൫൧. സോതധാതുവിസുദ്ധിഞാണനിദ്ദേസോ

൧൦൩. കഥം വിതക്കവിപ്ഫാരവസേന നാനത്തേകത്തസദ്ദനിമിത്താനം പരിയോഗാഹണേ പഞ്ഞാ സോതധാതുവിസുദ്ധിഞാണം? ഇധ ഭിക്ഖു ഛന്ദസമാധി…പേ… വീരിയസമാധി… ചിത്തസമാധി… വീമംസാസമാധിപധാനസങ്ഖാരസമന്നാഗതം ഇദ്ധിപാദം ഭാവേതി. സോ ഇമേസു ചതൂസു ഇദ്ധിപാദേസു ചിത്തം പരിഭാവേതി പരിദമേതി, മുദും കരോതി കമ്മനിയം. സോ ഇമേസു ചതൂസു ഇദ്ധിപാദേസു ചിത്തം പരിഭാവേത്വാ പരിദമേത്വാ, മുദും കരിത്വാ കമ്മനിയം ദൂരേപി സദ്ദാനം സദ്ദനിമിത്തം മനസി കരോതി, സന്തികേപി സദ്ദാനം സദ്ദനിമിത്തം മനസി കരോതി, ഓളാരികാനമ്പി സദ്ദാനം സദ്ദനിമിത്തം മനസി കരോതി, സുഖുമാനമ്പി സദ്ദാനം സദ്ദനിമിത്തം മനസി കരോതി, സണ്ഹസണ്ഹാനമ്പി സദ്ദാനം സദ്ദനിമിത്തം മനസി കരോതി, പുരത്ഥിമായപി ദിസായ സദ്ദാനം സദ്ദനിമിത്തം മനസി കരോതി, പച്ഛിമായപി ദിസായ സദ്ദാനം സദ്ദനിമിത്തം മനസി കരോതി, ഉത്തരായപി ദിസായ സദ്ദാനം സദ്ദനിമിത്തം മനസി കരോതി, ദക്ഖിണായപി ദിസായ സദ്ദാനം സദ്ദനിമിത്തം മനസി കരോതി, പുരത്ഥിമായപി അനുദിസായ സദ്ദാനം സദ്ദനിമിത്തം മനസി കരോതി, പച്ഛിമായപി അനുദിസായ സദ്ദാനം സദ്ദനിമിത്തം മനസി കരോതി, ഉത്തരായപി അനുദിസായ സദ്ദാനം സദ്ദനിമിത്തം മനസി കരോതി, ദക്ഖിണായപി അനുദിസായ സദ്ദാനം സദ്ദനിമിത്തം മനസി കരോതി, ഹേട്ഠിമായപി ദിസായ സദ്ദാനം സദ്ദനിമിത്തം മനസി കരോതി, ഉപരിമായപി ദിസായ സദ്ദാനം സദ്ദനിമിത്തം മനസി കരോതി. സോ തഥാഭാവിതേന ചിത്തേന പരിസുദ്ധേന പരിയോദാതേന സോതധാതുവിസുദ്ധിഞാണായ ചിത്തം അഭിനീഹരതി അഭിനിന്നാമേതി. സോ ദിബ്ബായ സോതധാതുയാ വിസുദ്ധായ അതിക്കന്തമാനുസികായ ഉഭോ സദ്ദേ സുണാതി – ദിബ്ബേ ച മാനുസേ ച യേ ദൂരേ സന്തികേ ച. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘വിതക്കവിപ്ഫാരവസേന നാനത്തേകത്തസദ്ദനിമിത്താനം പരിയോഗാഹണേ പഞ്ഞാ സോതധാതുവിസുദ്ധിഞാണം’’.

സോതധാതുവിസുദ്ധിഞാണനിദ്ദേസോ ഏകപഞ്ഞാസമോ.