൧൧. നാഗപേതവത്ഥു

൭൩. ‘‘പുരതോവ [പുരതോ ച (സ്യാ.)] സേതേന പലേതി ഹത്ഥിനാ, മജ്ഝേ പന അസ്സതരീരഥേന;

പച്ഛാ ച കഞ്ഞാ സിവികായ നീയതി, ഓഭാസയന്തീ ദസ സബ്ബതോ [സബ്ബതോ (ക.)] ദിസാ.

൭൪. ‘‘തുമ്ഹേ പന മുഗ്ഗരഹത്ഥപാണിനോ, രുദംമുഖാ ഛിന്നപഭിന്നഗത്താ;

മനുസ്സഭൂതാ കിമകത്ഥ പാപം, യേനഞ്ഞമഞ്ഞസ്സ പിവാഥ ലോഹിത’’ന്തി.

൭൫. ‘‘പുരതോവ യോ ഗച്ഛതി കുഞ്ജരേന, സേതേന നാഗേന ചതുക്കമേന;

അമ്ഹാക പുത്തോ അഹു ജേട്ഠകോ സോ [സോവ ജേട്ഠോ (ക.)], ദാനാനി ദത്വാന സുഖീ പമോദതി.

൭൬. ‘‘യോ സോ മജ്ഝേ അസ്സതരീരഥേന, ചതുബ്ഭി യുത്തേന സുവഗ്ഗിതേന;

അമ്ഹാക പുത്തോ അഹു മജ്ഝിമോ സോ, അമച്ഛരീ ദാനവതീ വിരോചതി.

൭൭. ‘‘യാ സാ ച പച്ഛാ സിവികായ നീയതി, നാരീ സപഞ്ഞാ മിഗമന്ദലോചനാ;

അമ്ഹാക ധീതാ അഹു സാ കനിട്ഠികാ, ഭാഗഡ്ഢഭാഗേന സുഖീ പമോദതി.

൭൮. ‘‘ഏതേ ച ദാനാനി അദംസു പുബ്ബേ, പസന്നചിത്താ സമണബ്രാഹ്മണാനം;

മയം പന മച്ഛരിനോ അഹുമ്ഹ, പരിഭാസകാ സമണബ്രാഹ്മണാനം;

ഏതേ ച ദത്വാ പരിചാരയന്തി, മയഞ്ച സുസ്സാമ നളോവ ഛിന്നോ’’തി [ഖിത്തോതി (സീ.)].

൭൯. ‘‘കിം തുമ്ഹാകം ഭോജനം കിം സയാനം, കഥഞ്ച യാപേഥ സുപാപധമ്മിനോ;

പഹൂതഭോഗേസു അനപ്പകേസു, സുഖം വിരാധായ [വിരാഗായ (സ്യാ. ക.)] ദുക്ഖജ്ജ പത്താ’’തി.

൮൦. ‘‘അഞ്ഞമഞ്ഞം വധിത്വാന, പിവാമ പുബ്ബലോഹിതം;

ബഹും പിത്വാ ന ധാതാ ഹോമ, നച്ഛാദിമ്ഹസേ [നരുച്ചാദിമ്ഹസേ (ക.)] മയം.

൮൧. ‘‘ഇച്ചേവ മച്ചാ പരിദേവയന്തി, അദായകാ പേച്ച [മച്ഛരിനോ (ക.)] യമസ്സ ഠായിനോ;

യേ തേ വിദിച്ച [വിദിത്വാ (സീ.)] അധിഗമ്മ ഭോഗേ, ന ഭുഞ്ജരേ നാപി കരോന്തി പുഞ്ഞം.

൮൨. ‘‘തേ ഖുപ്പിപാസൂപഗതാ പരത്ഥ, പച്ഛാ [പേതാ (സീ.)] ചിരം ഝായരേ ഡയ്ഹമാനാ;

കമ്മാനി കത്വാന ദുഖുദ്രാനി, അനുഭോന്തി ദുക്ഖം കടുകപ്ഫലാനി.

൮൩. ‘‘ഇത്തരം ഹി ധനം ധഞ്ഞം, ഇത്തരം ഇധ ജീവിതം;

ഇത്തരം ഇത്തരതോ ഞത്വാ, ദീപം കയിരാഥ പണ്ഡിതോ.

൮൪. ‘‘യേ തേ ഏവം പജാനന്തി, നരാ ധമ്മസ്സ കോവിദാ;

തേ ദാനേ നപ്പമജ്ജന്തി, സുത്വാ അരഹതം വചോ’’തി.

നാഗപേതവത്ഥു ഏകാദസമം.