൯. അമ്ബപാലിഥേരീഅപദാനം

൨൦൪. ‘‘യോ രംസിഫുസിതാവേളോ, ഫുസ്സോ നാമ മഹാമുനി;

തസ്സാഹം ഭഗിനീ ആസിം, അജായിം ഖത്തിയേ കുലേ.

൨൦൫. ‘‘തസ്സ ധമ്മം സുണിത്വാഹം, വിപ്പസന്നേന ചേതസാ;

മഹാദാനം ദദിത്വാന, പത്ഥയിം രൂപസമ്പദം.

൨൦൬. ‘‘ഏകതിംസേ ഇതോ കപ്പേ, സിഖീ ലോകഗ്ഗനായകോ;

ഉപ്പന്നോ ലോകപജ്ജോതോ, തിലോകസരണോ ജിനോ.

൨൦൭. ‘‘തദാരുണപുരേ രമ്മേ, ബ്രാഹ്മഞ്ഞകുലസമ്ഭവാ;

വിമുത്തചിത്തം കുപിതാ, ഭിക്ഖുനിം അഭിസാപയിം.

൨൦൮. ‘‘വേസികാവ അനാചാരാ, ജിനസാസനദൂസികാ;

ഏവം അക്കോസയിത്വാന, തേന പാപേന കമ്മുനാ.

൨൦൯. ‘‘ദാരുണം നിരയം ഗന്ത്വാ, മഹാദുക്ഖസമപ്പിതാ;

തതോ ചുതാ മനുസ്സേസു, ഉപപന്നാ തപസ്സിനീ.

൨൧൦. ‘‘ദസജാതിസഹസ്സാനി, ഗണികത്തമകാരയിം;

തമ്ഹാ പാപാ ന മുച്ചിസ്സം, ഭുത്വാ ദുട്ഠവിസം യഥാ.

൨൧൧. ‘‘ബ്രഹ്മചരിയമസേവിസ്സം [ബ്രഹ്മവേസമസേവിസ്സം (സ്യാ.), ബ്രഹ്മചേരമസേവിസ്സം (പീ.)], കസ്സപേ ജിനസാസനേ;

തേന കമ്മവിപാകേന, അജായിം തിദസേ പുരേ.

൨൧൨. ‘‘പച്ഛിമേ ഭവേ സമ്പത്തേ, അഹോസിം ഓപപാതികാ;

അമ്ബസാഖന്തരേ ജാതാ, അമ്ബപാലീതി തേനഹം.

൨൧൩. ‘‘പരിവുതാ പാണകോടീഹി, പബ്ബജിം ജിനസാസനേ;

പത്താഹം അചലം ഠാനം, ധീതാ ബുദ്ധസ്സ ഓരസാ.

൨൧൪. ‘‘ഇദ്ധീസു ച വസീ ഹോമി, സോതധാതുവിസുദ്ധിയാ;

ചേതോപരിയഞാണസ്സ, വസീ ഹോമി മഹാമുനേ.

൨൧൫. ‘‘പുബ്ബേനിവാസം ജാനാമി, ദിബ്ബചക്ഖു വിസോധിതം;

സബ്ബാസവപരിക്ഖീണാ, നത്ഥി ദാനി പുനബ്ഭവോ.

൨൧൬. ‘‘അത്ഥധമ്മനിരുത്തീസു, പടിഭാനേ തഥേവ ച;

ഞാണം മേ വിമലം സുദ്ധം, ബുദ്ധസേട്ഠസ്സ വാഹസാ.

൨൧൭. ‘‘കിലേസാ ഝാപിതാ മയ്ഹം…പേ… വിഹരാമി അനാസവാ.

൨൧൮. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം അമ്ബപാലി ഭിക്ഖുനീ ഇമാ ഗാഥായോ

അഭാസിത്ഥാതി.

അമ്ബപാലിഥേരിയാപദാനം നവമം.