൬൪-൬൭. സുദ്ധികപടിസമ്ഭിദാഞാണനിദ്ദേസോ

൧൧൦. കഥം അത്ഥപടിസമ്ഭിദേ ഞാണം, ധമ്മപടിസമ്ഭിദേ ഞാണം, നിരുത്തിപടിസമ്ഭിദേ ഞാണം, പടിഭാനപടിസമ്ഭിദേ ഞാണം? അത്ഥേസു ഞാണം അത്ഥപടിസമ്ഭിദാ, ധമ്മേസു ഞാണം ധമ്മപടിസമ്ഭിദാ, നിരുത്തീസു ഞാണം നിരുത്തിപടിസമ്ഭിദാ, പടിഭാനേസു ഞാണം പടിഭാനപടിസമ്ഭിദാ. അത്ഥനാനത്തേ പഞ്ഞാ അത്ഥപടിസമ്ഭിദേ ഞാണം, ധമ്മനാനത്തേ പഞ്ഞാ ധമ്മപടിസമ്ഭിദേ ഞാണം, നിരുത്തിനാനത്തേ പഞ്ഞാ നിരുത്തിപടിസമ്ഭിദേ ഞാണം, പടിഭാനനാനത്തേ പഞ്ഞാ പടിഭാനപടിസമ്ഭിദേ ഞാണം, അത്ഥവവത്ഥാനേ പഞ്ഞാ അത്ഥപടിസമ്ഭിദേ ഞാണം, ധമ്മവവത്ഥാനേ പഞ്ഞാ ധമ്മപടിസമ്ഭിദേ ഞാണം നിരുത്തിവവത്ഥാനേ പഞ്ഞാ നിരുത്തിപടിസമ്ഭിദേ ഞാണം, പടിഭാനവവത്ഥാനേ പഞ്ഞാ പടിഭാനപടിസമ്ഭിദേ ഞാണം.

അത്ഥസല്ലക്ഖണേ പഞ്ഞാ അത്ഥപടിസമ്ഭിദേ ഞാണം, ധമ്മസല്ലക്ഖണേ പഞ്ഞാ ധമ്മപടിസമ്ഭിദേ ഞാണം, നിരുത്തിസല്ലക്ഖണേ പഞ്ഞാ നിരുത്തിപടിസമ്ഭിദേ ഞാണം, പടിഭാനസല്ലക്ഖണേ പഞ്ഞാ പടിഭാനപടിസമ്ഭിദേ ഞാണം. അത്ഥൂപലക്ഖണേ പഞ്ഞാ അത്ഥപടിസമ്ഭിദേ ഞാണം, ധമ്മൂപലക്ഖണേ പഞ്ഞാ ധമ്മപടിസമ്ഭിദേ ഞാണം, നിരുത്തൂപലക്ഖണേ പഞ്ഞാ നിരുത്തിപടിസമ്ഭിദേ ഞാണം, പടിഭാനൂപലക്ഖണേ പഞ്ഞാ പടിഭാനപടിസമ്ഭിദേ ഞാണം.

അത്ഥപ്പഭേദേ പഞ്ഞാ അത്ഥപടിസമ്ഭിദേ ഞാണം, ധമ്മപ്പഭേദേ പഞ്ഞാ ധമ്മപടിസമ്ഭിദേ ഞാണം, നിരുത്തിപ്പഭേദേ പഞ്ഞാ നിരുത്തിപടിസമ്ഭിദേ ഞാണം, പടിഭാനപ്പഭേദേ പഞ്ഞാ പടിഭാനപടിസമ്ഭിദേ ഞാണം. അത്ഥപ്പഭാവനേ പഞ്ഞാ അത്ഥപടിസമ്ഭിദേ ഞാണം, ധമ്മപ്പഭാവനേ പഞ്ഞാ ധമ്മപടിസമ്ഭിദേ ഞാണം, നിരുത്തിപ്പഭാവനേ പഞ്ഞാ നിരുത്തിപടിസമ്ഭിദേ ഞാണം, പടിഭാനപ്പഭാവനേ പഞ്ഞാ പടിഭാനപടിസമ്ഭിദേ ഞാണം.

അത്ഥജോതനേ പഞ്ഞാ അത്ഥപടിസമ്ഭിദേ ഞാണം, ധമ്മജോതനേ പഞ്ഞാ ധമ്മപടിസമ്ഭിദേ ഞാണം, നിരുത്തിജോതനേ പഞ്ഞാ നിരുത്തിപടിസമ്ഭിദേ ഞാണം, പടിഭാനജോതനേ പഞ്ഞാ പടിഭാനപടിസമ്ഭിദേ ഞാണം. അത്ഥവിരോചനേ പഞ്ഞാ അത്ഥപടിസമ്ഭിദേ ഞാണം, ധമ്മവിരോചനേ പഞ്ഞാ ധമ്മപടിസമ്ഭിദേ ഞാണം, നിരുത്തിവിരോചനേ പഞ്ഞാ നിരുത്തിപടിസമ്ഭിദേ ഞാണം, പടിഭാനവിരോചനേ പഞ്ഞാ പടിഭാനപടിസമ്ഭിദേ ഞാണം. അത്ഥപ്പകാസനേ പഞ്ഞാ അത്ഥപടിസമ്ഭിദേ ഞാണം, ധമ്മപ്പകാസനേ പഞ്ഞാ ധമ്മപടിസമ്ഭിദേ ഞാണം, നിരുത്തിപ്പകാസനേ പഞ്ഞാ നിരുത്തിപടിസമ്ഭിദേ ഞാണം, പടിഭാനപ്പകാസനേ പഞ്ഞാ പടിഭാനപടിസമ്ഭിദേ ഞാണം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘അത്ഥപടിസമ്ഭിദേ ഞാണം, ധമ്മപടിസമ്ഭിദേ ഞാണം, നിരുത്തിപടിസമ്ഭിദേ ഞാണം, പടിഭാനപടിസമ്ഭിദേ ഞാണം’’.

സുദ്ധികപടിസമ്ഭിദാഞാണനിദ്ദേസോ സത്തസട്ഠിമോ.