൨൦-൨൪. ഞാണപഞ്ചകനിദ്ദേസോ

൭൫. കഥം അഭിഞ്ഞാപഞ്ഞാ ഞാതട്ഠേ ഞാണം, പരിഞ്ഞാപഞ്ഞാ തീരണട്ഠേ ഞാണം, പഹാനേപഞ്ഞാ പരിച്ചാഗട്ഠേ ഞാണം, ഭാവനാ പഞ്ഞാ ഏകരസട്ഠേ ഞാണം, സച്ഛികിരിയാപഞ്ഞാ ഫസ്സനട്ഠേ ഞാണം? യേ യേ ധമ്മാ അഭിഞ്ഞാതാ ഹോന്തി, തേ തേ ധമ്മാ ഞാതാ ഹോന്തി. യേ യേ ധമ്മാ പരിഞ്ഞാതാ ഹോന്തി, തേ തേ ധമ്മാ തീരിതാ ഹോന്തി. യേ യേ ധമ്മാ പഹീനാ ഹോന്തി, തേ തേ ധമ്മാ പരിച്ചത്താ ഹോന്തി. യേ യേ ധമ്മാ ഭാവിതാ ഹോന്തി, തേ തേ ധമ്മാ ഏകരസാ ഹോന്തി. യേ യേ ധമ്മാ സച്ഛികതാ ഹോന്തി, തേ തേ ധമ്മാ ഫസ്സിതാ ഹോന്തി. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘അഭിഞ്ഞാ പഞ്ഞാ ഞാതട്ഠേ ഞാണം, പരിഞ്ഞാ പഞ്ഞാ തീരണട്ഠേ ഞാണം, പഹാനേ പഞ്ഞാ പരിച്ചാഗട്ഠേ ഞാണം, ഭാവനാ പഞ്ഞാ ഏകരസട്ഠേ ഞാണം, സച്ഛികിരിയാ പഞ്ഞാ ഫുസനട്ഠേ ഞാണം’’.

ഞാണപഞ്ചകനിദ്ദേസോ ചതുവീസതിമോ.