്ഹരൂപോവ ജനോ അഹോസി, അസ്മിം മുഹുത്തേ കലലീകതോവ;

ജനസ്സിമസ്സ തുയ്ഹഞ്ച കുമാര, അപ്പച്ചയോ കേന നു ഖോ അഹോസീ’’തി.

൧൨൫൯. ‘‘ഇമേ ച സിരീസവനാ [ഇമേ സിരീസൂപവനാ ച (സീ.), ഇമേപി സിരീസവനാ ച (പീ. ക.)] താതാ, ദിബ്ബാ [ദിബ്ബാ ച (പീ. ക.)] ഗന്ധാ സുരഭീ [സുരഭിം (സീ. ക.)] സമ്പവന്തി [സമ്പവായന്തി (ക.)];

തേ സമ്പവായന്തി ഇമം വിമാനം, ദിവാ ച രത്തോ ച തമം നിഹന്ത്വാ.

൧൨൬൦. ‘‘ഇമേസഞ്ച ഖോ വസ്സസതച്ചയേന, സിപാടികാ ഫലതി ഏകമേകാ;

മാനുസ്സകം വസ്സസതം അതീതം, യദഗ്ഗേ കായമ്ഹി ഇധൂപപന്നോ.

൧൨൬൧. ‘‘ദിസ്വാനഹം വസ്സസതാനി പഞ്ച, അസ്മിം വിമാനേ ഠത്വാന താതാ;

ആയുക്ഖയാ പുഞ്ഞക്ഖയാ ചവിസ്സം, തേനേവ സോകേന പമുച്ഛിതോസ്മീ’’തി [സമുച്ഛിതോസ്മീതി (പീ. ക.)].

൧൨൬൨. ‘‘കഥം നു സോചേയ്യ തഥാവിധോ സോ, ലദ്ധാ വിമാനം അതുലം ചിരായ;

യേ ചാപി ഖോ ഇത്തരമുപപന്നാ, തേ നൂന സോചേയ്യും പരിത്തപുഞ്ഞാ’’തി.

൧൨൬൩. ‘‘അനുച്ഛവിം ഓവദിയഞ്ച മേ തം, യം മം തുമ്ഹേ പേയ്യവാചം വദേഥ;

തുമ്ഹേ ച ഖോ താതാ മയാനുഗുത്താ, യേനിച്ഛകം തേന പലേഥ സോത്ഥി’’ന്തി.

൧൨൬൪. ‘‘ഗന്ത്വാ മയം സിന്ധുസോവീരഭൂമിം, ധനത്ഥികാ ഉദ്ദയം പത്ഥയാനാ;

യഥാപയോഗാ പരിപുണ്ണചാഗാ, കാഹാമ സേരീസമഹം ഉളാര’’ന്തി.

൧൨൬൫. ‘‘മാ ചേവ സേരീസമഹം അകത്ഥ, സബ്ബഞ്ച വോ ഭവിസ്സതി യം വദേഥ;

പാപാനി കമ്മാനി വിവജ്ജയാഥ, ധമ്മാനുയോഗഞ്ച അധിട്ഠഹാഥ.

൧൨൬൬. ‘‘ഉപാസകോ അത്ഥി ഇമമ്ഹി സങ്ഘേ, ബഹുസ്സുതോ സീലവതൂപപന്നോ;

സദ്ധോ ച ചാഗീ ച സുപേസലോ ച, വിചക്ഖണോ സന്തുസിതോ മുതീമാ.

൧൨൬൭. ‘‘സഞ്ജാനമാനോ ന മുസാ ഭണേയ്യ, പരൂപഘാതായ ന ചേതയേയ്യ;

വേഭൂതികം പേസുണം നോ കരേയ്യ, സണ്ഹഞ്ച വാചം സഖിലം ഭണേയ്യ.

൧൨൬൮. ‘‘സഗാരവോ സപ്പടിസ്സോ വിനീതോ, അപാപകോ അധിസീലേ വിസുദ്ധോ;

സോ മാതരം പിതരഞ്ചാപി ജന്തു, ധമ്മേന പോസേതി അരിയവുത്തി.

൧൨൬൯. ‘‘മഞ്ഞേ സോ മാതാപിതൂനം കാരണാ, ഭോഗാനി പരിയേസതി ന അത്തഹേതു;

മാതാപിതൂനഞ്ച യോ [സോ (?)] അച്ചയേന, നേക്ഖമ്മപോണോ ചരിസ്സതി ബ്രഹ്മചരിയം.

൧൨൭൦. ‘‘ഉജൂ അവങ്കോ അസഠോ അമായോ, ന ലേസകപ്പേന ച വോഹരേയ്യ;

സോ താദിസോ സുകതകമ്മകാരീ, ധമ്മേ ഠിതോ കിന്തി ലഭേഥ ദുക്ഖം.

൧൨൭൧. ‘‘തം കാരണാ പാതുകതോമ്ഹി അത്തനാ, തസ്മാ ധമ്മം പസ്സഥ വാണിജാസേ;

അഞ്ഞത്ര തേനിഹ ഭസ്മീ [ഭസ്മി (സ്യാ.), ഭസ്മ (ക.)] ഭവേഥ, അന്ധാകുലാ വിപ്പനട്ഠാ അരഞ്ഞേ;

തം ഖിപ്പമാനേന ലഹും പരേന, സുഖോ ഹവേ സപ്പുരിസേന സങ്ഗമോ’’തി.

൧൨൭൨. ‘‘കിം നാമ സോ കിഞ്ച കരോതി കമ്മം,

കിം നാമധേയ്യം കിം പന തസ്സ ഗോത്തം;

മയമ്പി നം ദട്ഠുകാമമ്ഹ യക്ഖ, യസ്സാനുകമ്പായ ഇധാഗതോസി;

ലാഭാ ഹി തസ്സ, യസ്സ തുവം പിഹേസീ’’തി.

൧൨൭൩. ‘‘യോ കപ്പകോ സമ്ഭവനാമധേയ്യോ,

ഉപാസകോ കോച്ഛഫലൂപജീവീ;

ജാനാഥ നം തുമ്ഹാകം പേസിയോ സോ,

മാ ഖോ നം ഹീളിത്ഥ സുപേസലോ സോ’’തി.

൧൨൭൪. ‘‘ജാനാമസേ യം ത്വം പവദേസി [വദേസി (സീ.)] യക്ഖ,

ന ഖോ നം ജാനാമ സ ഏദിസോതി;

മയമ്പി നം പൂജയിസ്സാമ യക്ഖ,

സുത്വാന തുയ്ഹം വചനം ഉളാര’’ന്തി.

൧൨൭൫. ‘‘യേ കേചി ഇമസ്മിം സത്ഥേ മനുസ്സാ,

ദഹരാ മഹന്താ അഥവാപി മജ്ഝിമാ;

സബ്ബേവ തേ ആലമ്ബന്തു വിമാനം,

പസ്സന്തു പുഞ്ഞാനം ഫലം കദരിയാ’’തി.

൧൨൭൬. തേ തത്ഥ സബ്ബേവ ‘അഹം പുരേ’തി,

തം കപ്പകം തത്ഥ പുരക്ഖത്വാ [പുരക്ഖിപിത്വാ (സീ.)];

സബ്ബേവ തേ ആലമ്ബിംസു വിമാനം,

മസക്കസാരം വിയ വാസവസ്സ.

൧൨൭൭. തേ തത്ഥ സബ്ബേവ ‘അഹം പുരേ’തി, ഉപാസകത്തം പടിവേദയിംസു;

പാണാതിപാതാ വിരതാ അഹേസും, ലോകേ അദിന്നം പരിവജ്ജയിംസു;

അമജ്ജപാ നോ ച മുസാ ഭണിംസു, സകേന ദാരേന ച അഹേസും തുട്ഠാ.

൧൨൭൮. തേ തത്ഥ സബ്ബേവ ‘അഹം പുരേ’തി, ഉപാസകത്തം പടിവേദയിത്വാ;

പക്കാമി സത്ഥോ അനുമോദമാനോ, യക്ഖിദ്ധിയാ അനുമതോ പുനപ്പുനം.

൧൨൭൯. ‘‘ഗന്ത്വാന തേ സിന്ധുസോവീരഭൂമിം, ധനത്ഥികാ ഉദ്ദയം [ഉദയ (പീ. ക.)] പത്ഥയാനാ;

യഥാപയോഗാ പരിപുണ്ണലാഭാ, പച്ചാഗമും പാടലിപുത്തമക്ഖതം.

൧൨൮൦. ‘‘ഗന്ത്വാന തേ സങ്ഘരം സോത്ഥിവന്തോ,

പുത്തേഹി ദാരേഹി സമങ്ഗിഭൂതാ;

ആനന്ദീ വിത്താ [ആനന്ദചിത്താ (സ്യാ.), ആനന്ദീചിത്താ (ക.)] സുമനാ പതീതാ,

അകംസു സേരീസമഹം ഉളാരം;

സേരീസകം തേ പരിവേണം മാപയിംസു.

൧൨൮൧. ഏതാദിസാ സപ്പുരിസാന സേവനാ,

മഹത്ഥികാ ധമ്മഗുണാന സേവനാ;

ഏകസ്സ അത്ഥായ ഉപാസകസ്സ,

സബ്ബേവ സത്താ സുഖിതാ [സുഖിനോ (പീ. ക.)] അഹേസുന്തി.

സേരീസകവിമാനം ദസമം.