൩൬. സമസീസട്ഠഞാണനിദ്ദേസോ

൮൭. കഥം സബ്ബധമ്മാനം സമ്മാ സമുച്ഛേദേ നിരോധേ ച അനുപട്ഠാനതാ പഞ്ഞാ സമസീസട്ഠേ ഞാണം? സബ്ബധമ്മാനന്തി – പഞ്ചക്ഖന്ധാ, ദ്വാദസായതനാനി, അട്ഠാരസ ധാതുയോ, കുസലാ ധമ്മാ, അകുസലാ ധമ്മാ, അബ്യാകതാ ധമ്മാ, കാമാവചരാ ധമ്മാ, രൂപാവചരാ ധമ്മാ, അരൂപാവചരാ ധമ്മാ, അപരിയാപന്നാ ധമ്മാ. സമ്മാ സമുച്ഛേദേതി നേക്ഖമ്മേന കാമച്ഛന്ദം സമ്മാ സമുച്ഛിന്ദതി. അബ്യാപാദേന ബ്യാപാദം സമ്മാ സമുച്ഛിന്ദതി. ആലോകസഞ്ഞായ ഥിനമിദ്ധം സമ്മാ സമുച്ഛിന്ദതി. അവിക്ഖേപേന ഉദ്ധച്ചം സമ്മാ സമുച്ഛിന്ദതി. ധമ്മവവത്ഥാനേന വിചികിച്ഛം സമ്മാ സമുച്ഛിന്ദതി. ഞാണേന അവിജ്ജം സമ്മാ സമുച്ഛിന്ദതി. പാമോജ്ജേന അരതിം സമ്മാ സമുച്ഛിന്ദതി. പഠമേന ഝാനേന നീവരണേ സമ്മാ സമുച്ഛിന്ദതി…പേ… അരഹത്തമഗ്ഗേന സബ്ബകിലേസേ സമ്മാ സമുച്ഛിന്ദതി.

നിരോധേതി നേക്ഖമ്മേന കാമച്ഛന്ദം നിരോധേതി. അബ്യാപാദേന ബ്യാപാദം നിരോധേതി. ആലോകസഞ്ഞായ ഥിനമിദ്ധം നിരോധേതി. അവിക്ഖേപേന ഉദ്ധച്ചം നിരോധേതി. ധമ്മവവത്ഥാനേന വിചികിച്ഛം നിരോധേതി. ഞാണേന അവിജ്ജം നിരോധേതി. പാമോജ്ജേന അരതിം നിരോധേതി. പഠമേന ഝാനേന നീവരണേ നിരോധേതി…പേ… അരഹത്തമഗ്ഗേന സബ്ബകിലേസേ നിരോധേതി.

അനുപട്ഠാനതാതി നേക്ഖമ്മം പടിലദ്ധസ്സ കാമച്ഛന്ദോ ന ഉപട്ഠാതി. അബ്യാപാദം പടിലദ്ധസ്സ ബ്യാപാദോ ന ഉപട്ഠാതി. ആലോകസഞ്ഞം പടിലദ്ധസ്സ ഥിനമിദ്ധം ന ഉപട്ഠാതി. അവിക്ഖേപം പടിലദ്ധസ്സ ഉദ്ധച്ചം ന ഉപട്ഠാതി. ധമ്മവവത്ഥാനം പടിലദ്ധസ്സ വിചികിച്ഛാ ന ഉപട്ഠാതി. ഞാണം പടിലദ്ധസ്സ അവിജ്ജാ ന ഉപട്ഠാതി. പാമോജ്ജം പടിലദ്ധസ്സ അരതി ന ഉപട്ഠാതി. പഠമം ഝാനം പടിലദ്ധസ്സ നീവരണാ ന ഉപട്ഠഹന്തി…പേ… അരഹത്തമഗ്ഗം പടിലദ്ധസ്സ സബ്ബകിലേസാ ന ഉപട്ഠഹന്തി.

സമന്തി കാമച്ഛന്ദസ്സ പഹീനത്താ നേക്ഖമ്മം സമം. ബ്യാപാദസ്സ പഹീനത്താ അബ്യാപാദോ സമം. ഥിനമിദ്ധസ്സ പഹീനത്താ ആലോകസഞ്ഞാ സമം. ഉദ്ധച്ചസ്സ പഹീനത്താ അവിക്ഖേപോ സമം. വിചികിച്ഛായ പഹീനത്താ ധമ്മവവത്ഥാനം സമം. അവിജ്ജായ പഹീനത്താ ഞാണം സമം. അരതിയാ പഹീനത്താ പാമോജ്ജം സമം. നീവരണാനം പഹീനത്താ പഠമം ഝാനം സമം…പേ… സബ്ബകിലേസാനം പഹീനത്താ അരഹത്തമഗ്ഗോ സമം.

സീസന്തി തേരസ സീസാനി – പലിബോധസീസഞ്ച തണ്ഹാ, വിനിബന്ധനസീസഞ്ച മാനോ, പരാമാസസീസഞ്ച ദിട്ഠി, വിക്ഖേപസീസഞ്ച ഉദ്ധച്ചം, സംകിലേസസീസഞ്ച അവിജ്ജാ, അധിമോക്ഖസീസഞ്ച സദ്ധാ, പഗ്ഗഹസീസഞ്ച വീരിയം, ഉപട്ഠാനസീസഞ്ച സതി, അവിക്ഖേപസീസഞ്ച സമാധി, ദസ്സനസീസഞ്ച പഞ്ഞാ, പവത്തസീസഞ്ച ജീവിതിന്ദ്രിയം, ഗോചരസീസഞ്ച വിമോക്ഖോ, സങ്ഖാരസീസഞ്ച നിരോധോ. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘സബ്ബധമ്മാനം സമ്മാ സമുച്ഛേദേ നിരോധേ ച അനുപട്ഠാനതാ പഞ്ഞാ സമസീസട്ഠേ ഞാണം’’.

സമസീസട്ഠഞാണനിദ്ദേസോ ഛത്തിംസതിമോ.