൮. നിരോധനിബ്ബാനപഞ്ഹോ

൮. രാജാ ആഹ ‘‘ഭന്തേ നാഗസേന, നിരോധോ നിബ്ബാന’’ന്തി? ‘‘ആമ, മഹാരാജ, നിരോധോ നിബ്ബാന’’ന്തി. ‘‘കഥം, ഭന്തേ, നാഗസേന, നിരോധോ നിബ്ബാന’’ന്തി? ‘‘സബ്ബേ ബാലപുഥുജ്ജനാ ഖോ, മഹാരാജ, അജ്ഝത്തികബാഹിരേ ആയതനേ അഭിനന്ദന്തി അഭിവദന്തി അജ്ഝോസായ തിട്ഠന്തി, തേ തേന സോതേന വുയ്ഹന്തി, ന പരിമുച്ചന്തി ജാതിയാ ജരായ മരണേന സോകേന പരിദേവേന ദുക്ഖേഹി ദോമനസ്സേഹി ഉപായാസേഹി ന പരിമുച്ചന്തി ദുക്ഖസ്മാതി വദാമി. സുതവാ ച ഖോ, മഹാരാജ, അരിയസാവകോ അജ്ഝത്തികബാഹിരേ ആയതനേ നാഭിനന്ദതി നാഭിവദതി നാജ്ഝോസായ തിട്ഠതി, തസ്സ തം അനഭിനന്ദതോ അനഭിവദതോ അനജ്ഝോസായ തിട്ഠതോ തണ്ഹാ നിരുജ്ഝതി, തണ്ഹാനിരോധാ ഉപാദാനനിരോധോ, ഉപാദാനനിരോധാ ഭവനിരോധോ, ഭവനിരോധാ ജാതിനിരോധോ, ജാതിനിരോധാ ജരാമരണം സോകപരിദേവദുക്ഖദോമനസ്സുപായാസാ നിരുജ്ഝന്തി, ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതി, ഏവം ഖോ, മഹാരാജ, നിരോധോ നിബ്ബാന’’ന്തി.

‘‘കല്ലോസി, ഭന്തേ നാഗസേനാ’’തി.

നിരോധനിബ്ബാനപഞ്ഹോ അട്ഠമോ.