൧൧. ജതുകണ്ണിമാണവപുച്ഛാ

൧൧൦൨. ‘‘സുത്വാനഹം വീരമകാമകാമിം, (ഇച്ചായസ്മാ ജതുകണ്ണി)

ഓഘാതിഗം പുട്ഠുമകാമമാഗമം;

സന്തിപദം ബ്രൂഹി സഹജനേത്ത, യഥാതച്ഛം ഭഗവാ ബ്രൂഹി മേ തം.

൧൧൦൩. ‘‘ഭഗവാ ഹി കാമേ അഭിഭുയ്യ ഇരിയതി, ആദിച്ചോവ പഥവിം തേജീ തേജസാ;

പരിത്തപഞ്ഞസ്സ മേ ഭൂരിപഞ്ഞ, ആചിക്ഖ ധമ്മം യമഹം വിജഞ്ഞം;

ജാതിജരായ ഇധ വിപ്പഹാനം’’.

൧൧൦൪. ‘‘കാമേസു വിനയ ഗേധം, (ജതുകണ്ണീതി ഭഗവാ) നേക്ഖമ്മം ദട്ഠു ഖേമതോ;

ഉഗ്ഗഹീതം നിരത്തം വാ, മാ തേ വിജ്ജിത്ഥ കിഞ്ചനം.

൧൧൦൫. ‘‘യം പുബ്ബേ തം വിസോസേഹി, പച്ഛാ തേ മാഹു കിഞ്ചനം;

മജ്ഝേ ചേ നോ ഗഹേസ്സസി, ഉപസന്തോ ചരിസ്സസി.

൧൧൦൬. ‘‘സബ്ബസോ നാമരൂപസ്മിം, വീതഗേധസ്സ ബ്രാഹ്മണ;

ആസവാസ്സ ന വിജ്ജന്തി, യേഹി മച്ചുവസം വജേ’’തി.

ജതുകണ്ണിമാണവപുച്ഛാ ഏകാദസമാ നിട്ഠിതാ.