൧. ഗണനവാര

൧൫൨. സോളസവത്ഥുകം ആനാപാനസ്സതിസമാധിം [ആനാപാനസതിസമാധിം (സീ. അട്ഠ.)] ഭാവയതോ സമാധികാനി ദ്വേ ഞാണസതാനി ഉപ്പജ്ജന്തി – അട്ഠ പരിപന്ഥേ [പരിബന്ധേ (ക.)] ഞാണാനി, അട്ഠ ച ഉപകാരേ ഞാണാനി, അട്ഠാരസ ഉപക്കിലേസേ ഞാണാനി, തേരസ വോദാനേ ഞാണാനി, ബാത്തിംസ സതോകാരിസ്സ [സതോകാരീസു (സ്യാ.)] ഞാണാനി, ചതുവീസതി സമാധിവസേന ഞാണാനി, ദ്വേസത്തതി വിപസ്സനാവസേന ഞാണാനി, അട്ഠ നിബ്ബിദാഞാണാനി, അട്ഠ നിബ്ബിദാനുലോമഞാണാനി, അട്ഠ നിബ്ബിദാപടിപ്പസ്സദ്ധിഞാണാനി, ഏകവീസതി വിമുത്തിസുഖേ ഞാണാനി.

കതമാനി അട്ഠ പരിപന്ഥേ ഞാണാനി, അട്ഠ ച ഉപകാരേ ഞാണാനി? കാമച്ഛന്ദോ സമാധിസ്സ പരിപന്ഥോ, നേക്ഖമ്മം സമാധിസ്സ ഉപകാരം. ബ്യാപാദോ സമാധിസ്സ പരിപന്ഥോ, അബ്യാപാദോ സമാധിസ്സ ഉപകാരം. ഥിനമിദ്ധം സമാധിസ്സ പരിപന്ഥോ, ആലോകസഞ്ഞാ സമാധിസ്സ ഉപകാരം. ഉദ്ധച്ചം സമാധിസ്സ പരിപന്ഥോ, അവിക്ഖേപോ സമാധിസ്സ ഉപകാരം. വിചികിച്ഛാ സമാധിസ്സ പരിപന്ഥോ, ധമ്മവവത്ഥാനം സമാധിസ്സ ഉപകാരം. അവിജ്ജാ സമാധിസ്സ പരിപന്ഥോ, ഞാണം സമാധിസ്സ ഉപകാരം. അരതി സമാധിസ്സ പരിപന്ഥോ, പാമോജ്ജം സമാധിസ്സ ഉപകാരം. സബ്ബേപി അകുസലാ ധമ്മാ സമാധിസ്സ പരിപന്ഥാ, സബ്ബേപി കുസലാ ധമ്മാ സമാധിസ്സ ഉപകാരാ. ഇമാനി അട്ഠ പരിപന്ഥേ ഞാണാനി, അട്ഠ ച ഉപകാരേ ഞാണാനി.

ഗണനവാരോ പഠമോ.