൯. സൂരിയതപനപഞ്ഹോ

൯. ‘‘ഭന്തേ നാഗസേന, അയം സൂരിയോ സബ്ബകാലം കഠിനം തപതി, ഉദാഹു കിഞ്ചികാലം മന്ദം തപതീ’’തി? ‘‘സബ്ബകാലം, മഹാരാജ, സൂരിയോ കഠിനം തപതി, ന കിഞ്ചികാലം മന്ദം തപതീ’’തി. ‘‘യദി, ഭന്തേ നാഗസേന, സൂരിയോ സബ്ബകാലം കഠിനം തപതി, കിസ്സ പന അപ്പേകദാ സൂരിയോ കഠിനം തപതി, അപ്പേകദാ മന്ദം തപതീ’’തി? ‘‘ചത്താരോമേ, മഹാരാജ, സൂരിയസ്സ രോഗാ, യേസം അഞ്ഞതരേന രോഗേന പടിപീളിതോ സൂരിയോ മന്ദം തപതി. കതമേ ചത്താരോ? അബ്ഭം, മഹാരാജ, സൂരിയസ്സ രോഗോ, തേന രോഗേന പടിപീളിതോ സൂരിയോ മന്ദം തപതി. മഹികാ, മഹാരാജ, സൂരിയസ്സ രോഗോ, തേന രോഗേന പടിപീളിതോ സൂരിയോ മന്ദം തപതി. മേഘോ, മഹാരാജ, സൂരിയസ്സ രോഗോ, തേന രോഗേന പടിപീളിതോ സൂരിയോ മന്ദം തപതി. രാഹു, മഹാരാജ, സൂരിയസ്സ രോഗോ, തേന രോഗേന പടിപീളിതോ സൂരിയോ മന്ദം തപതി. ഇമേ ഖോ, മഹാരാജ, ചത്താരോ സൂരിയസ്സ രോഗാ, യേസം അഞ്ഞതരേന രോഗേന പടിപീളിതോ സൂരിയോ മന്ദം തപതീ’’തി. ‘‘അച്ഛരിയം, ഭന്തേ നാഗസേന, അബ്ഭുതം, ഭന്തേ നാഗസേന, സൂരിയസ്സപി താവ തേജോസമ്പന്നസ്സ രോഗോ ഉപ്പജ്ജിസ്സതി, കിമങ്ഗം പന അഞ്ഞേസം സത്താനം, നത്ഥി, ഭന്തേ, ഏസാ വിഭത്തി അഞ്ഞസ്സ അഞ്ഞത്ര തവാദിസേന ബുദ്ധിമതാ’’തി.

സൂരിയതപനപഞ്ഹോ നവമോ.