൧൪. മഹാരഥവിമാനവത്ഥു

൧൦൧൫. ‘‘സഹസ്സയുത്തം ഹയവാഹനം സുഭം, ആരുയ്ഹിമം സന്ദനം നേകചിത്തം;

ഉയ്യാനഭൂമിം അഭിതോ അനുക്കമം, പുരിന്ദദോ ഭൂതപതീവ വാസവോ.

൧൦൧൬. ‘‘സോവണ്ണമയാ തേ രഥകുബ്ബരാ ഉഭോ, ഫലേഹി [ഥലേഹി (സീ.)] അംസേഹി അതീവ സങ്ഗതാ;

സുജാതഗുമ്ബാ നരവീരനിട്ഠിതാ, വിരോചതീ പന്നരസേവ ചന്ദോ.

൧൦൧൭. ‘‘സുവണ്ണജാലാവതതോ രഥോ അയം, ബഹൂഹി നാനാരതനേഹി ചിത്തിതോ;

സുനന്ദിഘോസോ ച സുഭസ്സരോ ച, വിരോചതീ ചാമരഹത്ഥബാഹുഭി.

൧൦൧൮. ‘‘ഇമാ ച നാഭ്യോ മനസാഭിനിമ്മിതാ, രഥസ്സ പാദന്തരമജ്ഝഭൂസിതാ;

ഇമാ ച നാഭ്യോ സതരാജിചിത്തിതാ, സതേരതാ വിജ്ജുരിവപ്പഭാസരേ.

൧൦൧൯. ‘‘അനേകചിത്താവതതോ രഥോ അയം, പുഥൂ ച നേമീ ച സഹസ്സരംസികോ;

തേസം സരോ സുയ്യതി [സൂയതി (സീ.)] വഗ്ഗുരൂപോ, പഞ്ചങ്ഗികം തുരിയമിവപ്പവാദിതം.

൧൦൨൦. ‘‘സിരസ്മിം ചിത്തം മണിചന്ദകപ്പിതം, സദാ വിസുദ്ധം രുചിരം പഭസ്സരം;

സുവണ്ണരാജീഹി അതീവ സങ്ഗതം, വേളുരിയരാജീവ അതീവ സോഭതി.

൧൦൨൧. ‘‘ഇമേ ച വാളീ മണിചന്ദകപ്പിതാ, ആരോഹകമ്ബൂ സുജവാ ബ്രഹൂപമാ.

ബ്രഹാ മഹന്താ ബലിനോ മഹാജവാ, മനോ തവഞ്ഞായ തഥേവ സിംസരേ [സബ്ബരേ (ക.), സപ്പരേ (?)].

൧൦൨൨. ‘‘ഇമേ ച സബ്ബേ സഹിതാ ചതുക്കമാ, മനോ തവഞ്ഞായ തഥേവ സിംസരേ;

സമം വഹന്താ മുദുകാ അനുദ്ധതാ, ആമോദമാനാ തുരഗാന [തുരങ്ഗാന (ക.)] മുത്തമാ.

൧൦൨൩. ‘‘ധുനന്തി വഗ്ഗന്തി പതന്തി [പവത്തന്തി (പീ. ക.)] ചമ്ബരേ, അബ്ഭുദ്ധുനന്താ സുകതേ പിളന്ധനേ;

തേസം സരോ സുയ്യതി വഗ്ഗുരൂപോ, പഞ്ചങ്ഗികം തുരിയമിവപ്പവാദിതം.

൧൦൨൪. ‘‘രഥസ്സ ഘോസോ അപിളന്ധനാന ച, ഖുരസ്സ നാദോ [നാദീ (സ്യാ.), നാദി (പീ. ക.)] അഭിഹിംസനായ ച;

ഘോസോ സുവഗ്ഗൂ സമിതസ്സ സുയ്യതി, ഗന്ധബ്ബതൂരിയാനി വിചിത്രസംവനേ.

൧൦൨൫. ‘‘രഥേ ഠിതാ താ മിഗമന്ദലോചനാ, ആളാരപമ്ഹാ ഹസിതാ പിയംവദാ;

വേളുരിയജാലാവതതാ തനുച്ഛവാ, സദേവ ഗന്ധബ്ബസൂരഗ്ഗപൂജിതാ.

൧൦൨൬. ‘‘താ രത്തരത്തമ്ബരപീതവാസസാ, വിസാലനേത്താ അഭിരത്തലോചനാ;

കുലേ സുജാതാ സുതനൂ സുചിമ്ഹിതാ, രഥേ ഠിതാ പഞ്ജലികാ ഉപട്ഠിതാ.

൧൦൨൭. ‘‘താ കമ്ബുകേയൂരധരാ സുവാസസാ, സുമജ്ഝിമാ ഊരുഥനൂപപന്നാ;

വട്ടങ്ഗുലിയോ സുമുഖാ സുദസ്സനാ, രഥേ ഠിതാ പഞ്ജലികാ ഉപട്ഠിതാ.

൧൦൨൮. ‘‘അഞ്ഞാ സുവേണീ സുസു മിസ്സകേസിയോ, സമം വിഭത്താഹി പഭസ്സരാഹി ച;

അനുബ്ബതാ താ തവ മാനസേ രതാ, രഥേ ഠിതാ പഞ്ജലികാ ഉപട്ഠിതാ.

൧൦൨൯. ‘‘ആവേളിനിയോ പദുമുപ്പലച്ഛദാ, അലങ്കതാ ചന്ദനസാരവാസിതാ [വോസിതാ (സ്യാ.), ഭൂസിതാ (ക.)];

അനുബ്ബതാ താ തവ മാനസേ രതാ, രഥേ ഠിതാ പഞ്ജലികാ ഉപട്ഠിതാ.

൧൦൩൦. ‘‘താ മാലിനിയോ പദുമുപ്പലച്ഛദാ, അലങ്കതാ ചന്ദനസാരവാസിതാ;

അനുബ്ബതാ താ തവ മാനസേ രതാ, രഥേ ഠിതാ പഞ്ജലികാ ഉപട്ഠിതാ.

൧൦൩൧. ‘‘കണ്ഠേസു തേ യാനി പിളന്ധനാനി, ഹത്ഥേസു പാദേസു തഥേവ സീസേ;

ഓഭാസയന്തീ ദസ സബ്ബസോ ദിസാ, അബ്ഭുദ്ദയം സാരദികോവ ഭാണുമാ.

൧൦൩൨. ‘‘വാതസ്സ വേഗേന ച സമ്പകമ്പിതാ, ഭുജേസു മാലാ അപിളന്ധനാനി ച;

മുഞ്ചന്തി ഘോസം രൂചിരം സുചിം സുഭം, സബ്ബേഹി വിഞ്ഞൂഹി സുതബ്ബരൂപം.

൧൦൩൩. ‘‘ഉയ്യാനഭൂമ്യാ ച ദുവദ്ധതോ ഠിതാ, രഥാ ച നാഗാ തൂരിയാനി ച സരോ;

തമേവ ദേവിന്ദ പമോദയന്തി, വീണാ യഥാ പോക്ഖരപത്തബാഹുഭി.

൧൦൩൪. ‘‘ഇമാസു വീണാസു ബഹൂസു വഗ്ഗൂസു, മനുഞ്ഞരൂപാസു ഹദയേരിതം പീതിം [ഹദയേരിതം പതി (സീ.), ഹദയേരിതമ്പി തം (സ്യാ.)];

പവജ്ജമാനാസു അതീവ അച്ഛരാ, ഭമന്തി കഞ്ഞാ പദുമേസു സിക്ഖിതാ.

൧൦൩൫. ‘‘യദാ ച ഗീതാനി ച വാദിതാനി ച, നച്ചാനി ചിമാനി [ചേമാനി (സീ.)] സമേന്തി ഏകതോ;

അഥേത്ഥ നച്ചന്തി അഥേത്ഥ അച്ഛരാ, ഓഭാസയന്തീ ഉഭതോ വരിത്ഥിയോ.

൧൦൩൬. ‘‘സോ മോദസി തുരിയഗണപ്പബോധനോ, മഹീയമാനോ വജിരാവുധോരിവ;

ഇമാസു വീണാസു ബഹൂസു വഗ്ഗൂസു, മനുഞ്ഞരൂപാസു ഹദയേരിതം പീതിം.

൧൦൩൭. ‘‘കിം ത്വം പുരേ കമ്മമകാസി അത്തനാ, മനുസ്സഭൂതോ പുരിമായ ജാതിയാ;

ഉപോസഥം കം വാ [ഉപോസഥം കിം വ (സ്യാ.)] തുവം ഉപാവസി, കം [കിം (സ്യാ.)] ധമ്മചരിയം വതമാഭിരോചയി.

൧൦൩൮. ‘‘നയീദമപ്പസ്സ കതസ്സ [നയിദം അപ്പസ്സ കതസ്സ (സീ. സ്യാ.), സാസേദം അപ്പകതസ്സ (ക.)] കമ്മുനോ, പുബ്ബേ സുചിണ്ണസ്സ ഉപോസഥസ്സ വാ;

ഇദ്ധാനുഭാവോ വിപുലോ അയം തവ, യം ദേവസങ്ഘം അഭിരോചസേ ഭുസം.

൧൦൩൯. ‘‘ദാനസ്സ തേ ഇദം ഫലം, അഥോ സീലസ്സ വാ പന;

അഥോ അഞ്ജലികമ്മസ്സ, തം മേ അക്ഖാഹി പുച്ഛിതോ’’തി.

൧൦൪൦. സോ ദേവപുത്തോ അത്തമനോ, മോഗ്ഗല്ലാനേന പുച്ഛിതോ;

പഞ്ഹം പുട്ഠോ വിയാകാസി, യസ്സ കമ്മസ്സിദം ഫലന്തി.

൧൦൪൧. ‘‘ജിതിന്ദ്രിയം ബുദ്ധമനോമനിക്കമം, നരുത്തമം കസ്സപമഗ്ഗപുഗ്ഗലം;

അവാപുരന്തം അമതസ്സ ദ്വാരം, ദേവാതിദേവം സതപുഞ്ഞലക്ഖണം.

൧൦൪൨. ‘‘തമദ്ദസം കുഞ്ജരമോഘതിണ്ണം, സുവണ്ണസിങ്ഗീനദബിമ്ബസാദിസം;

ദിസ്വാന തം ഖിപ്പമഹും സുചീമനോ, തമേവ ദിസ്വാന സുഭാസിതദ്ധജം.

൧൦൪൩. ‘‘തമന്നപാനം അഥവാപി ചീവരം, സുചിം പണീതം രസസാ ഉപേതം;

പുപ്ഫാഭിക്കിണമ്ഹി സകേ നിവേസനേ, പതിട്ഠപേസിം സ അസങ്ഗമാനസോ.

൧൦൪൪. ‘‘തമന്നപാനേന ച ചീവരേന ച, ഖജ്ജേന ഭോജ്ജേന ച സായനേന ച;

സന്തപ്പയിത്വാ ദ്വിപദാനമുത്തമം, സോ സഗ്ഗസോ ദേവപുരേ രമാമഹം.

൧൦൪൫.

‘‘ഏതേനുപായേന ഇമം നിരഗ്ഗളം, യഞ്ഞം യജിത്വാ തിവിധം വിസുദ്ധം.

പഹായഹം മാനുസകം സമുസ്സയം, ഇന്ദൂപമോ [ഇന്ദസ്സമോ (സ്യാ. ക.)] ദേവപുരേ രമാമഹം.

൧൦൪൬. ‘‘ആയുഞ്ച വണ്ണഞ്ച സുഖം ബലഞ്ച, പണീതരൂപം അഭികങ്ഖതാ മുനി;

അന്നഞ്ച പാനഞ്ച ബഹും സുസങ്ഖതം, പതിട്ഠപേതബ്ബമസങ്ഗമാനസേ.

൧൦൪൭. [കഥാ. ൭൯൯]‘‘നയിമസ്മിം ലോകേ പരസ്മിം [നയിമസ്മിം വാ ലോകേ പരസ്മിം (കഥാവത്ഥു ൭൯൯), നയിമസ്മി ലോകേ വ പരസ്മി (?)] വാ പന, ബുദ്ധേന സേട്ഠോ വ സമോ വ വിജ്ജതി;

ആഹുനേയ്യാനം [യമാഹുനേയ്യാനം (ക.)] പരമാഹുതിം ഗതോ, പുഞ്ഞത്ഥികാനം വിപുലപ്ഫലേസിന’’ന്തി.

മഹാരഥവിമാനം ചുദ്ദസമം.

മഹാരഥവഗ്ഗോ പഞ്ചമോ നിട്ഠിതോ.

തസ്സുദ്ദാനം –

മണ്ഡൂകോ രേവതീ ഛത്തോ, കക്കടോ ദ്വാരപാലകോ;

ദ്വേ കരണീയാ ദ്വേ സൂചി, തയോ നാഗാ ച ദ്വേ രഥാ;

പുരിസാനം പഠമോ വഗ്ഗോ പവുച്ചതീതി.

ഭാണവാരം തതിയം നിട്ഠിതം.