൫. സുക്കാഥേരീഅപദാനം

൧൧൧. ‘‘ഏകനവുതിതോ കപ്പേ, വിപസ്സീ നാമ നായകോ;

ഉപ്പജ്ജി ചാരുദസ്സനോ, സബ്ബധമ്മവിപസ്സകോ.

൧൧൨. ‘‘തദാഹം ബന്ധുമതിയം, ജാതാ അഞ്ഞതരേ കുലേ;

ധമ്മം സുത്വാന മുനിനോ, പബ്ബജിം അനഗാരിയം.

൧൧൩. ‘‘ബഹുസ്സുതാ ധമ്മധരാ, പടിഭാനവതീ തഥാ;

വിചിത്തകഥികാ ചാപി, ജിനസാസനകാരികാ.

൧൧൪. ‘‘തദാ ധമ്മകഥം കത്വാ, ഹിതായ ജനതം ബഹും [ജനതായ ഹിതം ബഹും (സീ.) … സദാ (സ്യാ.), ഹിതായ ജനസംസരിം (പീ.)];

തതോ ചുതാഹം തുസിതം, ഉപപന്നാ യസസ്സിനീ.

൧൧൫. ‘‘ഏകതിംസേ ഇതോ കപ്പേ, സിഖീ വിയ സിഖീ ജിനോ;

തപന്തോ യസസാ ലോകേ [ലോകം (സ്യാ. പീ.)], ഉപ്പജ്ജി വദതം വരോ.

൧൧൬. ‘‘തദാപി പബ്ബജിത്വാന, ബുദ്ധസാസനകോവിദാ;

ജോതേത്വാ ജിനവാക്യാനി, തതോപി തിദിവം ഗതാ.

൧൧൭. ‘‘ഏകതിംസേവ കപ്പമ്ഹി, വേസ്സഭൂ നാമ നായകോ;

ഉപ്പജ്ജിത്ഥ മഹാഞാണീ, തദാപി ച തഥേവഹം.

൧൧൮. ‘‘പബ്ബജിത്വാ ധമ്മധരാ, ജോതയിം ജിനസാസനം;

ഗന്ത്വാ മരുപുരം രമ്മം, അനുഭോസിം മഹാസുഖം.

൧൧൯. ‘‘ഇമമ്ഹി ഭദ്ദകേ കപ്പേ, കകുസന്ധോ ജിനുത്തമോ;

ഉപ്പജ്ജി നരസരണോ [നരസദ്ദൂലോ (സീ. സ്യാ. പീ.)], തദാപി ച തഥേവഹം.

൧൨൦. ‘‘പബ്ബജിത്വാ മുനിമതം, ജോതയിത്വാ യഥായുകം;

തതോ ചുതാഹം തിദിവം, അഗം സഭവനം യഥാ.

൧൨൧. ‘‘ഇമസ്മിംയേവ കപ്പമ്ഹി, കോണാഗമനനായകോ;

ഉപ്പജ്ജി ലോകസരണോ, അരണോ അമതങ്ഗതോ [വദതം വരോ, സബ്ബസത്താനമുത്തമോ (സ്യാ.)].

൧൨൨. ‘‘തദാപി പബ്ബജിത്വാന, സാസനേ തസ്സ താദിനോ;

ബഹുസ്സുതാ ധമ്മധരാ, ജോതയിം ജിനസാസനം.

൧൨൩. ‘‘ഇമസ്മിംയേവ കപ്പമ്ഹി, കസ്സപോ മുനിമുത്തമോ;

ഉപ്പജ്ജി ലോകസരണോ, അരണോ മരണന്തഗൂ.

൧൨൪. ‘‘തസ്സാപി നരവീരസ്സ, പബ്ബജിത്വാന സാസനേ;

പരിയാപുടസദ്ധമ്മാ, പരിപുച്ഛാവിസാരദാ.

൧൨൫. ‘‘സുസീലാ ലജ്ജിനീ ചേവ, തീസു സിക്ഖാസു കോവിദാ;

ബഹും ധമ്മകഥം കത്വാ, യാവജീവം മഹാമുനേ.

൧൨൬. ‘‘തേന കമ്മവിപാകേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൧൨൭. ‘‘പച്ഛിമേ ച ഭവേ ദാനി, ഗിരിബ്ബജപുരുത്തമേ;

ജാതാ സേട്ഠികുലേ ഫീതേ, മഹാരതനസഞ്ചയേ.

൧൨൮. ‘‘യദാ ഭിക്ഖുസഹസ്സേന, പരിവുതോ ലോകനായകോ;

ഉപാഗമി രാജഗഹം, സഹസ്സക്ഖേന വണ്ണിതോ.

൧൨൯. ‘‘‘ദന്തോ ദന്തേഹി സഹ പുരാണജടിലേഹി, വിപ്പമുത്തോ വിപ്പമുത്തേഹി;

സിങ്ഗീനിക്ഖസവണ്ണോ, രാജഗഹം പാവിസി ഭഗവാ’.

൧൩൦. ‘‘ദിസ്വാ ബുദ്ധാനുഭാവം തം, സുത്വാവ ഗുണസഞ്ചയം;

ബുദ്ധേ ചിത്തം പസാദേത്വാ, പൂജയിം തം യഥാബലം.

൧൩൧. ‘‘അപരേന ച കാലേന, ധമ്മദിന്നായ സന്തികേ;

അഗാരാ നിക്ഖമിത്വാന, പബ്ബജിം അനഗാരിയം.

൧൩൨. ‘‘കേസേസു ഛിജ്ജമാനേസു, കിലേസേ ഝാപയിം അഹം;

ഉഗ്ഗഹിം സാസനം സബ്ബം, പബ്ബജിത്വാചിരേനഹം.

൧൩൩. ‘‘തതോ ധമ്മമദേസേസിം, മഹാജനസമാഗമേ;

ധമ്മേ ദേസിയമാനമ്ഹി, ധമ്മാഭിസമയോ അഹു.

൧൩൪. ‘‘നേകപാണസഹസ്സാനം, തം വിദിത്വാതിവിമ്ഹിതോ;

അഭിപ്പസന്നോ മേ യക്ഖോ, ഭമിത്വാന ഗിരിബ്ബജം.

൧൩൫. ‘‘കിം മേ കതാ രാജഗഹേ മനുസ്സാ, മധും പീതാവ അച്ഛരേ;

യേ സുക്കം ന ഉപാസന്തി, ദേസേന്തിം അമതം പദം.

൧൩൬. ‘‘തഞ്ച അപ്പടിവാനീയം, അസേചനകമോജവം;

പിവന്തി മഞ്ഞേ സപ്പഞ്ഞാ, വലാഹകമിവദ്ധഗൂ.

൧൩൭. ‘‘ഇദ്ധീസു ച വസീ ഹോമി, ദിബ്ബായ സോതധാതുയാ;

ചേതോപരിയഞാണസ്സ, വസീ ഹോമി മഹാമുനേ.

൧൩൮. ‘‘പുബ്ബേനിവാസം ജാനാമി, ദിബ്ബചക്ഖു വിസോധിതം;

സബ്ബാസവപരിക്ഖീണാ, നത്ഥി ദാനി പുനബ്ഭവോ.

൧൩൯. ‘‘അത്ഥധമ്മനിരുത്തീസു, പടിഭാനേ തഥേവ ച;

ഞാണം മമ മഹാവീര, ഉപ്പന്നം തവ സന്തികേ.

൧൪൦. ‘‘കിലേസാ ഝാപിതാ മയ്ഹം…പേ… വിഹരാമി അനാസവാ.

൧൪൧. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൧൪൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം സുക്കാ ഭിക്ഖുനീ ഇമാ ഗാഥായോ അഭാസിത്ഥാതി.

സുക്കാഥേരിയാപദാനം പഞ്ചമം.

പഞ്ചമം ഭാണവാരം.