൨. സീലമയഞാണനിദ്ദേസോ

൩൭. കഥം സുത്വാന സംവരേ പഞ്ഞാ സീലമയേ ഞാണം? പഞ്ച സീലാനി – പരിയന്തപാരിസുദ്ധിസീലം, അപരിയന്തപാരിസുദ്ധിസീലം, പരിപുണ്ണപാരിസുദ്ധിസീലം, അപരാമട്ഠപാരിസുദ്ധിസീലം, പടിപ്പസ്സദ്ധിപാരിസുദ്ധിസീലന്തി.

തത്ഥ കതമം പരിയന്തപാരിസുദ്ധിസീലം? അനുപസമ്പന്നാനം പരിയന്തസിക്ഖാപദാനം – ഇദം പരിയന്തപാരിസുദ്ധിസീലം. കതമം അപരിയന്തപാരിസുദ്ധിസീലം? ഉപസമ്പന്നാനം അപരിയന്തസിക്ഖാപദാനം – ഇദം അപരിയന്തപാരിസുദ്ധിസീലം. കതമം പരിപുണ്ണപാരിസുദ്ധിസീലം? പുഥുജ്ജനകല്യാണകാനം കുസലധമ്മേ യുത്താനം സേക്ഖപരിയന്തേ [സേഖപരിയന്തേ (ക.)] പരിപൂരകാരീനം കായേ ച ജീവിതേ ച അനപേക്ഖാനം പരിച്ചത്തജീവിതാനം – ഇദം പരിപുണ്ണപാരിസുദ്ധിസീലം. കതമം അപരാമട്ഠപാരിസുദ്ധിസീലം? സത്തന്നം സേക്ഖാനം – ഇദം അപരാമട്ഠപാരിസുദ്ധിസീലം. കതമം പടിപ്പസ്സദ്ധിപാരിസുദ്ധിസീലം? തഥാഗതസാവകാനം ഖീണാസവാനം പച്ചേകബുദ്ധാനം തഥാഗതാനം അരഹന്താനം സമ്മാസമ്ബുദ്ധാനം – ഇദം പടിപ്പസ്സദ്ധിപാരിസുദ്ധിസീലം.

൩൮. അത്ഥി സീലം പരിയന്തം, അത്ഥി സീലം അപരിയന്തം. തത്ഥ കതമം തം സീലം പരിയന്തം? അത്ഥി സീലം ലാഭപരിയന്തം, അത്ഥി സീലം യസപരിയന്തം, അത്ഥി സീലം ഞാതിപരിയന്തം, അത്ഥി സീലം അങ്ഗപരിയന്തം, അത്ഥി സീലം ജീവിതപരിയന്തം.

കതമം തം സീലം ലാഭപരിയന്തം? ഇധേകച്ചോ ലാഭഹേതു ലാഭപച്ചയാ ലാഭകാരണാ യഥാസമാദിന്നം [യഥാസമാദിണ്ണം (ക.)] സിക്ഖാപദം വീതിക്കമതി – ഇദം തം സീലം ലാഭപരിയന്തം. കതമം തം സീലം യസപരിയന്തം? ഇധേകച്ചോ യസഹേതു യസപച്ചയാ യസകാരണാ യഥാസമാദിന്നം സിക്ഖാപദം വീതിക്കമതി – ഇദം തം സീലം യസപരിയന്തം. കതമം തം സീലം ഞാതിപരിയന്തം? ഇധേകച്ചോ ഞാതിഹേതു ഞാതിപച്ചയാ ഞാതികാരണാ യഥാസമാദിന്നം സിക്ഖാപദം വീതിക്കമതി – ഇദം തം സീലം ഞാതിപരിയന്തം. കതമം തം സീലം അങ്ഗപരിയന്തം? ഇധേകച്ചോ അങ്ഗഹേതു അങ്ഗപച്ചയാ അങ്ഗകാരണാ യഥാസമാദിന്നം സിക്ഖാപദം വീതിക്കമതി – ഇദം തം സീലം അങ്ഗപരിയന്തം. കതമം തം സീലം ജീവിതപരിയന്തം? ഇധേകച്ചോ ജീവിതഹേതു ജീവിതപച്ചയാ ജീവിതകാരണാ യഥാസമാദിന്നം സിക്ഖാപദം വീതിക്കമതി – ഇദം തം സീലം ജീവിതപരിയന്തം. ഏവരൂപാനി സീലാനി ഖണ്ഡാനി ഛിദ്ദാനി സബലാനി കമ്മാസാനി ന ഭുജിസ്സാനി ന വിഞ്ഞുപ്പസത്ഥാനി [ന വിഞ്ഞൂപസത്ഥാനി (ക.)] പരാമട്ഠാനി അസമാധിസംവത്തനികാനി [ന സമാധിസംവത്തനികാനി (ക.)] ന അവിപ്പടിസാരവത്ഥുകാനി ന പാമോജ്ജവത്ഥുകാനി ന പീതിവത്ഥുകാനി ന പസ്സദ്ധിവത്ഥുകാനി ന സുഖവത്ഥുകാനി ന സമാധിവത്ഥുകാനി ന യഥാഭൂതഞാണദസ്സനവത്ഥുകാനി ന ഏകന്തനിബ്ബിദായ ന വിരാഗായ ന നിരോധായ ന ഉപസമായ ന അഭിഞ്ഞായ ന സമ്ബോധായ ന നിബ്ബാനായ സംവത്തന്തി – ഇദം തം സീലം പരിയന്തം.

കതമം തം സീലം അപരിയന്തം? അത്ഥി സീലം ന ലാഭപരിയന്തം, അത്ഥി സീലം ന യസപരിയന്തം, അത്ഥി സീലം ന ഞാതിപരിയന്തം, അത്ഥി സീലം ന അങ്ഗപരിയന്തം, അത്ഥി സീലം ന ജീവിതപരിയന്തം.

കതമം തം സീലം ന ലാഭപരിയന്തം? ഇധേകച്ചോ ലാഭഹേതു ലാഭപച്ചയാ ലാഭകാരണാ യഥാസമാദിന്നം സിക്ഖാപദം വീതിക്കമായ ചിത്തമ്പി ന ഉപ്പാദേതി, കിം സോ വീതിക്കമിസ്സതി! ഇദം തം സീലം ന ലാഭപരിയന്തം. കതമം തം സീലം ന യസപരിയന്തം? ഇധേകച്ചോ യസഹേതു യസപച്ചയാ യസകാരണാ യഥാസമാദിന്നം സിക്ഖാപദം വീതിക്കമായ ചിത്തമ്പി ന ഉപ്പാദേതി, കിം സോ വീതിക്കമിസ്സതി! ഇദം തം സീലം ന യസപരിയന്തം. കതമം തം സീലം ന ഞാതിപരിയന്തം? ഇധേകച്ചോ ഞാതിഹേതു ഞാതിപച്ചയാ ഞാതികാരണാ യഥാസമാദിന്നം സിക്ഖാപദം വീതിക്കമായ ചിത്തമ്പി ന ഉപ്പാദേതി, കിം സോ വീതിക്കമിസ്സതി! ഇദം തം സീലം ന ഞാതിപരിയന്തം. കതമം തം സീലം ന അങ്ഗപരിയന്തം? ഇധേകച്ചോ അങ്ഗഹേതു അങ്ഗപച്ചയാ അങ്ഗകാരണാ യഥാസമാദിന്നം സിക്ഖാപദം വീതിക്കമായ ചിത്തമ്പി ന ഉപ്പാദേതി, കിം സോ വീതിക്കമിസ്സതി! ഇദം തം സീലം ന അങ്ഗപരിയന്തം. കതമം തം സീലം ന ജീവിതപരിയന്തം? ഇധേകച്ചോ ജീവിതഹേതു ജീവിതപച്ചയാ ജീവിതകാരണാ യഥാസമാദിന്നം സിക്ഖാപദം വീതിക്കമായ ചിത്തമ്പി ന ഉപ്പാദേതി, കിം സോ വീതിക്കമിസ്സതി! ഇദം തം സീലം ന ജീവിതപരിയന്തം. ഏവരൂപാനി സീലാനി അഖണ്ഡാനി അച്ഛിദ്ദാനി അസബലാനി അകമ്മാസാനി ഭുജിസ്സാനി വിഞ്ഞുപ്പസത്ഥാനി അപരാമട്ഠാനി സമാധിസംവത്തനികാനി അവിപ്പടിസാരവത്ഥുകാനി പാമോജ്ജവത്ഥുകാനി പീതിവത്ഥുകാനി പസ്സദ്ധിവത്ഥുകാനി സുഖവത്ഥുകാനി സമാധിവത്ഥുകാനി യഥാഭൂതഞാണദസ്സനവത്ഥുകാനി ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തന്തി – ഇദം തം സീലം അപരിയന്തം.

൩൯. കിം സീലം? കതി സീലാനി? കിം സമുട്ഠാനം സീലം? കതി ധമ്മസമോധാനം സീലം?

കിം സീലന്തി ചേതനാ സീലം, ചേതസികം സീലം, സംവരോ സീലം, അവീതിക്കമോ സീലം. കതി സീലാനീതി തീണി സീലാനി – കുസലസീലം, അകുസലസീലം, അബ്യാകതസീലം.കിം സമുട്ഠാനം സീലന്തി കുസലചിത്തസമുട്ഠാനം കുസലസീലം, അകുസലചിത്തസമുട്ഠാനം അകുസലസീലം, അബ്യാകതചിത്തസമുട്ഠാനം അബ്യാകതസീലം. കതി ധമ്മസമോധാനം സീലന്തി സംവരസമോധാനം സീലം, അവീതിക്കമസമോധാനം സീലം, തഥാഭാവേ ജാതചേതനാസമോധാനം സീലം.

൪൦. പാണാതിപാതം സംവരട്ഠേന സീലം, അവീതിക്കമട്ഠേന സീലം. അദിന്നാദാനം സംവരട്ഠേന സീലം, അവീതിക്കമട്ഠേന സീലം. കാമേസുമിച്ഛാചാരം സംവരട്ഠേന സീലം, അവീതിക്കമട്ഠേന സീലം. മുസാവാദം സംവരട്ഠേന സീലം, അവീതിക്കമട്ഠേന സീലം. പിസുണം വാചം [പിസുണാവാചം (സ്യാ. ക.) ദീ. നി. ൧.൯ പസ്സിതബ്ബാ] സംവരട്ഠേന സീലം, അവീതിക്കമട്ഠേന സീലം. ഫരുസം വാചം [ഫരുസവാചം (സ്യാ. ക.)] സംവരട്ഠേന സീലം, അവീതിക്കമട്ഠേന സീലം. സമ്ഫപ്പലാപം സംവരട്ഠേന സീലം, അവീതിക്കമട്ഠേന സീലം. അഭിജ്ഝം സംവരട്ഠേന സീലം, അവീതിക്കമട്ഠേന സീലം. ബ്യാപാദം സംവരട്ഠേന സീലം, അവീതിക്കമട്ഠേന സീലം. മിച്ഛാദിട്ഠിം സംവരട്ഠേന സീലം, അവീതിക്കമട്ഠേന സീലം.

൪൧. നേക്ഖമ്മേന കാമച്ഛന്ദം സംവരട്ഠേന സീലം, അവീതിക്കമട്ഠേന സീലം. അബ്യാപാദേന ബ്യാപാദം സംവരട്ഠേന സീലം, അവീതിക്കമട്ഠേന സീലം. ആലോകസഞ്ഞായ ഥിനമിദ്ധം…പേ… അവിക്ഖേപട്ഠേന ഉദ്ധച്ചം… ധമ്മവവത്ഥാനേന വിചികിച്ഛം… ഞാണേന അവിജ്ജം… പാമോജ്ജേന അരതിം….

പഠമേന ഝാനേന [പഠമജ്ഝാനേന (സ്യാ.) ഏവമീദിസേസു ഠാനേസു] നീവരണേ…പേ… ദുതിയേന ഝാനേന വിതക്കവിചാരേ… തതിയേന ഝാനേന പീതിം… ചതുത്ഥേന ഝാനേന സുഖദുക്ഖം… ആകാസാനഞ്ചായതനസമാപത്തിയാ രൂപസഞ്ഞം പടിഘസഞ്ഞം നാനത്തസഞ്ഞം… വിഞ്ഞാണഞ്ചായതനസമാപത്തിയാ ആകാസാനഞ്ചായതനസഞ്ഞം… ആകിഞ്ചഞ്ഞായതനസമാപത്തിയാ വിഞ്ഞാണഞ്ചായതനസഞ്ഞം… നേവസഞ്ഞാനാസഞ്ഞായതനസമാപത്തിയാ ആകിഞ്ചഞ്ഞായതനസഞ്ഞം.

അനിച്ചാനുപസ്സനായ നിച്ചസഞ്ഞം…പേ… ദുക്ഖാനുപസ്സനായ സുഖസഞ്ഞം… അനത്താ അനുപസ്സനായ അത്തസഞ്ഞം… നിബ്ബിദാനുപസ്സനായ നന്ദിം… വിരാഗാനുപസ്സനായ രാഗം… നിരോധാ അനുപസ്സനായ സമുദയം… പടിനിസ്സഗ്ഗാനുപസ്സനായ ആദാനം… ഖയാനുപസ്സനായ ഘനസഞ്ഞം… വയാനുപസ്സനായ ആയൂഹനം.. വിപരിണാമാനുപസ്സനായ ധുവസഞ്ഞം… അനിമിത്താനുപസ്സനായ നിമിത്തം…. അപ്പണിഹിതാനുപസ്സനായ പണിധിം… സുഞ്ഞതാനുപസ്സനായ അഭിനിവേസം… അധിപഞ്ഞാധമ്മവിപസ്സനായ സാരാദാനാഭിനിവേസം… യഥാഭൂതഞാണദസ്സനേന സമ്മോഹാഭിനിവേസം… ആദീനവാനുപസ്സനായ ആലയാഭിനിവേസം… പടിസങ്ഖാനുപസ്സനായ അപ്പടിസങ്ഖം… വിവട്ടനാനുപസ്സനായ സഞ്ഞോഗാഭിനിവേസം….

സോതാപത്തിമഗ്ഗേന ദിട്ഠേകട്ഠേ കിലേസേ…പേ… സകദാഗാമിമഗ്ഗേന ഓളാരികേ കിലേസേ… അനാഗാമിമഗ്ഗേന അണുസഹഗതേ കിലേസേ… അരഹത്തമഗ്ഗേന സബ്ബകിലേസേ സംവരട്ഠേന സീലം, അവീതിക്കമട്ഠേന സീലം.

പഞ്ച സീലാനി – പാണാതിപാതസ്സ പഹാനം സീലം, വേരമണീ സീലം, ചേതനാ സീലം, സംവരോ സീലം, അവീതിക്കമോ സീലം. ഏവരൂപാനി സീലാനി ചിത്തസ്സ അവിപ്പടിസാരായ സംവത്തന്തി, പാമോജ്ജായ സംവത്തന്തി, പീതിയാ സംവത്തന്തി, പസ്സദ്ധിയാ സംവത്തന്തി, സോമനസ്സായ സംവത്തന്തി, ആസേവനായ സംവത്തന്തി, ഭാവനായ സംവത്തന്തി, ബഹുലീകമ്മായ സംവത്തന്തി, അലങ്കാരായ സംവത്തന്തി, പരിക്ഖാരായ സംവത്തന്തി, പരിവാരായ സംവത്തന്തി, പാരിപൂരിയാ സംവത്തന്തി, ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തന്തി.

ഏവരൂപാനം സീലാനം സംവരപാരിസുദ്ധി അധിസീലം, സംവരപാരിസുദ്ധിയാ ഠിതം ചിത്തം ന വിക്ഖേപം ഗച്ഛതി, അവിക്ഖേപപാരിസുദ്ധി അധിചിത്തം സംവരപാരിസുദ്ധിം സമ്മാ പസ്സതി, അവിക്ഖേപപാരിസുദ്ധിം സമ്മാ പസ്സതി. ദസ്സനപാരിസുദ്ധി അധിപഞ്ഞാ. യോ തത്ഥ സംവരട്ഠോ, അയം അധിസീലസിക്ഖാ. യോ തത്ഥ അവിക്ഖേപട്ഠോ, അയം അധിചിത്തസിക്ഖാ. യോ തത്ഥ ദസ്സനട്ഠോ, അയം അധിപഞ്ഞാസിക്ഖാ.

ഇമാ തിസ്സോ സിക്ഖായോ ആവജ്ജന്തോ സിക്ഖതി, ജാനന്തോ സിക്ഖതി, പസ്സന്തോ സിക്ഖതി, പച്ചവേക്ഖന്തോ സിക്ഖതി, ചിത്തം അധിട്ഠഹന്തോ സിക്ഖതി, സദ്ധായ അധിമുച്ചന്തോ സിക്ഖതി, വീരിയം പഗ്ഗണ്ഹന്തോ സിക്ഖതി, സതിം ഉപട്ഠപേന്തോ സിക്ഖതി, ചിത്തം സമാദഹന്തോ സിക്ഖതി, പഞ്ഞായ പജാനന്തോ സിക്ഖതി, അഭിഞ്ഞേയ്യം അഭിജാനന്തോ സിക്ഖതി, പരിഞ്ഞേയ്യം പരിജാനന്തോ സിക്ഖതി, പഹാതബ്ബം പജഹന്തോ സിക്ഖതി, സച്ഛികാതബ്ബം സച്ഛികരോന്തോ സിക്ഖതി, ഭാവേതബ്ബം ഭാവേന്തോ സിക്ഖതി.

പഞ്ച സീലാനി – അദിന്നാദാനസ്സ…പേ… കാമേസുമിച്ഛാചാരസ്സ… മുസാവാദസ്സ… പിസുണായ വാചായ… ഫരുസായ വാചായ… സമ്ഫപ്പലാപസ്സ… അഭിജ്ഝായ… ബ്യാപാദസ്സ… മിച്ഛാദിട്ഠിയാ… ഭാവേതബ്ബം ഭാവേന്തോ സിക്ഖന്തി.

നേക്ഖമ്മേന കാമച്ഛന്ദസ്സ…പേ… അബ്യാപാദേന ബ്യാപാദസ്സ… ആലോകസഞ്ഞായ ഥിനമിദ്ധസ്സ… അവിക്ഖേപേന ഉദ്ധച്ചസ്സ… … ധമ്മവവത്ഥാനേന വിചികിച്ഛായ… ഞാണേന അവിജ്ജായ… പാമോജ്ജേന അരതിയാ… ഭാവേതബ്ബം ഭാവേന്തോ സിക്ഖതി.

പഠമേന ഝാനേന നീവരണാനം…പേ… ദുതിയേന ഝാനേന വിതക്കവിചാരാനം… തതിയേന ഝാനേന പീതിയാ… ചതുത്ഥേന ഝാനേന സുഖദുക്ഖാനം… ആകാസാനഞ്ചായതനസമാപത്തിയാ രൂപസഞ്ഞായ പടിഘസഞ്ഞായ നാനത്തസഞ്ഞായ… വിഞ്ഞാണഞ്ചായതനസമാപത്തിയാ ആകാസാനഞ്ചായതനസഞ്ഞായ… ആകിഞ്ചഞ്ഞായതനസമാപത്തിയാ വിഞ്ഞാണഞ്ചായതനസഞ്ഞായ… നേവസഞ്ഞാനാസഞ്ഞായതനസമാപത്തിയാ ആകിഞ്ചഞ്ഞായതനസഞ്ഞായ… ഭാവേതബ്ബം ഭാവേന്തോ സിക്ഖതി.

അനിച്ചാനുപസ്സനായ നിച്ചസഞ്ഞായ…പേ… ദുക്ഖാനുപസ്സനായ സുഖസഞ്ഞായ… അനത്താനുപസ്സനായ അത്തസഞ്ഞായ… നിബ്ബിദാനുപസ്സനായ നന്ദിയാ… വിരാഗാനുപസ്സനായ രാഗസ്സ… നിരോധാനുപസ്സനായ സമുദയസ്സ… പടിനിസ്സഗ്ഗാനുപസ്സനായ ആദാനസ്സ… ഖയാനുപസ്സനായ ഘനസഞ്ഞായ… വയാനുപസ്സനായ ആയൂഹനസ്സ… വിപരിണാമാനുപസ്സനായ ധുവസഞ്ഞായ… അനിമിത്താനുപസ്സനായ നിമിത്തസ്സ… അപ്പണിഹിതാനുപസ്സനായ പണിധിയാ… സുഞ്ഞതാനുപസ്സനായ അഭിനിവേസസ്സ… അധിപഞ്ഞാധമ്മവിപസ്സനായ സാരാഗാഭിനിവേസസ്സ… യഥാഭൂതഞാണദസ്സനേന സമ്മോഹാഭിനിവേസസ്സ… ആദീനവാനുപസ്സനായ ആലയാഭിനിവേസസ്സ… പടിസങ്ഖാനുപസ്സനായ അപ്പടിസങ്ഖായ… വിവട്ടനാനുപസ്സനായ സഞ്ഞോഗാഭിനിവേസസ്സ ഭാവേതബ്ബം ഭാവേന്തോ സിക്ഖതി.

സോതാപത്തിമഗ്ഗേന ദിട്ഠേകട്ഠാനം കിലേസാനം…പേ… സകദാഗാമിമഗ്ഗേന ഓളാരികാനം കിലേസാനം… അനാഗാമിമഗ്ഗേന അനുസഹഗതാനം കിലേസാനം… അരഹത്തമഗ്ഗേന സബ്ബകിലേസാനം പഹാനം സീലം, വേരമണീ സീലം, ചേതനാ സീലം, സംവരോ സീലം, അവീതിക്കമോ സീലം. ഏവരൂപാനി സീലാനി ചിത്തസ്സ അവിപ്പടിസാരായ സംവത്തന്തി, പാമോജ്ജായ സംവത്തന്തി, പീതിയാ സംവത്തന്തി, പസ്സദ്ധിയാ സംവത്തന്തി, സോമനസ്സായ സംവത്തന്തി, ആസേവനായ സംവത്തന്തി, ഭാവനായ സംവത്തന്തി, ബഹുലീകമ്മായ സംവത്തന്തി, അലങ്കാരായ സംവത്തന്തി, പരിക്ഖാരായ സംവത്തന്തി, പരിവാരായ സംവത്തന്തി, പാരിപൂരിയാ സംവത്തന്തി, ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തന്തി.

൪൨. ഏവരൂപാനം സീലാനം സംവരപാരിസുദ്ധി അധിസീലം. സംവരപാരിസുദ്ധിയാ ഠിതം ചിത്തം അവിക്ഖേപം ഗച്ഛതി, അവിക്ഖേപപാരിസുദ്ധി അധിചിത്തം. സംവരപാരിസുദ്ധിം സമ്മാ പസ്സതി, അവിക്ഖേപപാരിസുദ്ധിം സമ്മാ പസ്സതി. ദസ്സനപാരിസുദ്ധി അധിപഞ്ഞാ. യോ തത്ഥ സംവരട്ഠോ, അയം അധിസീലസിക്ഖാ. യോ തത്ഥ അവിക്ഖേപട്ഠോ, അയം അധിചിത്തസിക്ഖാ. യോ തത്ഥ ദസ്സനട്ഠോ, അയം അധിപഞ്ഞാസിക്ഖാ. ഇമാ തിസ്സോ സിക്ഖായോ ആവജ്ജന്തോ സിക്ഖതി, ജാനന്തോ സിക്ഖതി, പസ്സന്തോ സിക്ഖതി, പച്ചവേക്ഖന്തോ സിക്ഖതി, ചിത്തം അധിട്ഠഹന്തോ സിക്ഖതി, സദ്ധായ അധിമുച്ചന്തോ സിക്ഖതി, വീരിയം പഗ്ഗണ്ഹന്തോ സിക്ഖതി, സതിം ഉപട്ഠപേന്തോ സിക്ഖതി, ചിത്തം സമാദഹന്തോ സിക്ഖതി, പഞ്ഞായ പജാനന്തോ സിക്ഖതി, അഭിഞ്ഞേയ്യം അഭിജാനന്തോ സിക്ഖതി, പരിഞ്ഞേയ്യം പരിജാനന്തോ സിക്ഖതി പഹാതബ്ബം പജഹന്തോ സിക്ഖതി, സച്ഛികാതബ്ബം സച്ഛികരോന്തോ സിക്ഖതി, ഭാവേതബ്ബം ഭാവേന്തോ സിക്ഖതി. തം ഞാതട്ഠേന ഞാണം പജാനനട്ഠേന പഞ്ഞാ. തേന വുച്ചതി – ‘‘സുത്വാന സംവരേ പഞ്ഞാ സീലമയേ ഞാണം’’.

സീലമയഞാണനിദ്ദേസോ ദുതിയോ.