൬. സഭിയസുത്തം

ഏവം മേ സുതം – ഏകം സമയം ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന സഭിയസ്സ പരിബ്ബാജകസ്സ പുരാണസാലോഹിതായ ദേവതായ പഞ്ഹാ ഉദ്ദിട്ഠാ ഹോന്തി – ‘‘യോ തേ, സഭിയ, സമണോ വാ ബ്രാഹ്മണോ വാ ഇമേ പഞ്ഹേ പുട്ഠോ ബ്യാകരോതി തസ്സ സന്തികേ ബ്രഹ്മചരിയം ചരേയ്യാസീ’’തി.

അഥ ഖോ സഭിയോ പരിബ്ബാജകോ തസ്സാ ദേവതായ സന്തികേ തേ പഞ്ഹേ ഉഗ്ഗഹേത്വാ യേ തേ സമണബ്രാഹ്മണാ സങ്ഘിനോ ഗണിനോ ഗണാചരിയാ ഞാതാ യസസ്സിനോ തിത്ഥകരാ സാധുസമ്മതാ ബഹുജനസ്സ, സേയ്യഥിദം – പൂരണോ കസ്സപോ മക്ഖലിഗോസാലോ അജിതോ കേസകമ്ബലോ പകുധോ [കകുധോ (സീ.) പകുദ്ധോ (സ്യാ. കം.)] കച്ചാനോ സഞ്ചയോ [സഞ്ജയോ (സീ. സ്യാ. കം. പീ.)] ബേലട്ഠപുത്തോ [ബേല്ലട്ഠിപുത്തോ (സീ. പീ.), വേളട്ഠപുത്തോ (സ്യാ.)] നിഗണ്ഠോ നാടപുത്തോ [നാതപുത്തോ (സീ. പീ.)], തേ ഉപസങ്കമിത്വാ തേ പഞ്ഹേ പുച്ഛതി. തേ സഭിയേന പരിബ്ബാജകേന പഞ്ഹേ പുട്ഠാ ന സമ്പായന്തി; അസമ്പായന്താ കോപഞ്ച ദോസഞ്ച അപ്പച്ചയഞ്ച പാതുകരോന്തി. അപി ച സഭിയം യേവ പരിബ്ബാജകം പടിപുച്ഛന്തി.

അഥ ഖോ സഭിയസ്സ പരിബ്ബാജകസ്സ ഏതദഹോസി – ‘‘യേ ഖോ തേ ഭോന്തോ സമണബ്രാഹ്മണാ സങ്ഘിനോ ഗണിനോ ഗണാചരിയാ ഞാതാ യസസ്സിനോ തിത്ഥകരാ സാധുസമ്മതാ ബഹുജനസ്സ, സേയ്യഥിദം – പൂരണോ കസ്സപോ…പേ… നിഗണ്ഠോ നാടപുത്തോ, തേ മയാ പഞ്ഹേ പുട്ഠാ ന സമ്പായന്തി, അസമ്പായന്താ കോപഞ്ച ദോസഞ്ച അപ്പച്ചയഞ്ച പാതുകരോന്തി; അപി ച മഞ്ഞേവേത്ഥ പടിപുച്ഛന്തി. യന്നൂന്നാഹം ഹീനായാവത്തിത്വാ കാമേ പരിഭുഞ്ജേയ്യ’’ന്തി.

അഥ ഖോ സഭിയസ്സ പരിബ്ബാജകസ്സ ഏതദഹോസി – ‘‘അയമ്പി ഖോ സമണോ ഗോതമോ സങ്ഘീ ചേവ ഗണീ ച ഗണാചരിയോ ച ഞാതോ യസസ്സീ തിത്ഥകരോ സാധുസമ്മതോ ബഹുജനസ്സ; യംനൂനാഹം സമണം ഗോതമം ഉപസങ്കമിത്വാ ഇമേ പഞ്ഹേ പുച്ഛേയ്യ’’ന്തി.

അഥ ഖോ സഭിയസ്സ പരിബ്ബാജകസ്സ ഏതദഹോസി – ‘‘യേപി ഖോ തേ [യേ ഖോ തേ (സ്യാ.), യം ഖോ തേ (ക.)] ഭോന്തോ സമണബ്രാഹ്മണാ ജിണ്ണാ വുഡ്ഢാ മഹല്ലകാ അദ്ധഗതാ വയോഅനുപ്പത്താ ഥേരാ രത്തഞ്ഞൂ ചിരപബ്ബജിതാ സങ്ഘിനോ ഗണിനോ ഗണാചരിയാ ഞാതാ യസസ്സിനോ തിത്ഥകരാ സാധുസമ്മതാ ബഹുജനസ്സ, സേയ്യഥിദം – പൂരണോ കസ്സപോ…പേ. … നിഗണ്ഠോ നാടപുത്തോ, തേപി മയാ പഞ്ഹേ പുട്ഠാ ന സമ്പായന്തി, അസമ്പായന്താ കോപഞ്ച ദോസഞ്ച അപ്പച്ചയഞ്ച പാതുകരോന്തി, അപി ച മഞ്ഞേവേത്ഥ പടിപുച്ഛന്തി; കിം പന മേ സമണോ ഗോതമോ ഇമേ പഞ്ഹേ പുട്ഠോ ബ്യാകരിസ്സതി! സമണോ ഹി ഗോതമോ ദഹരോ ചേവ ജാതിയാ, നവോ ച പബ്ബജ്ജായാ’’തി.

അഥ ഖോ സഭിയസ്സ പരിബ്ബാജകസ്സ ഏതദഹോസി – ‘‘സമണോ ഖോ [സമണോ ഖോ ഗോതമോ (സ്യാ. ക.)] ദഹരോതി ന ഉഞ്ഞാതബ്ബോ ന പരിഭോതബ്ബോ. ദഹരോപി ചേസ സമണോ ഗോതമോ മഹിദ്ധികോ ഹോതി മഹാനുഭാവോ, യംനൂനാഹം സമണം ഗോതമം ഉപസങ്കമിത്വാ ഇമേ പഞ്ഹേ പുച്ഛേയ്യ’’ന്തി.

അഥ ഖോ സഭിയോ പരിബ്ബാജകോ യേന രാജഗഹം തേന ചാരികം പക്കാമി. അനുപുബ്ബേന ചാരികം ചരമാനോ യേന രാജഗഹം വേളുവനം കലന്ദകനിവാപോ, യേന ഭഗവാ തേനുപസങ്കമി; ഉപസങ്കമിത്വാ ഭഗവതാ സദ്ധിം സമ്മോദി. സമ്മോദനീയം കഥം സാരണീയം വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ സഭിയോ പരിബ്ബാജകോ ഭഗവന്തം ഗാഥായ അജ്ഝഭാസി –

൫൧൫. ‘‘കങ്ഖീ വേചികിച്ഛീ ആഗമം, (ഇതി സഭിയോ)

പഞ്ഹേ പുച്ഛിതും അഭികങ്ഖമാനോ;

തേസന്തകരോ ഭവാഹി [ഭവാഹി മേ (പീ. ക.)] പഞ്ഹേ മേ പുട്ഠോ,

അനുപുബ്ബം അനുധമ്മം ബ്യാകരോഹി മേ’’.

൫൧൬. ‘‘ദൂരതോ ആഗതോസി സഭിയ, (ഇതി ഭഗവാ)

പഞ്ഹേ പുച്ഛിതും അഭികങ്ഖമാനോ;

തേസന്തകരോ ഭവാമി [തേസമന്തകരോമി തേ (ക.)] പഞ്ഹേ തേ പുട്ഠോ,

അനുപുബ്ബം അനുധമ്മം ബ്യാകരോമി തേ.

൫൧൭. ‘‘പുച്ഛ മം സഭിയ പഞ്ഹം, യം കിഞ്ചി മനസിച്ഛസി;

തസ്സ തസ്സേവ പഞ്ഹസ്സ, അഹം അന്തം കരോമി തേ’’തി.

അഥ ഖോ സഭിയസ്സ പരിബ്ബാജകസ്സ ഏതദഹോസി – ‘‘അച്ഛരിയം വത, ഭോ, അബ്ഭുതം വത, ഭോ! യം വതാഹം അഞ്ഞേസു സമണബ്രാഹ്മണേസു ഓകാസകമ്മമത്തമ്പി [ഓകാസമത്തമ്പി (സീ. പീ.)] നാലത്ഥം തം മേ ഇദം സമണേന ഗോതമേന ഓകാസകമ്മം കത’’ന്തി. അത്തമനോ പമുദിതോ ഉദഗ്ഗോ പീതിസോമനസ്സജാതോ ഭഗവന്തം പഞ്ഹം അപുച്ഛി –

൫൧൮. ‘‘കിം പത്തിനമാഹു ഭിക്ഖുനം, (ഇതി സഭിയോ)

സോരതം കേന കഥഞ്ച ദന്തമാഹു;

ബുദ്ധോതി കഥം പവുച്ചതി,

പുട്ഠോ മേ ഭഗവാ ബ്യാകരോഹി’’.

൫൧൯. ‘‘പജ്ജേന കതേന അത്തനാ, (സഭിയാതി ഭഗവാ)

പരിനിബ്ബാനഗതോ വിതിണ്ണകങ്ഖോ;

വിഭവഞ്ച ഭവഞ്ച വിപ്പഹായ,

വുസിതവാ ഖീണപുനബ്ഭവോ സ ഭിക്ഖു.

൫൨൦. ‘‘സബ്ബത്ഥ ഉപേക്ഖകോ സതിമാ, ന സോ ഹിംസതി കഞ്ചി സബ്ബലോകേ;

തിണ്ണോ സമണോ അനാവിലോ, ഉസ്സദാ യസ്സ ന സന്തി സോരതോ സോ.

൫൨൧. ‘‘യസ്സിന്ദ്രിയാനി ഭാവിതാനി, അജ്ഝത്തം ബഹിദ്ധാ ച സബ്ബലോകേ;

നിബ്ബിജ്ഝ ഇമം പരഞ്ച ലോകം, കാലം കങ്ഖതി ഭാവിതോ സ ദന്തോ.

൫൨൨. ‘‘കപ്പാനി വിചേയ്യ കേവലാനി, സംസാരം ദുഭയം ചുതൂപപാതം;

വിഗതരജമനങ്ഗണം വിസുദ്ധം, പത്തം ജാതിഖയം തമാഹു ബുദ്ധ’’ന്തി.

അഥ ഖോ സഭിയോ പരിബ്ബാജകോ ഭഗവതോ ഭാസിതം അഭിനന്ദിത്വാ അനുമോദിത്വാ അത്തമനോ പമുദിതോ ഉദഗ്ഗോ പീതിസോമനസ്സജാതോ ഭഗവന്തം ഉത്തരിം [ഉത്തരി (ക.)] പഞ്ഹം അപുച്ഛി –

൫൨൩. ‘‘കിം പത്തിനമാഹു ബ്രാഹ്മണം, (ഇതി സഭിയോ)

സമണം കേന കഥഞ്ച ന്ഹാതകോതി;

നാഗോതി കഥം പവുച്ചതി,

പുട്ഠോ മേ ഭഗവാ ബ്യാകരോഹി’’.

൫൨൪. ‘‘ബാഹിത്വാ സബ്ബപാപകാനി, (സഭിയാതി ഭഗവാ)

വിമലോ സാധുസമാഹിതോ ഠിതത്തോ;

സംസാരമതിച്ച കേവലീ സോ,

അസിതോ താദി പവുച്ചതേ സ ബ്രഹ്മാ.

൫൨൫. ‘‘സമിതാവി പഹായ പുഞ്ഞപാപം, വിരജോ ഞത്വാ ഇമം പരഞ്ച ലോകം;

ജാതിമരണം ഉപാതിവത്തോ, സമണോ താദി പവുച്ചതേ തഥത്താ.

൫൨൬. ‘‘നിന്ഹായ [നിനഹായ (സ്യാ.)] സബ്ബപാപകാനി, അജ്ഝത്തം ബഹിദ്ധാ ച സബ്ബലോകേ;

ദേവമനുസ്സേസു കപ്പിയേസു, കപ്പം നേതി തമാഹു ന്ഹാതകോ’’തി.

൫൨൭. ‘‘ആഗും ന കരോതി കിഞ്ചി ലോകേ, സബ്ബസംയോഗേ [സബ്ബയോഗേ (ക.)] വിസജ്ജ ബന്ധനാനി;

സബ്ബത്ഥ ന സജ്ജതീ വിമുത്തോ, നാഗോ താദി പവുച്ചതേ തഥത്താ’’തി.

അഥ ഖോ സഭിയോ പരിബ്ബാജകോ…പേ… ഭഗവന്തം ഉത്തരിം പഞ്ഹം അപുച്ഛി –

൫൨൮. ‘‘കം ഖേത്തജിനം വദന്തി ബുദ്ധാ, (ഇതി സഭിയോ)

കുസലം കേന കഥഞ്ച പണ്ഡിതോതി;

മുനി നാമ കഥം പവുച്ചതി,

പുട്ഠോ മേ ഭഗവാ ബ്യാകരോഹി’’.

൫൨൯. ‘‘ഖേത്താനി വിചേയ്യ കേവലാനി, (സഭിയാതി ഭഗവാ)

ദിബ്ബം മാനുസകഞ്ച ബ്രഹ്മഖേത്തം;

സബ്ബഖേത്തമൂലബന്ധനാ പമുത്തോ,

ഖേത്തജിനോ താദി പവുച്ചതേ തഥത്താ.

൫൩൦. ‘‘കോസാനി വിചേയ്യ കേവലാനി, ദിബ്ബം മാനുസകഞ്ച ബ്രഹ്മകോസം;

സബ്ബകോസമൂലബന്ധനാ പമുത്തോ, കുസലോ താദി പവുച്ചതേ തഥത്താ.

൫൩൧. ‘‘ദുഭയാനി വിചേയ്യ പണ്ഡരാനി, അജ്ഝത്തം ബഹിദ്ധാ ച സുദ്ധിപഞ്ഞോ;

കണ്ഹം സുക്കം ഉപാതിവത്തോ, പണ്ഡിതോ താദി പവുച്ചതേ തഥത്താ.

൫൩൨. ‘‘അസതഞ്ച സതഞ്ച ഞത്വാ ധമ്മം, അജ്ഝത്തം ബഹിദ്ധാ ച സബ്ബലോകേ;

ദേവമനുസ്സേഹി പൂജനീയോ, സങ്ഗം ജാലമതിച്ച സോ മുനീ’’തി.

അഥ ഖോ സഭിയോ പരിബ്ബാജകോ…പേ… ഭഗവന്തം ഉത്തരിം പഞ്ഹം അപുച്ഛി –

൫൩൩. ‘‘കിം പത്തിനമാഹു വേദഗും, (ഇതി സഭിയോ)

അനുവിദിതം കേന കഥഞ്ച വീരിയവാതി;

ആജാനിയോ കിന്തി നാമ ഹോതി,

പുട്ഠോ മേ ഭഗവാ ബ്യാകരോഹി’’.

൫൩൪. ‘‘വേദാനി വിചേയ്യ കേവലാനി, (സഭിയാതി ഭഗവാ)

സമണാനം യാനിധത്ഥി [യാനിപത്ഥി (സീ. സ്യാ. പീ.)] ബ്രാഹ്മണാനം;

സബ്ബവേദനാസു വീതരാഗോ,

സബ്ബം വേദമതിച്ച വേദഗൂ സോ.

൫൩൫. ‘‘അനുവിച്ച പപഞ്ചനാമരൂപം, അജ്ഝത്തം ബഹിദ്ധാ ച രോഗമൂലം;

സബ്ബരോഗമൂലബന്ധനാ പമുത്തോ, അനുവിദിതോ താദി പവുച്ചതേ തഥത്താ.

൫൩൬. ‘‘വിരതോ ഇധ സബ്ബപാപകേഹി, നിരയദുക്ഖം അതിച്ച വീരിയവാ സോ;

സോ വീരിയവാ പധാനവാ, ധീരോ താദി പവുച്ചതേ തഥത്താ.

൫൩൭. ‘‘യസ്സസ്സു ലുനാനി ബന്ധനാനി, അജ്ഝത്തം ബഹിദ്ധാ ച സങ്ഗമൂലം;

സബ്ബസങ്ഗമൂലബന്ധനാ പമുത്തോ, ആജാനിയോ താദി പവുച്ചതേ തഥത്താ’’തി.

അഥ ഖോ സഭിയോ പരിബ്ബാജകോ…പേ… ഭഗവന്തം ഉത്തരിം പഞ്ഹം അപുച്ഛി –

൫൩൮. ‘‘കിം പത്തിനമാഹു സോത്തിയം, (ഇതി സഭിയോ)

അരിയം കേന കഥഞ്ച ചരണവാതി;

പരിബ്ബാജകോ കിന്തി നാമ ഹോതി,

പുട്ഠോ മേ ഭഗവാ ബ്യാകരോഹി’’.

൫൩൯. ‘‘സുത്വാ സബ്ബധമ്മം അഭിഞ്ഞായ ലോകേ, (സഭിയാതി ഭഗവാ)

സാവജ്ജാനവജ്ജം യദത്ഥി കിഞ്ചി;

അഭിഭും അകഥംകഥിം വിമുത്തം,

അനിഘം സബ്ബധിമാഹു സോത്തിയോതി.

൫൪൦. ‘‘ഛേത്വാ ആസവാനി ആലയാനി, വിദ്വാ സോ ന ഉപേതി ഗബ്ഭസേയ്യം;

സഞ്ഞം തിവിധം പനുജ്ജ പങ്കം, കപ്പം നേതി തമാഹു അരിയോതി.

൫൪൧. ‘‘യോ ഇധ ചരണേസു പത്തിപത്തോ, കുസലോ സബ്ബദാ ആജാനാതി [ആജാനി (സ്യാ.)] ധമ്മം;

സബ്ബത്ഥ ന സജ്ജതി വിമുത്തചിത്തോ [വിമുത്തോ (സീ.)], പടിഘാ യസ്സ ന സന്തി ചരണവാ സോ.

൫൪൨. ‘‘ദുക്ഖവേപക്കം യദത്ഥി കമ്മം, ഉദ്ധമധോ തിരിയം വാപി [തിരിയഞ്ചാപി (സ്യാ.)] മജ്ഝേ;

പരിബ്ബാജയിത്വാ പരിഞ്ഞചാരീ, മായം മാനമഥോപി ലോഭകോധം;

പരിയന്തമകാസി നാമരൂപം, തം പരിബ്ബാജകമാഹു പത്തിപത്ത’’ന്തി.

അഥ ഖോ സഭിയോ പരിബ്ബാജകോ ഭഗവതോ ഭാസിതം അഭിനന്ദിത്വാ അനുമോദിത്വാ അത്തമനോ പമുദിതോ ഉദഗ്ഗോ പീതിസോമനസ്സജാതോ ഉട്ഠായാസനാ ഏകംസം ഉത്തരാസങ്ഗം കരിത്വാ യേന ഭഗവാ തേനഞ്ജലിം പണാമേത്വാ ഭഗവന്തം സമ്മുഖാ സാരുപ്പാഹി ഗാഥാഹി അഭിത്ഥവി –

൫൪൩. ‘‘യാനി ച തീണി യാനി ച സട്ഠി, സമണപ്പവാദസിതാനി [സമണപ്പവാദനിസ്സിതാനി (സ്യാ. ക.)] ഭൂരിപഞ്ഞ;

സഞ്ഞക്ഖരസഞ്ഞനിസ്സിതാനി, ഓസരണാനി വിനേയ്യ ഓഘതമഗാ.

൫൪൪. ‘‘അന്തഗൂസി പാരഗൂ [പാരഗൂസി (സ്യാ. പീ. ക.)] ദുക്ഖസ്സ, അരഹാസി സമ്മാസമ്ബുദ്ധോ ഖീണാസവം തം മഞ്ഞേ;

ജുതിമാ മുതിമാ പഹൂതപഞ്ഞോ, ദുക്ഖസ്സന്തകരം അതാരേസി മം.

൫൪൫. ‘‘യം മേ കങ്ഖിതമഞ്ഞാസി, വിചികിച്ഛാ മം താരയി നമോ തേ;

മുനി മോനപഥേസു പത്തിപത്ത, അഖില ആദിച്ചബന്ധു സോരതോസി.

൫൪൬. ‘‘യാ മേ കങ്ഖാ പുരേ ആസി, തം മേ ബ്യാകാസി ചക്ഖുമാ;

അദ്ധാ മുനീസി സമ്ബുദ്ധോ, നത്ഥി നീവരണാ തവ.

൫൪൭. ‘‘ഉപായാസാ ച തേ സബ്ബേ, വിദ്ധസ്താ വിനളീകതാ;

സീതിഭൂതോ ദമപ്പത്തോ, ധിതിമാ സച്ചനിക്കമോ.

൫൪൮. ‘‘തസ്സ തേ നാഗനാഗസ്സ, മഹാവീരസ്സ ഭാസതോ;

സബ്ബേ ദേവാനുമോദന്തി, ഉഭോ നാരദപബ്ബതാ.

൫൪൯. ‘‘നമോ തേ പുരിസാജഞ്ഞ, നമോ തേ പുരിസുത്തമ;

സദേവകസ്മിം ലോകസ്മിം, നത്ഥി തേ പടിപുഗ്ഗലോ.

൫൫൦. ‘‘തുവം ബുദ്ധോ തുവം സത്ഥാ, തുവം മാരാഭിഭൂ മുനി;

തുവം അനുസയേ ഛേത്വാ, തിണ്ണോ താരേസി മം പജം.

൫൫൧. ‘‘ഉപധീ തേ സമതിക്കന്താ, ആസവാ തേ പദാലിതാ;

സീഹോസി അനുപാദാനോ, പഹീനഭയഭേരവോ.

൫൫൨. ‘‘പുണ്ഡരീകം യഥാ വഗ്ഗു, തോയേ ന ഉപലിമ്പതി [തോയേന ന ഉപലിപ്പതി (സീ.), തോയേ ന ഉപലിപ്പതി (പീ.), തോയേന ന ഉപലിമ്പതി (ക.)];

ഏവം പുഞ്ഞേ ച പാപേ ച, ഉഭയേ ത്വം ന ലിമ്പസി;

പാദേ വീര പസാരേഹി, സഭിയോ വന്ദതി സത്ഥുനോ’’തി.

അഥ ഖോ സഭിയോ പരിബ്ബാജകോ ഭഗവതോ പാദേസു സിരസാ നിപതിത്വാ ഭഗവന്തം ഏതദവോച – ‘‘അഭിക്കന്തം, ഭന്തേ…പേ… ഏസാഹം ഭഗവന്തം സരണം ഗച്ഛാമി ധമ്മഞ്ച ഭിക്ഖുസങ്ഘഞ്ച; ലഭേയ്യാഹം, ഭന്തേ, ഭഗവതോ സന്തികേ പബ്ബജ്ജം, ലഭേയ്യം ഉപസമ്പദ’’ന്തി.

‘‘യോ ഖോ, സഭിയ, അഞ്ഞതിത്ഥിയപുബ്ബോ ഇമസ്മിം ധമ്മവിനയേ ആകങ്ഖതി പബ്ബജ്ജം, ആകങ്ഖതി ഉപസമ്പദം, സോ ചത്താരോ മാസേ പരിവസതി; ചതുന്നം മാസാനം അച്ചയേന ആരദ്ധചിത്താ ഭിക്ഖൂ പബ്ബാജേന്തി, ഉപസമ്പാദേന്തി ഭിക്ഖുഭാവായ. അപി ച മേത്ഥ പുഗ്ഗലവേമത്തതാ വിദിതാ’’തി.

‘‘സചേ, ഭന്തേ, അഞ്ഞതിത്ഥിയപുബ്ബാ ഇമസ്മിം ധമ്മവിനയേ ആകങ്ഖന്താ പബ്ബജ്ജം, ആകങ്ഖന്താ ഉപസമ്പദം ചത്താരോ മാസേ പരിവസന്തി, ചതുന്നം മാസാനം അച്ചയേന ആരദ്ധചിത്താ ഭിക്ഖൂ പബ്ബാജേന്തി, ഉപസമ്പാദേന്തി ഭിക്ഖുഭാവായ, അഹം ചത്താരി വസ്സാനി പരിവസിസ്സാമി; ചതുന്നം വസ്സാനം അച്ചയേന ആരദ്ധചിത്താ ഭിക്ഖൂ പബ്ബാജേന്തു ഉപസമ്പാദേന്തു ഭിക്ഖുഭാവായാ’’തി. അലത്ഥ ഖോ സഭിയോ പരിബ്ബാജകോ ഭഗവതോ സന്തികേ പബ്ബജ്ജം അലത്ഥ ഉപസമ്പദം…പേ… അഞ്ഞതരോ ഖോ പനായസ്മാ സഭിയോ അരഹതം അഹോസീതി.

സഭിയസുത്തം ഛട്ഠം നിട്ഠിതം.