൩൮. വീരിയാരമ്ഭഞാണനിദ്ദേസോ

൮൯. കഥം അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം? അനുപ്പന്നാനം പാപകാനം അകുസലാനം ധമ്മാനം അനുപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നാനം പാപകാനം അകുസലാനം ധമ്മാനം പഹാനായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. അനുപ്പന്നാനം കുസലാനം ധമ്മാനം ഉപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നാനം കുസലാനം ധമ്മാനം ഠിതിയാ അസമ്മോസായ ഭിയ്യോഭാവായ വേപുല്ലായ ഭാവനായ പാരിപൂരിയാ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം.

അനുപ്പന്നസ്സ കാമച്ഛന്ദസ്സ അനുപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നസ്സ കാമച്ഛന്ദസ്സ പഹാനായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. അനുപ്പന്നസ്സ നേക്ഖമ്മസ്സ ഉപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നസ്സ നേക്ഖമ്മസ്സ ഠിതിയാ അസമ്മോസായ ഭിയ്യോഭാവായ വേപുല്ലായ ഭാവനായ പാരിപൂരിയാ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം…പേ….

അനുപ്പന്നാനം സബ്ബകിലേസാനം അനുപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നാനം സബ്ബകിലേസാനം പഹാനായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം…പേ… അനുപ്പന്നസ്സ അരഹത്തമഗ്ഗസ്സ ഉപ്പാദായ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. ഉപ്പന്നസ്സ അരഹത്തമഗ്ഗസ്സ ഠിതിയാ അസമ്മോസായ ഭിയ്യോഭാവായ വേപുല്ലായ ഭാവനായ പാരിപൂരിയാ അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘അസല്ലീനത്തപഹിതത്തപഗ്ഗഹട്ഠേ പഞ്ഞാ വീരിയാരമ്ഭേ ഞാണം’’.

വീരിയാരമ്ഭഞാണനിദ്ദേസോ അട്ഠതിംസതിമോ.