൧൭. കേസകാരീവിമാനവത്ഥു

൧൫൦. ‘‘ഇദം വിമാനം രുചിരം പഭസ്സരം, വേളുരിയഥമ്ഭം സതതം സുനിമ്മിതം;

സുവണ്ണരുക്ഖേഹി സമന്തമോത്ഥതം, ഠാനം മമം കമ്മവിപാകസമ്ഭവം.

൧൫൧. ‘‘തത്രൂപപന്നാ പുരിമച്ഛരാ ഇമാ, സതം സഹസ്സാനി സകേന കമ്മുനാ;

തുവംസി അജ്ഝുപഗതാ യസസ്സിനീ, ഓഭാസയം തിട്ഠസി പുബ്ബദേവതാ.

൧൫൨. ‘‘സസീ അധിഗ്ഗയ്ഹ യഥാ വിരോചതി, നക്ഖത്തരാജാരിവ താരകാഗണം;

തഥേവ ത്വം അച്ഛരാസങ്ഗണം [അച്ഛരാസങ്ഗമം (സീ.)] ഇമം, ദദ്ദല്ലമാനാ യസസാ വിരോചസി.

൧൫൩. ‘‘കുതോ നു ആഗമ്മ അനോമദസ്സനേ, ഉപപന്നാ ത്വം ഭവനം മമം ഇദം;

ബ്രഹ്മംവ ദേവാ തിദസാ സഹിന്ദകാ, സബ്ബേ ന തപ്പാമസേ ദസ്സനേന ത’’ന്തി.

൧൫൪. ‘‘യമേതം സക്ക അനുപുച്ഛസേ മമം, ‘കുതോ ചുതാ ത്വം ഇധ ആഗതാ’തി [കുതോ ചുതാ ഇധ ആഗതാ തുവം (സ്യാ.), കുതോ ചുതായ ആഗതി തവ (പീ.)];

ബാരാണസീ നാമ പുരത്ഥി കാസിനം, തത്ഥ അഹോസിം പുരേ കേസകാരികാ.

൧൫൫. ‘‘ബുദ്ധേ ച ധമ്മേ ച പസന്നമാനസാ, സങ്ഘേ ച ഏകന്തഗതാ അസംസയാ;

അഖണ്ഡസിക്ഖാപദാ ആഗതപ്ഫലാ, സമ്ബോധിധമ്മേ നിയതാ അനാമയാ’’തി.

൧൫൬. ‘‘തന്ത്യാഭിനന്ദാമസേ സ്വാഗതഞ്ച [സാഗതഞ്ച (സീ.)] തേ, ധമ്മേന ച ത്വം യസസാ വിരോചസി;

ബുദ്ധേ ച ധമ്മേ ച പസന്നമാനസേ, സങ്ഘേ ച ഏകന്തഗതേ അസംസയേ;

അഖണ്ഡസിക്ഖാപദേ ആഗതപ്ഫലേ, സമ്ബോധിധമ്മേ നിയതേ അനാമയേ’’തി.

കേസകാരീവിമാനം സത്തരസമം.

പീഠവഗ്ഗോ പഠമോ നിട്ഠിതോ.

തസ്സുദ്ദാനം –

പഞ്ച പീഠാ തയോ നാവാ, ദീപതിലദക്ഖിണാ ദ്വേ;

പതി ദ്വേ സുണിസാ ഉത്തരാ, സിരിമാ കേസകാരികാ;

വഗ്ഗോ തേന പവുച്ചതീതി.