൧൨. ചൂളബ്യൂഹസുത്തം [ചൂളവിയൂഹസുത്തം (സീ. സ്യാ. നിദ്ദേസ)]

൮൮൪. സകംസകംദിട്ഠിപരിബ്ബസാനാ, വിഗ്ഗയ്ഹ നാനാ കുസലാ വദന്തി;

യോ ഏവം ജാനാതി സ വേദി ധമ്മം, ഇദം പടിക്കോസമകേവലീ സോ.

൮൮൫. ഏവമ്പി വിഗ്ഗയ്ഹ വിവാദയന്തി, ബാലോ പരോ അക്കുസലോതി [അകുസലോതി (സീ. സ്യാ. പീ.)] ചാഹു;

സച്ചോ നു വാദോ കതമോ ഇമേസം, സബ്ബേവ ഹീമേ കുസലാ വദാനാ.

൮൮൬. പരസ്സ ചേ ധമ്മമനാനുജാനം, ബാലോമകോ [ബാലോ മഗോ (സീ. സ്യാ. ക.)] ഹോതി നിഹീനപഞ്ഞോ;

സബ്ബേവ ബാലാ സുനിഹീനപഞ്ഞാ, സബ്ബേവിമേ ദിട്ഠിപരിബ്ബസാനാ.

൮൮൭. സന്ദിട്ഠിയാ ചേവ ന വീവദാതാ, സംസുദ്ധപഞ്ഞാ കുസലാ മുതീമാ;

ന തേസം കോചി പരിഹീനപഞ്ഞോ [കോചിപി നിഹീനപഞ്ഞോ (സീ. സ്യാ. ക.)], ദിട്ഠീ ഹി തേസമ്പി തഥാ സമത്താ.

൮൮൮. ന വാഹമേതം തഥിയന്തി [തഥിവന്തി (സ്യാ. ക.)] ബ്രൂമി, യമാഹു ബാലാ മിഥു അഞ്ഞമഞ്ഞം;

സകംസകംദിട്ഠിമകംസു സച്ചം, തസ്മാ ഹി ബാലോതി പരം ദഹന്തി.

൮൮൯. യമാഹു സച്ചം തഥിയന്തി ഏകേ, തമാഹു അഞ്ഞേ [അഞ്ഞേപി (സ്യാ.), അഞ്ഞേ ച (?)] തുച്ഛം മുസാതി;

ഏവമ്പി വിഗയ്ഹ വിവാദയന്തി, കസ്മാ ന ഏകം സമണാ വദന്തി.

൮൯൦. ഏകഞ്ഹി സച്ചം ന ദുതീയമത്ഥി, യസ്മിം പജാ നോ വിവദേ പജാനം;

നാനാ തേ [നാനാതോ (ക.)] സച്ചാനി സയം ഥുനന്തി, തസ്മാ ന ഏകം സമണാ വദന്തി.

൮൯൧. കസ്മാ നു സച്ചാനി വദന്തി നാനാ, പവാദിയാസേ കുസലാ വദാനാ;

സച്ചാനി സുതാനി ബഹൂനി നാനാ, ഉദാഹു തേ തക്കമനുസ്സരന്തി.

൮൯൨. ന ഹേവ സച്ചാനി ബഹൂനി നാനാ, അഞ്ഞത്ര സഞ്ഞായ നിച്ചാനി ലോകേ;

തക്കഞ്ച ദിട്ഠീസു പകപ്പയിത്വാ, സച്ചം മുസാതി ദ്വയധമ്മമാഹു.

൮൯൩. ദിട്ഠേ സുതേ സീലവതേ മുതേ വാ, ഏതേ ച നിസ്സായ വിമാനദസ്സീ;

വിനിച്ഛയേ ഠത്വാ പഹസ്സമാനോ, ബാലോ പരോ അക്കുസലോതി ചാഹ.

൮൯൪. യേനേവ ബാലോതി പരം ദഹാതി, തേനാതുമാനം കുസലോതി ചാഹ;

സയമത്തനാ സോ കുസലോ വദാനോ, അഞ്ഞം വിമാനേതി തദേവ പാവ.

൮൯൫. അതിസാരദിട്ഠിയാവ സോ സമത്തോ, മാനേന മത്തോ പരിപുണ്ണമാനീ;

സയമേവ സാമം മനസാഭിസിത്തോ, ദിട്ഠീ ഹി സാ തസ്സ തഥാ സമത്താ.

൮൯൬. പരസ്സ ചേ ഹി വചസാ നിഹീനോ, തുമോ സഹാ ഹോതി നിഹീനപഞ്ഞോ;

അഥ ചേ സയം വേദഗൂ ഹോതി ധീരോ, ന കോചി ബാലോ സമണേസു അത്ഥി.

൮൯൭. അഞ്ഞം ഇതോ യാഭിവദന്തി ധമ്മം, അപരദ്ധാ സുദ്ധിമകേവലീ തേ [സുദ്ധിമകേവലീനോ (സീ.)];

ഏവമ്പി തിത്ഥ്യാ പുഥുസോ വദന്തി, സന്ദിട്ഠിരാഗേന ഹി തേഭിരത്താ [ത്യാഭിരത്താ (സ്യാ. ക.)].

൮൯൮. ഇധേവ സുദ്ധി ഇതി വാദയന്തി, നാഞ്ഞേസു ധമ്മേസു വിസുദ്ധിമാഹു;

ഏവമ്പി തിത്ഥ്യാ പുഥുസോ നിവിട്ഠാ, സകായനേ തത്ഥ ദള്ഹം വദാനാ.

൮൯൯. സകായനേ വാപി ദള്ഹം വദാനോ, കമേത്ഥ ബാലോതി പരം ദഹേയ്യ;

സയമേവ സോ മേധഗമാവഹേയ്യ [മേധകം ആവഹേയ്യ (സീ. പീ.)], പരം വദം ബാലമസുദ്ധിധമ്മം.

൯൦൦. വിനിച്ഛയേ ഠത്വാ സയം പമായ, ഉദ്ധം സ [ഉദ്ദം സോ (സീ. സ്യാ. പീ.)] ലോകസ്മിം വിവാദമേതി;

ഹിത്വാന സബ്ബാനി വിനിച്ഛയാനി, ന മേധഗം കുബ്ബതി ജന്തു ലോകേതി.

ചൂളബ്യൂഹസുത്തം ദ്വാദസമം നിട്ഠിതം.