൧. ഉരഗവഗ്ഗോ

൧. ഉരഗസുത്തം

൧. യോ [യോ വേ (സ്യാ.)] ഉപ്പതിതം വിനേതി കോധം, വിസടം സപ്പവിസംവ ഓസധേഹി [ഓസധേഭി (ക.)];

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം [ജിണ്ണമിവ തചം (സീ. സ്യാ. കം. പീ.), ജിണ്ണമിവാ തചം (?)] പുരാണം.

൨. യോ രാഗമുദച്ഛിദാ അസേസം, ഭിസപുപ്ഫംവ സരോരുഹം [സരേരുഹം (ക.)] വിഗയ്ഹ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം, പുരാണം.

൩. യോ തണ്ഹമുദച്ഛിദാ അസേസം, സരിതം സീഘസരം വിസോസയിത്വാ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൪. യോ മാനമുദബ്ബധീ അസേസം, നളസേതുംവ സുദുബ്ബലം മഹോഘോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൫. യോ നാജ്ഝഗമാ ഭവേസു സാരം, വിചിനം പുപ്ഫമിവ [പുപ്ഫമിവ (ബഹൂസു)] ഉദുമ്ബരേസു;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൬. യസ്സന്തരതോ ന സന്തി കോപാ, ഇതിഭവാഭവതഞ്ച [ഇതിബ്ഭവാഭവതഞ്ച (ക.)] വീതിവത്തോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൭. യസ്സ വിതക്കാ വിധൂപിതാ, അജ്ഝത്തം സുവികപ്പിതാ അസേസാ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൮. യോ നാച്ചസാരീ ന പച്ചസാരീ, സബ്ബം അച്ചഗമാ ഇമം പപഞ്ചം;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൯. യോ നാച്ചസാരീ ന പച്ചസാരീ, സബ്ബം വിതഥമിദന്തി ഞത്വാ [ഉത്വാ (സ്യാ. പീ. ക.)] ലോകേ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൦. യോ നാച്ചസാരീ ന പച്ചസാരീ, സബ്ബം വിതഥമിദന്തി വീതലോഭോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൧. യോ നാച്ചസാരീ ന പച്ചസാരീ, സബ്ബം വിതഥമിദന്തി വീതരാഗോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൨. യോ നാച്ചസാരീ ന പച്ചസാരീ, സബ്ബം വിതഥമിദന്തി വീതദോസോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൩. യോ നാച്ചസാരീ ന പച്ചസാരീ, സബ്ബം വിതഥമിദന്തി വീതമോഹോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൪. യസ്സാനുസയാ ന സന്തി കേചി, മൂലാ ച അകുസലാ സമൂഹതാസേ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൫. യസ്സ ദരഥജാ ന സന്തി കേചി, ഓരം ആഗമനായ പച്ചയാസേ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൬. യസ്സ വനഥജാ ന സന്തി കേചി, വിനിബന്ധായ ഭവായ ഹേതുകപ്പാ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

൧൭. യോ നീവരണേ പഹായ പഞ്ച, അനിഘോ തിണ്ണകഥംകഥോ വിസല്ലോ;

സോ ഭിക്ഖു ജഹാതി ഓരപാരം, ഉരഗോ ജിണ്ണമിവത്തചം പുരാണം.

ഉരഗസുത്തം പഠമം നിട്ഠിതം.

൨. ധനിയസുത്തം

൧൮. ‘‘പക്കോദനോ ദുദ്ധഖീരോഹമസ്മി, (ഇതി ധനിയോ ഗോപോ)

അനുതീരേ മഹിയാ സമാനവാസോ;

ഛന്നാ കുടി ആഹിതോ ഗിനി, അഥ ചേ പത്ഥയസീ പവസ്സ ദേവ’’.

൧൯. ‘‘അക്കോധനോ വിഗതഖിലോഹമസ്മി [വിഗതഖീലോഹമസ്മി (സീ. പീ.)], (ഇതി ഭഗവാ)

അനുതീരേ മഹിയേകരത്തിവാസോ;

വിവടാ കുടി നിബ്ബുതോ ഗിനി, അഥ ചേ പത്ഥയസീ പവസ്സ ദേവ’’.

൨൦. ‘‘അന്ധകമകസാ ന വിജ്ജരേ, (ഇതി ധനിയോ ഗോപോ)

കച്ഛേ രൂള്ഹതിണേ ചരന്തി ഗാവോ;

വുട്ഠിമ്പി സഹേയ്യുമാഗതം, അഥ ചേ പത്ഥയസീ പവസ്സ ദേവ’’.

൨൧. ‘‘ബദ്ധാസി ഭിസീ സുസങ്ഖതാ, (ഇതി ഭഗവാ)

തിണ്ണോ പാരഗതോ വിനേയ്യ ഓഘം;

അത്ഥോ ഭിസിയാ ന വിജ്ജതി, അഥ ചേ പത്ഥയസീ പവസ്സ ദേവ’’.

൨൨. ‘‘ഗോപീ മമ അസ്സവാ അലോലാ, (ഇതി ധനിയോ ഗോപോ)

ദീഘരത്തം [ദീഘരത്ത (ക.)] സംവാസിയാ മനാപാ;

തസ്സാ ന സുണാമി കിഞ്ചി പാപം, അഥ ചേ പത്ഥയസീ പവസ്സ ദേവ’’.

൨൩. ‘‘ചിത്തം മമ അസ്സവം വിമുത്തം, (ഇതി ഭഗവാ)

ദീഘരത്തം പരിഭാവിതം സുദന്തം;

പാപം പന മേ ന വിജ്ജതി, അഥ ചേ പത്ഥയസീ പവസ്സ ദേവ’’.

൨൪. ‘‘അത്തവേതനഭതോഹമസ്മി, (ഇതി ധനിയോ ഗോപോ)

പുത്താ ച മേ സമാനിയാ അരോഗാ;

തേസം ന സുണാമി കിഞ്ചി പാപം, അഥ ചേ പത്ഥയസീ പവസ്സ ദേവ’’.

൨൫. ‘‘നാഹം ഭതകോസ്മി കസ്സചി, (ഇതി ഭഗവാ)

നിബ്ബിട്ഠേന ചരാമി സബ്ബലോകേ;

അത്ഥോ ഭതിയാ ന വിജ്ജതി, അഥ ചേ പത്ഥയസീ പവസ്സ ദേവ’’.

൨൬. ‘‘അത്ഥി വസാ അത്ഥി ധേനുപാ, (ഇതി ധനിയോ ഗോപോ)

ഗോധരണിയോ പവേണിയോപി അത്ഥി;

ഉസഭോപി ഗവമ്പതീധ അത്ഥി, അഥ ചേ പത്ഥയസീ പവസ്സ ദേവ’’.

൨൭. ‘‘നത്ഥി വസാ നത്ഥി ധേനുപാ, (ഇതി ഭഗവാ)

ഗോധരണിയോ പവേണിയോപി നത്ഥി;

ഉസഭോപി ഗവമ്പതീധ നത്ഥി, അഥ ചേ പത്ഥയസീ പവസ്സ ദേവ’’.

൨൮. ‘‘ഖിലാ നിഖാതാ അസമ്പവേധീ, (ഇതി ധനിയോ ഗോപോ)

ദാമാ മുഞ്ജമയാ നവാ സുസണ്ഠാനാ;

ന ഹി സക്ഖിന്തി ധേനുപാപി ഛേത്തും [ഛേതും (ക.)], അഥ ചേ പത്ഥയസീ പവസ്സ ദേവ’’.

൨൯. ‘‘ഉസഭോരിവ ഛേത്വ [ഛേത്വാ (സ്യാ. ക.)] ബന്ധനാനി, (ഇതി ഭഗവാ)

നാഗോ പൂതിലതംവ ദാലയിത്വാ [പൂതിലതം പദാലയിത്വാ (സ്യാ. ക.)];

നാഹം പുനുപേസ്സം [പുന ഉപേസ്സം (സീ. സ്യാ. കം. പീ.), പുനുപേയ്യ (ക.)] ഗബ്ഭസേയ്യം, അഥ ചേ പത്ഥയസീ പവസ്സ ദേവ’’.

൩൦. ‘‘നിന്നഞ്ച ഥലഞ്ച പൂരയന്തോ, മഹാമേഘോ പവസ്സി താവദേവ;

സുത്വാ ദേവസ്സ വസ്സതോ, ഇമമത്ഥം ധനിയോ അഭാസഥ.

൩൧. ‘‘ലാഭാ വത നോ അനപ്പകാ, യേ മയം ഭഗവന്തം അദ്ദസാമ;

സരണം തം ഉപേമ ചക്ഖുമ, സത്ഥാ നോ ഹോഹി തുവം മഹാമുനി.

൩൨. ‘‘ഗോപീ ച അഹഞ്ച അസ്സവാ, ബ്രഹ്മചരിയം [ബ്രഹ്മചരിയ (ക.)] സുഗതേ ചരാമസേ;

ജാതിമരണസ്സ പാരഗൂ [പാരഗാ (സീ. സ്യാ. കം. പീ.)], ദുക്ഖസ്സന്തകരാ ഭവാമസേ’’.

൩൩. ‘‘നന്ദതി പുത്തേഹി പുത്തിമാ, (ഇതി മാരോ പാപിമാ)

ഗോമാ [ഗോമികോ (സീ. പീ.), ഗോപികോ (സ്യാ. കം.), ഗോപിയോ (ക.)] ഗോഹി തഥേവ നന്ദതി;

ഉപധീ ഹി നരസ്സ നന്ദനാ, ന ഹി സോ നന്ദതി യോ നിരൂപധി’’.

൩൪. ‘‘സോചതി പുത്തേഹി പുത്തിമാ, (ഇതി ഭഗവാ)

ഗോപിയോ ഗോഹി തഥേവ സോചതി;

ഉപധീ ഹി നരസ്സ സോചനാ, ന ഹി സോ സോചതി യോ നിരൂപധീ’’തി.

ധനിയസുത്തം ദുതിയം നിട്ഠിതം.

൩. ഖഗ്ഗവിസാണസുത്തം

൩൫. സബ്ബേസു ഭൂതേസു നിധായ ദണ്ഡം, അവിഹേഠയം അഞ്ഞതരമ്പി തേസം;

ന പുത്തമിച്ഛേയ്യ കുതോ സഹായം, ഏകോ ചരേ ഖഗ്ഗവിസാണകപ്പോ.

൩൬. സംസഗ്ഗജാതസ്സ ഭവന്തി സ്നേഹാ, സ്നേഹന്വയം ദുക്ഖമിദം പഹോതി;

ആദീനവം സ്നേഹജം പേക്ഖമാനോ, ഏകോ ചരേ ഖഗ്ഗവിസാണകപ്പോ.

൩൭. മിത്തേ സുഹജ്ജേ അനുകമ്പമാനോ, ഹാപേതി അത്ഥം പടിബദ്ധചിത്തോ;

ഏതം ഭയം സന്ഥവേ [സന്ധവേ (ക.)] പേക്ഖമാനോ, ഏകോ ചരേ ഖഗ്ഗവിസാണകപ്പോ.

൩൮. വംസോ വിസാലോവ യഥാ വിസത്തോ, പുത്തേസു ദാരേസു ച യാ അപേക്ഖാ;

വംസക്കളീരോവ [വംസകളീരോവ (സീ.), വംസാകളീരോവ (സ്യാ. കം. പീ.), വംസേകളീരോവ (നിദ്ദേസ)] അസജ്ജമാനോ, ഏകോ ചരേ ഖഗ്ഗവിസാണകപ്പോ.

൩൯. മിഗോ അരഞ്ഞമ്ഹി യഥാ അബദ്ധോ [അബന്ധോ (സ്യാ. കം.)], യേനിച്ഛകം ഗച്ഛതി ഗോചരായ;

വിഞ്ഞൂ നരോ സേരിതം പേക്ഖമാനോ, ഏകോ ചരേ ഖഗ്ഗവിസാണകപ്പോ.

൪൦. ആമന്തനാ ഹോതി സഹായമജ്ഝേ, വാസേ ഠാനേ ഗമനേ ചാരികായ;

അനഭിജ്ഝിതം സേരിതം പേക്ഖമാനോ, ഏകോ ചരേ ഖഗ്ഗവിസാണകപ്പോ.

൪൧. ഖിഡ്ഡാ രതീ ഹോതി സഹായമജ്ഝേ, പുത്തേസു ച വിപുലം ഹോതി പേമം;

പിയവിപ്പയോഗം വിജിഗുച്ഛമാനോ, ഏകോ ചരേ ഖഗ്ഗവിസാണകപ്പോ.

൪൨. ചാതുദ്ദിസോ അപ്പടിഘോ ച ഹോതി, സന്തുസ്സമാനോ ഇതരീതരേന;

പരിസ്സയാനം സഹിതാ അഛമ്ഭീ, ഏകോ ചരേ ഖഗ്ഗവിസാണകപ്പോ.

൪൩. ദുസ്സങ്ഗഹാ പബ്ബജിതാപി ഏകേ, അഥോ ഗഹട്ഠാ ഘരമാവസന്താ;

അപ്പോസ്സുക്കോ പരപുത്തേസു ഹുത്വാ, ഏകോ ചരേ ഖഗ്ഗവിസാണകപ്പോ.

൪൪. ഓരോപയിത്വാ ഗിഹിബ്യഞ്ജനാനി [ഗിഹിവ്യഞ്ജനാനി (സ്യാ. കം. പീ.)], സഞ്ഛിന്നപത്തോ [സംസീനപത്തോ (സീ.)] യഥാ കോവിളാരോ;

ഛേത്വാന വീരോ ഗിഹിബന്ധനാനി, ഏകോ ചരേ ഖഗ്ഗവിസാണകപ്പോ.

൪൫. സചേ ലഭേഥ നിപകം സഹായം, സദ്ധിം ചരം സാധുവിഹാരിധീരം;

അഭിഭുയ്യ സബ്ബാനി പരിസ്സയാനി, ചരേയ്യ തേനത്തമനോ സതീമാ.

൪൬. നോ ചേ ലഭേഥ നിപകം സഹായം, സദ്ധിം ചരം സാധുവിഹാരിധീരം;

രാജാവ രട്ഠം വിജിതം പഹായ, ഏകോ ചരേ മാതങ്ഗരഞ്ഞേവ നാഗോ.

൪൭. അദ്ധാ പസംസാമ സഹായസമ്പദം, സേട്ഠാ സമാ സേവിതബ്ബാ സഹായാ;

ഏതേ അലദ്ധാ അനവജ്ജഭോജീ, ഏകോ ചരേ ഖഗ്ഗവിസാണകപ്പോ.

൪൮. ദിസ്വാ സുവണ്ണസ്സ പഭസ്സരാനി, കമ്മാരപുത്തേന സുനിട്ഠിതാനി;

സങ്ഘട്ടമാനാനി ദുവേ ഭുജസ്മിം, ഏകോ ചരേ ഖഗ്ഗവിസാണകപ്പോ.

൪൯. ഏവം ദുതിയേന [ദുതിയേന (സബ്ബത്ഥ)] സഹാ മമസ്സ, വാചാഭിലാപോ അഭിസജ്ജനാ വാ;

ഏതം ഭയം ആയതിം പേക്ഖമാനോ, ഏകോ ചരേ ഖഗ്ഗവിസാണകപ്പോ.

൫൦. കാമാ ഹി ചിത്രാ മധുരാ മനോരമാ, വിരൂപരൂപേന മഥേന്തി ചിത്തം;

ആദീനവം കാമഗുണേസു ദിസ്വാ, ഏകോ ചരേ ഖഗ്ഗവിസാണകപ്പോ.

൫൧. ഈതീ ച ഗണ്ഡോ ച ഉപദ്ദവോ ച, രോഗോ ച സല്ലഞ്ച ഭയഞ്ച മേതം;

ഏതം ഭയം കാമഗുണേസു ദിസ്വാ, ഏകോ ചരേ ഖഗ്ഗവിസാണകപ്പോ.

൫൨. സീതഞ്ച ഉണ്ഹഞ്ച ഖുദം പിപാസം, വാതാതപേ ഡംസസരീസപേ [ഡംസസിരിംസപേ (സീ. സ്യാ. കം. പീ.)] ച;

സബ്ബാനിപേതാനി അഭിസമ്ഭവിത്വാ, ഏകോ ചരേ ഖഗ്ഗവിസാണകപ്പോ.

൫൩. നാഗോവ യൂഥാനി വിവജ്ജയിത്വാ, സഞ്ജാതഖന്ധോ പദുമീ ഉളാരോ;

യഥാഭിരന്തം വിഹരം [വിഹരേ (സീ. പീ. നിദ്ദേസ)] അരഞ്ഞേ, ഏകോ ചരേ ഖഗ്ഗവിസാണകപ്പോ.

൫൪. അട്ഠാനതം സങ്ഗണികാരതസ്സ, യം ഫസ്സയേ [ഫുസ്സയേ (സ്യാ.)] സാമയികം വിമുത്തിം;

ആദിച്ചബന്ധുസ്സ വചോ നിസമ്മ, ഏകോ ചരേ ഖഗ്ഗവിസാണകപ്പോ.

൫൫. ദിട്ഠീവിസൂകാനി ഉപാതിവത്തോ, പത്തോ നിയാമം പടിലദ്ധമഗ്ഗോ;

ഉപ്പന്നഞാണോമ്ഹി അനഞ്ഞനേയ്യോ, ഏകോ ചരേ ഖഗ്ഗവിസാണകപ്പോ.

൫൬. നില്ലോലുപോ നിക്കുഹോ നിപ്പിപാസോ, നിമ്മക്ഖോ നിദ്ധന്തകസാവമോഹോ;

നിരാസയോ [നിരാസാസോ (ക.)] സബ്ബലോകേ ഭവിത്വാ, ഏകോ ചരേ ഖഗ്ഗവിസാണകപ്പോ.

൫൭. പാപം സഹായം പരിവജ്ജയേഥ, അനത്ഥദസ്സിം വിസമേ നിവിട്ഠം;

സയം ന സേവേ പസുതം പമത്തം, ഏകോ ചരേ ഖഗ്ഗവിസാണകപ്പോ.

൫൮. ബഹുസ്സുതം ധമ്മധരം ഭജേഥ, മിത്തം ഉളാരം പടിഭാനവന്തം;

അഞ്ഞായ അത്ഥാനി വിനേയ്യ കങ്ഖം, ഏകോ ചരേ ഖഗ്ഗവിസാണകപ്പോ.

൫൯. ഖിഡ്ഡം രതിം കാമസുഖഞ്ച ലോകേ, അനലങ്കരിത്വാ അനപേക്ഖമാനോ;

വിഭൂസനട്ഠാനാ വിരതോ സച്ചവാദീ, ഏകോ ചരേ ഖഗ്ഗവിസാണകപ്പോ.

൬൦. പുത്തഞ്ച ദാരം പിതരഞ്ച മാതരം, ധനാനി ധഞ്ഞാനി ച ബന്ധവാനി [ബന്ധവാനി ച (പീ.)];

ഹിത്വാന കാമാനി യഥോധികാനി, ഏകോ ചരേ ഖഗ്ഗവിസാണകപ്പോ.

൬൧. സങ്ഗോ ഏസോ പരിത്തമേത്ഥ സോഖ്യം, അപ്പസ്സാദോ ദുക്ഖമേത്ഥ ഭിയ്യോ;

ഗളോ ഏസോ ഇതി ഞത്വാ മുതീമാ [മതീമാ (സ്യാ. ക.)], ഏകോ ചരേ ഖഗ്ഗവിസാണകപ്പോ.

൬൨. സന്ദാലയിത്വാന [പദാലയിത്വാന (ക.)] സംയോജനാനി, ജാലംവ ഭേത്വാ സലിലമ്ബുചാരീ;

അഗ്ഗീവ ദഡ്ഢം അനിവത്തമാനോ, ഏകോ ചരേ ഖഗ്ഗവിസാണകപ്പോ.

൬൩. ഓക്ഖിത്തചക്ഖൂ ന ച പാദലോലോ, ഗുത്തിന്ദ്രിയോ രക്ഖിതമാനസാനോ;

അനവസ്സുതോ അപരിഡയ്ഹമാനോ, ഏകോ ചരേ ഖഗ്ഗവിസാണകപ്പോ.

൬൪. ഓഹാരയിത്വാ ഗിഹിബ്യഞ്ജനാനി, സഞ്ഛന്നപത്തോ [സഞ്ഛിന്നപത്തോ (സ്യാ. പീ.), പച്ഛിന്നപത്തോ (ക.)] യഥാ പാരിഛത്തോ;

കാസായവത്ഥോ അഭിനിക്ഖമിത്വാ, ഏകോ ചരേ ഖഗ്ഗവിസാണകപ്പോ.

൬൫. രസേസു ഗേധം അകരം അലോലോ, അനഞ്ഞപോസീ സപദാനചാരീ;

കുലേ കുലേ അപ്പടിബദ്ധചിത്തോ [അപ്പടിബന്ധചിത്തോ (ക.)], ഏകോ ചരേ ഖഗ്ഗവിസാണകപ്പോ.