൧. കിസാഗോതമീഥേരീഗാഥാ

൨൧൩. ‘‘കല്യാണമിത്തതാ മുനിനാ, ലോകം ആദിസ്സ വണ്ണിതാ;

കല്യാണമിത്തേ ഭജമാനോ, അപി ബാലോ പണ്ഡിതോ അസ്സ.

൨൧൪. ‘‘ഭജിതബ്ബാ സപ്പുരിസാ, പഞ്ഞാ തഥാ വഡ്ഢതി ഭജന്താനം;

ഭജമാനോ സപ്പുരിസേ, സബ്ബേഹിപി ദുക്ഖേഹി പമുച്ചേയ്യ.

൨൧൫. ‘‘ദുക്ഖഞ്ച വിജാനേയ്യ, ദുക്ഖസ്സ ച സമുദയം നിരോധം;

അട്ഠങ്ഗികഞ്ച മഗ്ഗം, ചത്താരിപി അരിയസച്ചാനി.

൨൧൬. ‘‘ദുക്ഖോ ഇത്ഥിഭാവോ, അക്ഖാതോ പുരിസദമ്മസാരഥിനാ;

സപത്തികമ്പി ഹി ദുക്ഖം, അപ്പേകച്ചാ സകിം വിജാതായോ.

൨൧൭. ‘‘ഗലകേ അപി കന്തന്തി, സുഖുമാലിനിയോ വിസാനി ഖാദന്തി;

ജനമാരകമജ്ഝഗതാ, ഉഭോപി ബ്യസനാനി അനുഭോന്തി.

൨൧൮. ‘‘ഉപവിജഞ്ഞാ ഗച്ഛന്തീ, അദ്ദസാഹം പതിം മതം;

പന്ഥമ്ഹി വിജായിത്വാന, അപ്പത്താവ സകം ഘരം.

൨൧൯. ‘‘ദ്വേ പുത്താ കാലകതാ, പതീ ച പന്ഥേ മതോ കപണികായ;

മാതാ പിതാ ച ഭാതാ, ഡയ്ഹന്തി ച ഏകചിതകായം.

൨൨൦. ‘‘ഖീണകുലീനേ കപണേ, അനുഭൂതം തേ ദുഖം അപരിമാണം;

അസ്സൂ ച തേ പവത്തം, ബഹൂനി ച ജാതിസഹസ്സാനി.

൨൨൧. ‘‘വസിതാ സുസാനമജ്ഝേ, അഥോപി ഖാദിതാനി പുത്തമംസാനി;

ഹതകുലികാ സബ്ബഗരഹിതാ, മതപതികാ അമതമധിഗച്ഛിം.

൨൨൨. ‘‘ഭാവിതോ മേ മഗ്ഗോ, അരിയോ അട്ഠങ്ഗികോ അമതഗാമീ;

നിബ്ബാനം സച്ഛികതം, ധമ്മാദാസം അവേക്ഖിംഹം [അപേക്ഖിഹം (സീ.)].

൨൨൩. ‘‘അഹമമ്ഹി കന്തസല്ലാ, ഓഹിതഭാരാ കതഞ്ഹി കരണീയം;

കിസാ ഗോതമീ ഥേരീ, വിമുത്തചിത്താ ഇമം ഭണീ’’തി.

… കിസാ ഗോതമീ ഥേരീ….

ഏകാദസനിപാതോ നിട്ഠിതോ.