൩൭. സല്ലേഖട്ഠഞാണനിദ്ദേസോ

൮൮. കഥം പുഥുനാനത്തേകത്തതേജപരിയാദാനേ പഞ്ഞാ സല്ലേഖട്ഠേ [പുഥുനാനത്തേകത്തതേജപരിയാദാനേ (ക.)] ഞാണം? പുഥൂതി – രാഗോ പുഥു, ദോസോ പുഥു, മോഹോ പുഥു, കോധോ…പേ… ഉപനാഹോ… മക്ഖോ… പളാസോ… ഇസ്സാ… മച്ഛരിയം… മായാ… സാഠേയ്യം… ഥമ്ഭോ… സാരമ്ഭോ… മാനോ… അതിമാനോ… മദോ… പമാദോ… സബ്ബേ കിലേസാ… സബ്ബേ ദുച്ചരിതാ… സബ്ബേ അഭിസങ്ഖാരാ… സബ്ബേ ഭവഗാമികമ്മാ.

നാനത്തേകത്തന്തി കാമച്ഛന്ദോ നാനത്തം, നേക്ഖമ്മം ഏകത്തം. ബ്യാപാദോ നാനത്തം, അബ്യാപാദോ ഏകത്തം. ഥിനമിദ്ധം നാനത്തം, ആലോകസഞ്ഞാ ഏകത്തം. ഉദ്ധച്ചം നാനത്തം, അവിക്ഖേപോ ഏകത്തം. വിചികിച്ഛാ നാനത്തം, ധമ്മവവത്ഥാനം ഏകത്തം. അവിജ്ജാ നാനത്തം, ഞാണം ഏകത്തം. അരതി നാനത്തം, പാമോജ്ജം ഏകത്തം. നീവരണാ നാനത്തം, പഠമം ഝാനം ഏകത്തം…പേ… സബ്ബേ കിലേസാ നാനത്തം, അരഹത്തമഗ്ഗോ ഏകത്തം.

തേജോതി പഞ്ച തേജാ – ചരണതേജോ, ഗുണതേജോ, പഞ്ഞാതേജോ, പുഞ്ഞതേജോ, ധമ്മതേജോ. ചരണതേജേന തേജിതത്താ ദുസ്സീല്യതേജം പരിയാദിയതി. ഗുണതേജേന തേജിതത്താ അഗുണതേജം പരിയാദിയതി. പഞ്ഞാതേജേന തേജിതത്താ ദുപ്പഞ്ഞതേജം പരിയാദിയതി. പുഞ്ഞതേജേന തേജിതത്താ അപുഞ്ഞതേജം പരിയാദിയതി. ധമ്മതേജേന തേജിതത്താ അധമ്മതേജം പരിയാദിയതി.

സല്ലേഖോതി കാമച്ഛന്ദോ അസല്ലേഖോ, നേക്ഖമ്മം സല്ലേഖോ. ബ്യാപാദോ അസല്ലേഖോ, അബ്യാപാദോ സല്ലേഖോ. ഥിനമിദ്ധം അസല്ലേഖോ, ആലോകസഞ്ഞാ സല്ലേഖോ. ഉദ്ധച്ചം അസല്ലേഖോ, അവിക്ഖേപോ സല്ലേഖോ. വിചികിച്ഛാ അസല്ലേഖോ, ധമ്മവവത്ഥാനം സല്ലേഖോ. അവിജ്ജാ അസല്ലേഖോ, ഞാണം സല്ലേഖോ. അരതി അസല്ലേഖോ, പാമോജ്ജം സല്ലേഖോ. നീവരണാ അസല്ലേഖോ, പഠമം ഝാനം സല്ലേഖോ…പേ… സബ്ബകിലേസാ അസല്ലേഖോ, അരഹത്തമഗ്ഗോ സല്ലേഖോ. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘പുഥുനാനത്തതേജപരിയാദാനേ പഞ്ഞാ സല്ലേഖട്ഠേ ഞാണം’’.

സല്ലേഖട്ഠഞാണനിദ്ദേസോ സത്തതിംസതിമോ.