൯. മഗ്ഗകഥാ

൨൩൭. മഗ്ഗോതി കേനട്ഠേന മഗ്ഗോ? സോതാപത്തിമഗ്ഗക്ഖണേ ദസ്സനട്ഠേന സമ്മാദിട്ഠി മിച്ഛാദിട്ഠിയാ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ [ഉത്തരിം പടിവേധായ (സ്യാ.)] മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

അഭിനിരോപനട്ഠേന സമ്മാസങ്കപ്പോ മിച്ഛാസങ്കപ്പസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

പരിഗ്ഗഹട്ഠേന സമ്മാവാചാ മിച്ഛാവാചായ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

സമുട്ഠാനട്ഠേന സമ്മാകമ്മന്തോ മിച്ഛാകമ്മന്തസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

വോദാനട്ഠേന സമ്മാആജീവോ മിച്ഛാആജീവസ്സ പഹാനായ മഗ്ഗോ ചേവ ഹേതു ച…പേ… പഗ്ഗഹട്ഠേന സമ്മാവായാമോ മിച്ഛാവായാമസ്സ പഹാനായ മഗ്ഗോ ചേവ ഹേതു ച…പേ… ഉപട്ഠാനട്ഠേന സമ്മാസതി മിച്ഛാസതിയാ പഹാനായ മഗ്ഗോ ചേവ ഹേതു ച…പേ… അവിക്ഖേപട്ഠേന സമ്മാസമാധി മിച്ഛാസമാധിസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

സകദാഗാമിമഗ്ഗക്ഖണേ ദസ്സനട്ഠേന സമ്മാദിട്ഠി…പേ… അവിക്ഖേപട്ഠേന സമ്മാസമാധി ഓളാരികസ്സ കാമരാഗസഞ്ഞോജനസ്സ പടിഘസഞ്ഞോജനസ്സ ഓളാരികസ്സ കാമരാഗാനുസയസ്സ പടിഘാനുസയസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

അനാഗാമിമഗ്ഗക്ഖണേ ദസ്സനട്ഠേന സമ്മാദിട്ഠി…പേ… അവിക്ഖേപട്ഠേന സമ്മാസമാധി അനുസഹഗതസ്സ കാമരാഗസഞ്ഞോജനസ്സ പടിഘസഞ്ഞോജനസ്സ, അനുസഹഗതസ്സ കാമരാഗാനുസയസ്സ പടിഘാനുസയസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

അരഹത്തമഗ്ഗക്ഖണേ ദസ്സനട്ഠേന സമ്മാദിട്ഠി…പേ… അവിക്ഖേപട്ഠേന സമ്മാസമാധി രൂപരാഗസ്സ അരൂപരാഗസ്സ മാനസ്സ ഉദ്ധച്ചസ്സ അവിജ്ജായ, മാനാനുസയസ്സ ഭവരാഗാനുസയസ്സ അവിജ്ജാനുസയസ്സ പഹാനായ മഗ്ഗോ ചേവ ഹേതു ച, സഹജാതാനം ധമ്മാനം ഉപത്ഥമ്ഭനായ മഗ്ഗോ ചേവ ഹേതു ച, കിലേസാനം പരിയാദാനായ മഗ്ഗോ ചേവ ഹേതു ച, പടിവേധാദിവിസോധനായ മഗ്ഗോ ചേവ ഹേതു ച, ചിത്തസ്സ അധിട്ഠാനായ മഗ്ഗോ ചേവ ഹേതു ച, ചിത്തസ്സ, വോദാനായ മഗ്ഗോ ചേവ ഹേതു ച, വിസേസാധിഗമായ മഗ്ഗോ ചേവ ഹേതു ച, ഉത്തരി പടിവേധായ മഗ്ഗോ ചേവ ഹേതു ച, സച്ചാഭിസമയായ മഗ്ഗോ ചേവ, ഹേതു ച, നിരോധേ പതിട്ഠാപനായ മഗ്ഗോ ചേവ ഹേതു ച.

ദസ്സനമഗ്ഗോ സമ്മാദിട്ഠി, അഭിനിരോപനമഗ്ഗോ സമ്മാസങ്കപ്പോ, പരിഗ്ഗഹമഗ്ഗോ സമ്മാവാചാ, സമുട്ഠാനമഗ്ഗോ സമ്മാകമ്മന്തോ, വോദാനമഗ്ഗോ സമ്മാആജീവോ, പഗ്ഗഹമഗ്ഗോ സമ്മാവായാമോ, ഉപട്ഠാനമഗ്ഗോ സമ്മാസതി, അവിക്ഖേപമഗ്ഗോ സമ്മാസമാധി. ഉപട്ഠാനമഗ്ഗോ സതിസമ്ബോജ്ഝങ്ഗോ, പവിചയമഗ്ഗോ ധമ്മവിചയസമ്ബോജ്ഝങ്ഗോ, പഗ്ഗഹമഗ്ഗോ വീരിയസമ്ബോജ്ഝങ്ഗോ, ഫരണമഗ്ഗോ പീതിസമ്ബോജ്ഝങ്ഗോ, ഉപസമമഗ്ഗോ പസ്സദ്ധിസമ്ബോജ്ഝങ്ഗോ, അവിക്ഖേപമഗ്ഗോ സമാധിസമ്ബോജ്ഝങ്ഗോ, പടിസങ്ഖാനമഗ്ഗോ ഉപേക്ഖാസമ്ബോജ്ഝങ്ഗോ.

അസ്സദ്ധിയേ അകമ്പിയമഗ്ഗോ സദ്ധാബലം, കോസജ്ജേ അകമ്പിയമഗ്ഗോ വീരിയബലം, പമാദേ അകമ്പിയമഗ്ഗോ സതിബലം, ഉദ്ധച്ചേ അകമ്പിയമഗ്ഗോ സമാധിബലം, അവിജ്ജായ അകമ്പിയമഗ്ഗോ പഞ്ഞാബലം. അധിമോക്ഖമഗ്ഗോ സദ്ധിന്ദ്രിയം, പഗ്ഗഹമഗ്ഗോ വീരിയിന്ദ്രിയം, ഉപട്ഠാനമഗ്ഗോ സതിന്ദ്രിയം, അവിക്ഖേപമഗ്ഗോ സമാധിന്ദ്രിയം, ദസ്സനമഗ്ഗോ പഞ്ഞിന്ദ്രിയം.

ആധിപതേയ്യട്ഠേന ഇന്ദ്രിയാ മഗ്ഗോ, അകമ്പിയട്ഠേന ബലാ മഗ്ഗോ, നിയ്യാനട്ഠേന ബോജ്ഝങ്ഗാ മഗ്ഗോ, ഹേതുട്ഠേന മഗ്ഗങ്ഗാ മഗ്ഗോ, ഉപട്ഠാനട്ഠേന സതിപട്ഠാനാ മഗ്ഗോ, പദഹനട്ഠേന സമ്മപ്പധാനാ മഗ്ഗോ, ഇജ്ഝനട്ഠേന ഇദ്ധിപാദാ മഗ്ഗോ, തഥട്ഠേന സച്ചാനി മഗ്ഗോ, അവിക്ഖേപട്ഠേന സമഥോ മഗ്ഗോ, അനുപസ്സനട്ഠേന വിപസ്സനാ മഗ്ഗോ, ഏകരസട്ഠേന സമഥവിപസ്സനാ മഗ്ഗോ, അനതിവത്തനട്ഠേന യുഗനദ്ധാ മഗ്ഗോ, സംവരട്ഠേന സീലവിസുദ്ധി മഗ്ഗോ, അവിക്ഖേപട്ഠേന ചിത്തവിസുദ്ധി മഗ്ഗോ, ദസ്സനട്ഠേന ദിട്ഠിവിസുദ്ധി മഗ്ഗോ, മുത്തട്ഠേന വിമോക്ഖോ മഗ്ഗോ, പടിവേധട്ഠേന വിജ്ജാ മഗ്ഗോ, പരിച്ചാഗട്ഠേന വിമുത്തി മഗ്ഗോ, സമുച്ഛേദട്ഠേന ഖയേ ഞാണം മഗ്ഗോ, ഛന്ദോ മൂലട്ഠേന മഗ്ഗോ, മനസികാരോ സമുട്ഠാനട്ഠേന മഗ്ഗോ, ഫസ്സോ സമോധാനട്ഠേന മഗ്ഗോ, വേദനാ സമോസരണട്ഠേന മഗ്ഗോ, സമാധി പമുഖട്ഠേന മഗ്ഗോ, സതി ആധിപതേയ്യട്ഠേന മഗ്ഗോ, പഞ്ഞാ തതുത്തരട്ഠേന മഗ്ഗോ, വിമുത്തി സാരട്ഠേന മഗ്ഗോ, അമതോഗധം നിബ്ബാനം പരിയോസാനട്ഠേന മഗ്ഗോതി.

മഗ്ഗകഥാ നിട്ഠിതാ.