൫. ചുന്ദസുത്തം

൮൩. ‘‘പുച്ഛാമി മുനിം പഹൂതപഞ്ഞം, (ഇതി ചുന്ദോ കമ്മാരപുത്തോ)

ബുദ്ധം ധമ്മസ്സാമിം വീതതണ്ഹം;

ദ്വിപദുത്തമം [ദിപദുത്തമം (സീ. സ്യാ. കം. പീ.)] സാരഥീനം പവരം, കതി ലോകേ സമണാ തദിങ്ഘ ബ്രൂഹി’’.

൮൪. ‘‘ചതുരോ സമണാ ന പഞ്ചമത്ഥി, (ചുന്ദാതി ഭഗവാ)

തേ തേ ആവികരോമി സക്ഖിപുട്ഠോ;

മഗ്ഗജിനോ മഗ്ഗദേസകോ ച, മഗ്ഗേ ജീവതി യോ ച മഗ്ഗദൂസീ’’.

൮൫. ‘‘കം മഗ്ഗജിനം വദന്തി ബുദ്ധാ, (ഇതി ചുന്ദോ കമ്മാരപുത്തോ)

മഗ്ഗക്ഖായീ കഥം അതുല്യോ ഹോതി;

മഗ്ഗേ ജീവതി മേ ബ്രൂഹി പുട്ഠോ, അഥ മേ ആവികരോഹി മഗ്ഗദൂസിം’’ [മഗ്ഗദൂസീ (ക.)].

൮൬. ‘‘യോ തിണ്ണകഥംകഥോ വിസല്ലോ, നിബ്ബാനാഭിരതോ അനാനുഗിദ്ധോ;

ലോകസ്സ സദേവകസ്സ നേതാ, താദിം മഗ്ഗജിനം വദന്തി ബുദ്ധാ.

൮൭. ‘‘പരമം പരമന്തി യോധ ഞത്വാ, അക്ഖാതി വിഭജതേ ഇധേവ ധമ്മം;

തം കങ്ഖഛിദം മുനിം അനേജം, ദുതിയം ഭിക്ഖുനമാഹു മഗ്ഗദേസിം.

൮൮. ‘‘യോ ധമ്മപദേ സുദേസിതേ, മഗ്ഗേ ജീവതി സഞ്ഞതോ സതീമാ;

അനവജ്ജപദാനി സേവമാനോ, തതിയം ഭിക്ഖുനമാഹു മഗ്ഗജീവിം.

൮൯. ‘‘ഛദനം കത്വാന സുബ്ബതാനം, പക്ഖന്ദീ കുലദൂസകോ പഗബ്ഭോ;

മായാവീ അസഞ്ഞതോ പലാപോ, പതിരൂപേന ചരം സ മഗ്ഗദൂസീ.

൯൦. ‘‘ഏതേ ച പടിവിജ്ഝി യോ ഗഹട്ഠോ, സുതവാ അരിയസാവകോ സപഞ്ഞോ;

സബ്ബേ നേതാദിസാതി [സബ്ബേ നേ താദിസാതി (സീ. സ്യാ. പീ.)] ഞത്വാ, ഇതി ദിസ്വാ ന ഹാപേതി തസ്സ സദ്ധാ;

കഥം ഹി ദുട്ഠേന അസമ്പദുട്ഠം, സുദ്ധം അസുദ്ധേന സമം കരേയ്യാ’’തി.

ചുന്ദസുത്തം പഞ്ചമം നിട്ഠിതം.