൧൧. വിജയസുത്തം

൧൯൫. ചരം വാ യദി വാ തിട്ഠം, നിസിന്നോ ഉദ വാ സയം;

സമിഞ്ജേതി പസാരേതി, ഏസാ കായസ്സ ഇഞ്ജനാ.

൧൯൬. അട്ഠിനഹാരുസംയുത്തോ, തചമംസാവലേപനോ;

ഛവിയാ കായോ പടിച്ഛന്നോ, യഥാഭൂതം ന ദിസ്സതി.

൧൯൭. അന്തപൂരോ ഉദരപൂരോ, യകനപേളസ്സ [യകപേളസ്സ (സീ. സ്യാ.)] വത്ഥിനോ;

ഹദയസ്സ പപ്ഫാസസ്സ, വക്കസ്സ പിഹകസ്സ ച.

൧൯൮. സിങ്ഘാണികായ ഖേളസ്സ, സേദസ്സ ച മേദസ്സ ച;

ലോഹിതസ്സ ലസികായ, പിത്തസ്സ ച വസായ ച.

൧൯൯. അഥസ്സ നവഹി സോതേഹി, അസുചീ സവതി സബ്ബദാ;

അക്ഖിമ്ഹാ അക്ഖിഗൂഥകോ, കണ്ണമ്ഹാ കണ്ണഗൂഥകോ.

൨൦൦. സിങ്ഘാണികാ ച നാസതോ, മുഖേന വമതേകദാ;

പിത്തം സേമ്ഹഞ്ച വമതി, കായമ്ഹാ സേദജല്ലികാ.

൨൦൧. അഥസ്സ സുസിരം സീസം, മത്ഥലുങ്ഗസ്സ പൂരിതം;

സുഭതോ നം മഞ്ഞതി, ബാലോ അവിജ്ജായ പുരക്ഖതോ.

൨൦൨. യദാ ച സോ മതോ സേതി, ഉദ്ധുമാതോ വിനീലകോ;

അപവിദ്ധോ സുസാനസ്മിം, അനപേക്ഖാ ഹോന്തി ഞാതയോ.

൨൦൩. ഖാദന്തി നം സുവാനാ [സുപാണാ (പീ.)] ച, സിങ്ഗാലാ [സിഗാലാ (സീ. സ്യാ. കം. പീ.)] വകാ കിമീ;

കാകാ ഗിജ്ഝാ ച ഖാദന്തി, യേ ചഞ്ഞേ സന്തി പാണിനോ.

൨൦൪. സുത്വാന ബുദ്ധവചനം, ഭിക്ഖു പഞ്ഞാണവാ ഇധ;

സോ ഖോ നം പരിജാനാതി, യഥാഭൂതഞ്ഹി പസ്സതി.

൨൦൫. യഥാ ഇദം തഥാ ഏതം, യഥാ ഏതം തഥാ ഇദം;

അജ്ഝത്തഞ്ച ബഹിദ്ധാ ച, കായേ ഛന്ദം വിരാജയേ.

൨൦൬. ഛന്ദരാഗവിരത്തോ സോ, ഭിക്ഖു പഞ്ഞാണവാ ഇധ;

അജ്ഝഗാ അമതം സന്തിം, നിബ്ബാനം പദമച്ചുതം.

൨൦൭. ദ്വിപാദകോയം [ദിപാദകോയം (സീ. സ്യാ. കം. പീ.)] അസുചി, ദുഗ്ഗന്ധോ പരിഹാരതി [പരിഹീരതി (സീ. സ്യാ. കം. പീ.)];

നാനാകുണപപരിപൂരോ, വിസ്സവന്തോ തതോ തതോ.

൨൦൮. ഏതാദിസേന കായേന, യോ മഞ്ഞേ ഉണ്ണമേതവേ [ഉന്നമേതവേ (?)];

പരം വാ അവജാനേയ്യ, കിമഞ്ഞത്ര അദസ്സനാതി.

വിജയസുത്തം ഏകാദസമം നിട്ഠിതം.