൭. സരാഗവീതരാഗനാനാകരണപഞ്ഹോ

൭. രാജാ ആഹ ‘‘ഭന്തേ നാഗസേന, കിം നാനാകരണം സരാഗസ്സ ച വീതരാഗസ്സ ചാ’’തി? ‘‘ഏകോ ഖോ, മഹാരാജ, അജ്ഝോസിതോ, ഏകോ അനജ്ഝോസിതോ’’തി. ‘‘കിം ഏതം, ഭന്തേ, അജ്ഝോസിതോ അനജ്ഝോസിതോ നാമാ’’തി? ‘‘ഏകോ ഖോ, മഹാരാജ, അത്ഥികോ, ഏകോ അനത്ഥികോ’’തി. ‘‘പസ്സാമഹം, ഭന്തേ, ഏവരൂപം യോ ച സരാഗോ, യോ ച വീതരാഗോ, സബ്ബോപേസോ സോഭനം യേവ ഇച്ഛതി ഖാദനീയം വാ ഭോജനീയം വാ, ന കോചി പാപകം ഇച്ഛതീ’’തി. ‘‘അവീതരാഗോ ഖോ, മഹാരാജ, രസപടിസംവേദീ ച രസരാഗപടിസംവേദീ ച ഭോജനം ഭുഞ്ജതി, വീതരാഗോ പന രസപടിസംവേദീ ഭോജനം ഭുഞ്ജതി, നോ ച ഖോ രസരാഗപടിസംവേദീ’’തി.

‘‘കല്ലോസി, ഭന്തേ നാഗസേനാ’’തി.

സരാഗവീതരാഗനാനാകരണപഞ്ഹോ സത്തമോ.