൫. പരമട്ഠകസുത്തം

൮൦൨. പരമന്തി ദിട്ഠീസു പരിബ്ബസാനോ, യദുത്തരി കുരുതേ ജന്തു ലോകേ;

ഹീനാതി അഞ്ഞേ തതോ സബ്ബമാഹ, തസ്മാ വിവാദാനി അവീതിവത്തോ.

൮൦൩. യദത്തനീ പസ്സതി ആനിസംസം, ദിട്ഠേ സുതേ സീലവതേ [സീലബ്ബതേ (സ്യാ.)] മുതേ വാ;

തദേവ സോ തത്ഥ സമുഗ്ഗഹായ, നിഹീനതോ പസ്സതി സബ്ബമഞ്ഞം.

൮൦൪. തം വാപി ഗന്ഥം കുസലാ വദന്തി, യം നിസ്സിതോ പസ്സതി ഹീനമഞ്ഞം;

തസ്മാ ഹി ദിട്ഠം വ സുതം മുതം വാ, സീലബ്ബതം ഭിക്ഖു ന നിസ്സയേയ്യ.

൮൦൫. ദിട്ഠിമ്പി ലോകസ്മിം ന കപ്പയേയ്യ, ഞാണേന വാ സീലവതേന വാപി;

സമോതി അത്താനമനൂപനേയ്യ, ഹീനോ ന മഞ്ഞേഥ വിസേസി വാപി.

൮൦൬. അത്തം പഹായ അനുപാദിയാനോ, ഞാണേപി സോ നിസ്സയം നോ കരോതി;

സ വേ വിയത്തേസു [വിയുത്തേസു (സീ. അട്ഠ.), ദ്വിയത്തേസു (ക.)] ന വഗ്ഗസാരീ, ദിട്ഠിമ്പി [ദിട്ഠിമപി (ക.)] സോ ന പച്ചേതി കിഞ്ചി.

൮൦൭. യസ്സൂഭയന്തേ പണിധീധ നത്ഥി, ഭവാഭവായ ഇധ വാ ഹുരം വാ;

നിവേസനാ തസ്സ ന സന്തി കേചി, ധമ്മേസു നിച്ഛേയ്യ സമുഗ്ഗഹീതം.

൮൦൮. തസ്സീധ ദിട്ഠേ വ സുതേ മുതേ വാ, പകപ്പിതാ നത്ഥി അണൂപി സഞ്ഞാ;

തം ബ്രാഹ്മണം ദിട്ഠിമനാദിയാനം, കേനീധ ലോകസ്മിം വികപ്പയേയ്യ.

൮൦൯. ന കപ്പയന്തി ന പുരേക്ഖരോന്തി, ധമ്മാപി തേസം ന പടിച്ഛിതാസേ;

ന ബ്രാഹ്മണോ സീലവതേന നേയ്യോ, പാരങ്ഗതോ ന പച്ചേതി താദീതി.

പരമട്ഠകസുത്തം പഞ്ചമം നിട്ഠിതം.