൮. കമ്മഫലഅത്ഥിഭാവപഞ്ഹോ

൮. രാജാ ആഹ ‘‘ഭന്തേ നാഗസേന, ഇമിനാ നാമരൂപേന കമ്മം കതം കുസലം വാ അകുസലം വാ, കുഹിം താനി കമ്മാനി തിട്ഠന്തീ’’തി? ‘‘അനുബന്ധേയ്യും ഖോ, മഹാരാജ, താനി കമ്മാനി ഛായാവ അനപായിനീ’’തി [അനുപായിനീതി (ക.)]. ‘‘സക്കാ പന, ഭന്തേ, താനി കമ്മാനി ദസ്സേതും ‘ഇധ വാ ഇധ വാ താനി കമ്മാനി തിട്ഠന്തീ’’’തി? ‘‘ന സക്കാ, മഹാരാജ, താനി കമ്മാനി ദസ്സേതും ‘ഇധ വാ ഇധ വാ താനി കമ്മാനി തിട്ഠന്തീ’’’തി.

‘‘ഓപമ്മം കരോഹീ’’തി. ‘‘തം കിം മഞ്ഞസി, മഹാരാജ, യാനിമാനി രുക്ഖാനി അനിബ്ബത്തഫലാനി, സക്കാ തേസം ഫലാനി ദസ്സേതും ‘ഇധ വാ ഇധ വാ താനി ഫലാനി തിട്ഠന്തീ’’’തി. ‘‘ന ഹി, ഭന്തേ’’തി. ‘‘ഏവമേവ ഖോ, മഹാരാജ, അബ്ബോച്ഛിന്നായ സന്തതിയാ ന സക്കാ താനി കമ്മാനി ദസ്സേതും ‘ഇധ വാ ഇധ വാ താനി കമ്മാനി തിട്ഠന്തീ’തി.

‘‘കല്ലോസി, ഭന്തേ നാഗസേനാ’’തി.

കമ്മഫലഅത്ഥിഭാവപഞ്ഹോ അട്ഠമോ.