൧. സീസൂപചാലാഥേരീഗാഥാ

൧൯൬. ‘‘ഭിക്ഖുനീ സീലസമ്പന്നാ, ഇന്ദ്രിയേസു സുസംവുതാ;

അധിഗച്ഛേ പദം സന്തം, അസേചനകമോജവം’’.

൧൯൭. ‘‘താവതിംസാ ച യാമാ ച, തുസിതാ ചാപി ദേവതാ;

നിമ്മാനരതിനോ ദേവാ, യേ ദേവാ വസവത്തിനോ;

തത്ഥ ചിത്തം പണീധേഹി, യത്ഥ തേ വുസിതം പുരേ’’.

൧൯൮. ‘‘താവതിംസാ ച യാമാ ച, തുസിതാ ചാപി ദേവതാ;

നിമ്മാനരതിനോ ദേവാ, യേ ദേവാ വസവത്തിനോ.

൧൯൯. ‘‘കാലം കാലം ഭവാഭവം, സക്കായസ്മിം പുരക്ഖതാ;

അവീതിവത്താ സക്കായം, ജാതിമരണസാരിനോ.

൨൦൦. ‘‘സബ്ബോ ആദീപിതോ ലോകോ, സബ്ബോ ലോകോ പദീപിതോ;

സബ്ബോ പജ്ജലിതോ ലോകോ, സബ്ബോ ലോകോ പകമ്പിതോ.

൨൦൧. ‘‘അകമ്പിയം അതുലിയം, അപുഥുജ്ജനസേവിതം;

ബുദ്ധോ ധമ്മമദേസേസി, തത്ഥ മേ നിരതോ മനോ.

൨൦൨. ‘‘തസ്സാഹം വചനം സുത്വാ, വിഹരിം സാസനേ രതാ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൨൦൩. ‘‘സബ്ബത്ഥ വിഹതാ നന്ദീ, തമോഖന്ധോ പദാലിതോ;

ഏവം ജാനാഹി പാപിമ, നിഹതോ ത്വമസി അന്തക’’.

… സീസൂപചാലാ ഥേരീ….

അട്ഠകനിപാതോ നിട്ഠിതോ.