൩൫. പരിനിബ്ബാനഞാണനിദ്ദേസോ

൮൬. കഥം സമ്പജാനസ്സ പവത്തപരിയാദാനേ പഞ്ഞാ പരിനിബ്ബാനേ ഞാണം? ഇധ സമ്പജാനോ നേക്ഖമ്മേന കാമച്ഛന്ദസ്സ പവത്തം പരിയാദിയതി, അബ്യാപാദേന ബ്യാപാദസ്സ പവത്തം പരിയാദിയതി, ആലോകസഞ്ഞായ ഥിനമിദ്ധസ്സ പവത്തം പരിയാദിയതി, അവിക്ഖേപേന ഉദ്ധച്ചസ്സ പവത്തം പരിയാദിയതി, ധമ്മവവത്ഥാനേന വിചികിച്ഛായ…പേ… ഞാണേന അവിജ്ജായ… പാമോജ്ജേന അരതിയാ … പഠമേന ഝാനേന നീവരണാനം പവത്തം പരിയാദിയതി…പേ… അരഹത്തമഗ്ഗേന സബ്ബകിലേസാനം പവത്തം പരിയാദിയതി.

അഥ വാ പന സമ്പജാനസ്സ അനുപാദിസേസായ നിബ്ബാനധാതുയാ പരിനിബ്ബായന്തസ്സ ഇദഞ്ചേവ ചക്ഖുപവത്തം പരിയാദിയതി, അഞ്ഞഞ്ച ചക്ഖുപവത്തം ന ഉപ്പജ്ജതി. ഇദഞ്ചേവ സോതപവത്തം…പേ… ഘാനപവത്തം… ജിവ്ഹാപവത്തം… കായപവത്തം… മനോപവത്തം പരിയാദിയതി, അഞ്ഞഞ്ച മനോപവത്തം ന ഉപ്പജ്ജതി. ഇദം സമ്പജാനസ്സ പവത്തപരിയാദാനേ പഞ്ഞാ പരിനിബ്ബാനേ ഞാണം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘സമ്പജാനസ്സ പവത്തപരിയാദാനേ പഞ്ഞാ പരിനിബ്ബാനേ ഞാണം’’.

പരിനിബ്ബാനഞാണനിദ്ദേസോ പഞ്ചതിംസതിമോ.