൩. ഗിഹിപബ്ബജിതസമ്മാപടിപത്തിപഞ്ഹോ

[൩] ‘‘ഭന്തേ നാഗസേന, ഭാസിതമ്പേതം ഭഗവതാ ‘ഗിഹിനോ വാഹം, ഭിക്ഖവേ, പബ്ബജിതസ്സ വാ സമ്മാപടിപത്തിം വണ്ണേമി, ഗിഹീ വാ ഭിക്ഖവേ പബ്ബജിതോ വാ സമ്മാപടിപന്നോ സമ്മാപടിപത്താധികരണഹേതു ആരാധകോ ഹോതി ഞായം ധമ്മം കുസല’’ന്തി. യദി, ഭന്തേ നാഗസേന, ഗിഹീ ഓദാതവസനോ കാമഭോഗീ പുത്തദാരസമ്ബാധസയനം അജ്ഝാവസന്തോ കാസികചന്ദനം പച്ചനുഭോന്തോ മാലാഗന്ധവിലേപനം ധാരേന്തോ ജാതരൂപരജതം സാദിയന്തോ മണികുണ്ഡല [മണികനക (സീ. പീ.)] വിചിത്തമോളിബദ്ധോ സമ്മാപടിപന്നോ ആരാധകോ ഹോതി ഞായം ധമ്മം കുസലം, പബ്ബജിതോപി ഭണ്ഡുകാസാവവത്ഥവസനോ പരപിണ്ഡമജ്ഝുപഗതോ ചതൂസു സീലക്ഖന്ധേസു സമ്മാപരിപൂരകാരീ ദിയഡ്ഢേസു സിക്ഖാപദസതേസു സമാദായ വത്തന്തോ തേരസസു ധുതഗുണേസു അനവസേസം വത്തന്തോ സമ്മാപടിപന്നോ ആരാധകോ ഹോതി ഞായം ധമ്മം കുസലം. തത്ഥ, ഭന്തേ, കോ വിസേസോ ഗിഹിനോ വാ പബ്ബജിതസ്സ വാ? അഫലം ഹോതി തപോകമ്മം, നിരത്ഥകാ പബ്ബജ്ജാ. വഞ്ഝാ സിക്ഖാപദഗോപനാ, മോഘം ധുതഗുണസമാദാനം, കിം തത്ഥ ദുക്ഖമനുചിണ്ണേന, നനു നാമ സുഖേനേവ സുഖം അധിഗന്തബ്ബ’’ന്തി.

‘‘ഭാസിതമ്പേതം, മഹാരാജ, ഭഗവതാ ‘ഗിഹിനോ വാഹം, ഭിക്ഖവേ, പബ്ബജിതസ്സ വാ സമ്മാപടിപത്തിം വണ്ണേമി, ഗിഹീ വാ, ഭിക്ഖവേ, പബ്ബജിതോ വാ സമ്മാപടിപന്നോ സമ്മാപടിപത്താധികരണഹേതു ആരാധകോ ഹോതി ഞായം ധമ്മം കുസല’’ന്തി. ഏവമേതം, മഹാരാജ, സമ്മാപടിപന്നോവ സേട്ഠോ, പബ്ബജിതോപി, മഹാരാജ, ‘പബ്ബജിതോമ്ഹീ’തി ന സമ്മാ പടിപജ്ജേയ്യ, അഥ ഖോ സോ ആരകാവ സാമഞ്ഞാ, ആരകാവ ബ്രഹ്മഞ്ഞാ, പഗേവ ഗിഹീ ഓദാതവസനോ. ഗിഹീപി, മഹാരാജ, സമ്മാപടിപന്നോ ആരാധകോ ഹോതി ഞായം ധമ്മം കുസലം, പബ്ബജിതോപി, മഹാരാജ, സമ്മാപടിപന്നോ ആരാധകോ ഹോതി ഞായം ധമ്മം കുസലം.

‘‘അപി ച ഖോ, മഹാരാജ, പബ്ബജിതോവ സാമഞ്ഞസ്സ ഇസ്സരോ അധിപതി; പബ്ബജ്ജാ, മഹാരാജ, ബഹുഗുണാ അനേകഗുണാ അപ്പമാണഗുണാ, ന സക്കാ പബ്ബജ്ജായ ഗുണം പരിമാണം കാതും.

‘‘യഥാ, മഹാരാജ, കാമദദസ്സ മണിരതനസ്സ ന സക്കാ ധനേന അഗ്ഘോ പരിമാണം കാതും ‘ഏത്തകം മണിരതനസ്സ മൂല’ന്തി, ഏവമേവ ഖോ, മഹാരാജ, പബ്ബജ്ജാ ബഹുഗുണാ അനേകഗുണാ അപ്പമാണഗുണാ, ന സക്കാ പബ്ബജ്ജായ ഗുണം പരിമാണം കാതും.

‘‘യഥാ വാ പന, മഹാരാജ, മഹാസമുദ്ദേ ഊമിയോ ന സക്കാ പരിമാണം കാതും ‘ഏത്തകാ മഹാസമുദ്ദേ ഊമിയോ’തി, ഏവമേവ ഖോ, മഹാരാജ, പബ്ബജ്ജാ ബഹുഗുണാ അനേകഗുണാ അപ്പമാണഗുണാ, ന സക്കാ പബ്ബജ്ജായ ഗുണം പരിമാണം കാതും.

‘‘പബ്ബജിതസ്സ, മഹാരാജ, യം കിഞ്ചി കരണീയം, സബ്ബം തം ഖിപ്പമേവ സമിജ്ഝതി നോ ചിരരത്തായ. കിം കാരണാ? പബ്ബജിതോ, മഹാരാജ, അപ്പിച്ഛോ ഹോതി സന്തുട്ഠോ പവിവിത്തോ അസംസട്ഠോ ആരദ്ധവീരിയോ നിരാലയോ അനികേതോ പരിപുണ്ണസീലോ സല്ലേഖിതാചാരോ ധുതപ്പടിപത്തികുസലോ ഹോതി, തം കാരണാ പബ്ബജിതസ്സ യം കിഞ്ചി കരണീയം, സബ്ബം തം ഖിപ്പമേവ സമിജ്ഝതി നോ ചിരരത്തായ. യഥാ, മഹാരാജ, നിഗ്ഗണ്ഠിസമസുധോതഉജുവിമലനാരാചോ സുസജ്ജിതോ സമ്മാ വഹതി, ഏവമേവ ഖോ, മഹാരാജ, പബ്ബജിതസ്സ യം കിഞ്ചി കരണീയം, സബ്ബം തം ഖിപ്പമേവ സമിജ്ഝതി നോ ചിരരത്തായാ’’തി. ‘‘സാധു, ഭന്തേ നാഗസേന, ഏവമേതം തഥാ സമ്പടിച്ഛാമീ’’തി.

ഗിഹിപബ്ബജിതസമ്മാപടിപത്തിപഞ്ഹോ തതിയോ.