൧൦. യസോധരാപമുഖഅട്ഠാരസഭിക്ഖുനീസഹസ്സഅപദാനം

൪൨൬. ‘‘അട്ഠാരസസഹസ്സാനി, ഭിക്ഖുനീ സക്യസമ്ഭവാ;

യസോധരാപമുഖാനി, സമ്ബുദ്ധം ഉപസങ്കമും.

൪൨൭. ‘‘അട്ഠാരസസഹസ്സാനി, സബ്ബാ ഹോന്തി മഹിദ്ധികാ;

വന്ദന്തീ മുനിനോ പാദേ, ആരോചേന്തി യഥാബലം.

൪൨൮. ‘‘‘ജാതി ഖീണാ ജരാ ബ്യാധി, മരണഞ്ച മഹാമുനി;

അനാസവം പദം സന്തം, അമതം യാമ നായക.

൪൨൯. ‘‘‘ഖലിതഞ്ചേ പുരേ അത്ഥി, സബ്ബാസമ്പി മഹാമുനി;

അപരാധമജാനന്തീ, ഖമ അമ്ഹം വിനായക.

൪൩൦. ‘‘‘ഇദ്ധിഞ്ചാപി നിദസ്സേഥ, മമ സാസനകാരികാ;

പരിസാനഞ്ച സബ്ബാസം, കങ്ഖം ഛിന്ദഥ യാവതാ.

൪൩൧. ‘‘‘യസോധരാ മഹാവീര, മനാപാ പിയദസ്സനാ;

സബ്ബാ തുയ്ഹം മഹാവീര, അഗാരസ്മിം പജാപതി.

൪൩൨. ‘‘‘ഥീനം സതസഹസ്സാനം, നവുതീനം ഛദുത്തരി;

അഗാരേ തേ മയം വീര, പാമോക്ഖാ സബ്ബാ ഇസ്സരാ.

൪൩൩. ‘‘‘രൂപാചാരഗുണൂപേതാ, യോബ്ബനട്ഠാ പിയംവദാ;

സബ്ബാ നോ അപചായന്തി, ദേവതാ വിയ മാനുസാ.

൪൩൪. ‘‘‘അട്ഠാരസസഹസ്സാനി, സബ്ബാ സാകിയസമ്ഭവാ;

യസോധരാസഹസ്സാനി, പാമോക്ഖാ ഇസ്സരാ തദാ.

൪൩൫. ‘‘‘കാമധാതുമതിക്കമ്മ, സണ്ഠിതാ രൂപധാതുയാ;

രൂപേന സദിസാ നത്ഥി, സഹസ്സാനം മഹാമുനി.

൪൩൬. ‘‘‘സമ്ബുദ്ധം അഭിവാദേത്വാ, ഇദ്ധിം ദസ്സംസു സത്ഥുനോ;

നേകാ നാനാവിധാകാരാ, മഹാഇദ്ധീപി ദസ്സയും.

൪൩൭. ‘‘‘ചക്കവാളസമം കായം, സീസം ഉത്തരതോ കുരു;

ഉഭോ പക്ഖാ ദുവേ ദീപാ, ജമ്ബുദീപം സരീരതോ.

൪൩൮. ‘‘‘ദക്ഖിണഞ്ച സരം പിഞ്ഛം, നാനാസാഖാ തു പത്തകാ;

ചന്ദഞ്ച സൂരിയഞ്ചക്ഖി, മേരുപബ്ബതതോ സിഖം.

൪൩൯. ‘‘‘ചക്കവാളഗിരിം തുണ്ഡം, ജമ്ബുരുക്ഖം സമൂലകം;

ബീജമാനാ ഉപാഗന്ത്വാ, വന്ദന്തീ ലോകനായകം.

൪൪൦. ‘‘‘ഹത്ഥിവണ്ണം തഥേവസ്സം, പബ്ബതം ജലധിം തഥാ;

ചന്ദഞ്ച സൂരിയം മേരും, സക്കവണ്ണഞ്ച ദസ്സയും.

൪൪൧. ‘‘‘യസോധരാ മയം വീര, പാദേ വന്ദാമ ചക്ഖുമ;

തവ ചിരപഭാവേന, നിപ്ഫന്നാ നരനായക.

൪൪൨. ‘‘‘ഇദ്ധീസു ച വസീ ഹോമ, ദിബ്ബായ സോതധാതുയാ;

ചേതോപരിയഞാണസ്സ, വസീ ഹോമ മഹാമുനേ.

൪൪൩. ‘‘‘പുബ്ബേനിവാസം ജാനാമ, ദിബ്ബചക്ഖു വിസോധിതം;

സബ്ബാസവപരിക്ഖീണാ, നത്ഥി ദാനി പുനബ്ഭവോ.

൪൪൪. ‘‘‘അത്ഥധമ്മനിരുത്തീസു, പടിഭാനേ തഥേവ ച;

ഞാണം അമ്ഹം മഹാവീര, ഉപ്പന്നം തവ സന്തികേ.

൪൪൫. ‘‘‘പുബ്ബാനം ലോകനാഥാനം, സങ്ഗമം നോ നിദസ്സിതം;

അധികാരാ ബഹൂ അമ്ഹം, തുയ്ഹത്ഥായ മഹാമുനേ.

൪൪൬. ‘‘‘യം അമ്ഹം പൂരിതം കമ്മം, കുസലം സരസേ മുനേ;

തുയ്ഹത്ഥായ മഹാവീര, പുഞ്ഞാനുപചിതാനി നോ.

൪൪൭. ‘‘‘അഭബ്ബട്ഠാനേ വജ്ജേത്വാ, വാരയിമ്ഹ അനാചരം;

തുയ്ഹത്ഥായ മഹാവീര, ചത്താനി ജീവിതാനി നോ [സഞ്ചത്തം ജീവിതമ്പി നോ (സ്യാ.)].

൪൪൮. ‘‘‘നേകകോടിസഹസ്സാനി, ഭരിയത്ഥായദാസി നോ;

ന തത്ഥ വിമനാ ഹോമ, തുയ്ഹത്ഥായ മഹാമുനേ.

൪൪൯. ‘‘‘നേകകോടിസഹസ്സാനി, ഉപകാരായദാസി നോ;

ന തത്ഥ വിമനാ ഹോമ, തുയ്ഹത്ഥായ മഹാമുനേ.

൪൫൦. ‘‘‘നേകകോടിസഹസ്സാനി, ഭോജനത്ഥായദാസി നോ;

ന തത്ഥ വിമനാ ഹോമ, തുയ്ഹത്ഥായ മഹാമുനേ.

൪൫൧. ‘‘‘നേകകോടിസഹസ്സാനി, ജീവിതാനി ചജിമ്ഹസേ [ചജിമ്ഹ നോ (പീ. ക.)];

ഭയമോക്ഖം കരിസ്സാമ, ജീവിതാനി ചജിമ്ഹസേ.

൪൫൨. ‘‘‘അങ്ഗഗതേ അലങ്കാരേ, വത്ഥേ നാനാവിധേ ബഹൂ;

ഇത്ഥിഭണ്ഡേ ന ഗൂഹാമ, തുയ്ഹത്ഥായ മഹാമുനേ.

൪൫൩. ‘‘‘ധനധഞ്ഞപരിച്ചാഗം, ഗാമാനി നിഗമാനി ച;

ഖേത്തം പുത്താ ച ധീതാ ച, പരിച്ചത്താ മഹാമുനേ.

൪൫൪. ‘‘‘ഹത്ഥീ അസ്സാ ഗവാ ചാപി, ദാസിയോ പരിചാരികാ;

തുയ്ഹത്ഥായ മഹാവീര, പരിച്ചത്തം അസങ്ഖിയം.

൪൫൫. ‘‘‘യം അമ്ഹേ പടിമന്തേസി, ദാനം ദസ്സാമ യാചകേ;

വിമനം നോ ന പസ്സാമ, ദദതോ ദാനമുത്തമം.

൪൫൬. ‘‘‘നാനാവിധം ബഹും ദുക്ഖം, സംസാരേ ച ബഹുബ്ബിധേ;

തുയ്ഹത്ഥായ മഹാവീര, അനുഭുത്തം അസങ്ഖിയം.

൪൫൭. ‘‘‘സുഖപ്പത്താനുമോദാമ, ന ച ദുക്ഖേസു ദുമ്മനാ;

സബ്ബത്ഥ തുലിതാ ഹോമ, തുയ്ഹത്ഥായ മഹാമുനേ.

൪൫൮. ‘‘‘അനുമഗ്ഗേന സമ്ബുദ്ധോ, യം ധമ്മം അഭിനീഹരി;

അനുഭോത്വാ സുഖം ദുക്ഖം, പത്തോ ബോധിം മഹാമുനേ.

൪൫൯. ‘‘‘ബ്രഹ്മദേവഞ്ച സമ്ബുദ്ധം, ഗോതമം ലോകനായകം;

അഞ്ഞേസം ലോകനാഥാനം, സങ്ഗമം തേഹി നോ ബഹൂ.

൪൬൦. ‘‘‘അധികാരം ബഹും അമ്ഹേ, തുയ്ഹത്ഥായ മഹാമുനേ;

ഗവേസതോ ബുദ്ധധമ്മേ, മയം തേ പരിചാരികാ.

൪൬൧. ‘‘‘കപ്പേ ച സതസഹസ്സേ, ചതുരോ ച അസങ്ഖിയേ;

ദീപങ്കരോ മഹാവീരോ, ഉപ്പജ്ജി ലോകനായകോ.

൪൬൨. ‘‘‘പച്ചന്തദേസവിസയേ, നിമന്തേത്വാ തഥാഗതം;

തസ്സ ആഗമനം മഗ്ഗം, സോധേന്തി തുട്ഠമാനസാ.

൪൬൩. ‘‘‘തേന കാലേന സോ ആസി, സുമേധോ നാമ ബ്രാഹ്മണോ;

മഗ്ഗഞ്ച പടിയാദേസി, ആയതോ സബ്ബദസ്സിനോ.

൪൬൪. ‘‘‘തേന കാലേന അഹുമ്ഹ, സബ്ബാ ബ്രാഹ്മണസമ്ഭവാ;

ഥലൂദജാനി പുപ്ഫാനി, ആഹരിമ്ഹ സമാഗമം.

൪൬൫. ‘‘‘തസ്മിം സോ സമയേ ബുദ്ധോ, ദീപങ്കരോ മഹായസോ;

വിയാകാസി മഹാവീരോ, ഇസിമുഗ്ഗതമാനസം.

൪൬൬. ‘‘‘ചലതീ രവതീ പുഥവീ, സങ്കമ്പതി സദേവകേ;

തസ്സ കമ്മം പകിത്തേന്തേ, ഇസിമുഗ്ഗതമാനസം.

൪൬൭. ‘‘‘ദേവകഞ്ഞാ മനുസ്സാ ച, മയഞ്ചാപി സദേവകാ;

നാനാപൂജനീയം ഭണ്ഡം, പൂജയിത്വാന പത്ഥയും.

൪൬൮. ‘‘‘തേസം ബുദ്ധോ വിയാകാസി, ജോതിദീപ സനാമകോ;

അജ്ജ യേ പത്ഥിതാ അത്ഥി, തേ ഭവിസ്സന്തി സമ്മുഖാ.

൪൬൯. ‘‘‘അപരിമേയ്യേ ഇതോ കപ്പേ, യം നോ ബുദ്ധോ വിയാകരി;

തം വാചമനുമോദേന്താ, ഏവംകാരീ അഹുമ്ഹ നോ.

൪൭൦. ‘‘‘തസ്സ കമ്മസ്സ സുകതസ്സ, തസ്സ ചിത്തം പസാദയും;

ദേവമാനുസികം യോനിം, അനുഭോത്വാ അസങ്ഖിയം.

൪൭൧. ‘‘‘സുഖദുക്ഖേനുഭോത്വാന, ദേവേസു മാനുസേസു ച;

പച്ഛിമേ ഭവേ സമ്പത്തേ, ജാതാമ്ഹ സാകിയേ കുലേ.

൪൭൨. ‘‘‘രൂപവതീ ഭോഗവതീ, യസസീലവതീ തതോ;

സബ്ബങ്ഗസമ്പദാ ഹോമ, കുലേസു അഭിസക്കതാ.

൪൭൩. ‘‘‘ലാഭം സിലോകം സക്കാരം, ലോകധമ്മസമാഗമം;

ചിത്തഞ്ച ദുക്ഖിതം നത്ഥി, വസാമ അകുതോഭയാ.

൪൭൪. ‘‘‘വുത്തഞ്ഹേതം ഭഗവതാ, രഞ്ഞോ അന്തേപുരേ തദാ;

ഖത്തിയാനം പുരേ വീര [താസം (സ്യാ.)], ഉപകാരഞ്ച നിദ്ദിസി.

൪൭൫. ‘‘‘ഉപകാരാ ച യാ നാരീ, യാ ച നാരീ സുഖേ ദുഖേ;

അത്ഥക്ഖായീ ച യാ നാരീ, യാ ച നാരീനുകമ്പികാ.

൪൭൬. ‘‘‘ധമ്മം ചരേ സുചരിതം, ന നം ദുച്ചരിതം ചരേ;

ധമ്മചാരീ സുഖം സേതി, അസ്മിം ലോകേ പരമ്ഹി ച.

൪൭൭. ‘‘‘അഗാരം വിജഹിത്വാന, പബ്ബജിമ്ഹനഗാരിയം;

അഡ്ഢമാസേ അസമ്പത്തേ, ചതുസച്ചം ഫുസിമ്ഹ നോ.

൪൭൮. ‘‘‘ചീവരം പിണ്ഡപാതഞ്ച, പച്ചയം സയനാസനം;

ഉപനേന്തി ബഹൂ അമ്ഹേ, സാഗരസ്സേവ ഊമിയോ.

൪൭൯. ‘‘‘കിലേസാ ഝാപിതാ അമ്ഹം [മയ്ഹം (സ്യാ.), അമ്ഹാകം (ക.)], ഭവാ സബ്ബേ സമൂഹതാ;

നാഗീവ ബന്ധനം ഛേത്വാ, വിഹരാമ അനാസവാ.

൪൮൦. ‘‘‘സ്വാഗതം വത നോ ആസി, മമ ബുദ്ധസ്സ സന്തികേ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൪൮൧. ‘‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’.

൪൮൨. ‘‘ഏവം ബഹുവിധം ദുക്ഖം, സമ്പത്തീ ച ബഹുബ്ബിധാ;

വിസുദ്ധഭാവം സമ്പത്താ, ലഭാമ സബ്ബസമ്പദാ.

൪൮൩. ‘‘യാ ദദന്തി സകത്താനം, പുഞ്ഞത്ഥായ മഹേസിനോ;

സഹായസമ്പദാ ഹോന്തി, നിബ്ബാനപദമസങ്ഖതം.

൪൮൪. ‘‘പരിക്ഖീണം അതീതഞ്ച, പച്ചുപ്പന്നം അനാഗതം;

സബ്ബകമ്മമ്പി നോ ഖീണം, പാദേ വന്ദാമ ചക്ഖുമ.

൪൮൫. ‘‘നിബ്ബാനായ വദന്തീനം, കിം വോ വക്ഖാമ ഉത്തരി;

സന്തസങ്ഖതദോസഞ്ഹി, പപ്പോഥ [സന്തസങ്ഖതദോസോ യോ, പജ്ജോതം (സ്യാ. പീ. ക.)] അമതം പദം’’.

ഇത്ഥം സുദം യസോധരാപമുഖാനി അട്ഠാരസഭിക്ഖുനീസഹസ്സാനി ഭഗവതോ സമ്മുഖാ ഇമാ ഗാഥായോ അഭാസിത്ഥാതി.

യസോധരാപമുഖഅട്ഠാരസഭിക്ഖുനീസഹസ്സാപദാനം ദസമം.

കുണ്ഡലകേസീവഗ്ഗോ തതിയോ.