൧. വഡ്ഢമാതുഥേരീഗാഥാ

൨൦൪. ‘‘മാ സു തേ വഡ്ഢ ലോകമ്ഹി, വനഥോ ആഹു കുദാചനം;

മാ പുത്തക പുനപ്പുനം, അഹു ദുക്ഖസ്സ ഭാഗിമാ.

൨൦൫. ‘‘സുഖഞ്ഹി വഡ്ഢ മുനയോ, അനേജാ ഛിന്നസംസയാ;

സീതിഭൂതാ ദമപ്പത്താ, വിഹരന്തി അനാസവാ.

൨൦൬. ‘‘തേഹാനുചിണ്ണം ഇസീഭി, മഗ്ഗം ദസ്സനപത്തിയാ;

ദുക്ഖസ്സന്തകിരിയായ, ത്വം വഡ്ഢ അനുബ്രൂഹയ’’.

൨൦൭. ‘‘വിസാരദാവ ഭണസി, ഏതമത്ഥം ജനേത്തി മേ;

മഞ്ഞാമി നൂന മാമികേ, വനഥോ തേ ന വിജ്ജതി’’.

൨൦൮. ‘‘യേ കേചി വഡ്ഢ സങ്ഖാരാ, ഹീനാ ഉക്കട്ഠമജ്ഝിമാ;

അണൂപി അണുമത്തോപി, വനഥോ മേ ന വിജ്ജതി.

൨൦൯. ‘‘സബ്ബേ മേ ആസവാ ഖീണാ, അപ്പമത്തസ്സ ഝായതോ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം’’.

൨൧൦. ‘‘ഉളാരം വത മേ മാതാ, പതോദം സമവസ്സരി;

പരമത്ഥസഞ്ഹിതാ ഗാഥാ, യഥാപി അനുകമ്പികാ.

൨൧൧. ‘‘തസ്സാഹം വചനം സുത്വാ, അനുസിട്ഠിം ജനേത്തിയാ;

ധമ്മസംവേഗമാപാദിം, യോഗക്ഖേമസ്സ പത്തിയാ.

൨൧൨. ‘‘സോഹം പധാനപഹിതത്തോ, രത്തിന്ദിവമതന്ദിതോ;

മാതരാ ചോദിതോ സന്തോ, അഫുസിം സന്തിമുത്തമം’’.

… വഡ്ഢമാതാ ഥേരീ….

നവകനിപാതോ നിട്ഠിതോ.