൮. ഫസ്സലക്ഖണപഞ്ഹോ

൮. രാജാ ആഹ ‘‘ഭന്തേ നാഗസേന, യത്ഥ മനോവിഞ്ഞാണം ഉപ്പജ്ജതി, ഫസ്സോപി വേദനാപി തത്ഥ ഉപ്പജ്ജതീ’’തി? ‘‘ആമ, മഹാരാജ, യത്ഥ മനോവിഞ്ഞാണം ഉപ്പജ്ജതി, ഫസ്സോപി തത്ഥ ഉപ്പജ്ജതി, വേദനാപി തത്ഥ ഉപ്പജ്ജതി, സഞ്ഞാപി തത്ഥ ഉപ്പജ്ജതി, ചേതനാപി തത്ഥ ഉപ്പജ്ജതി, വിതക്കോപി തത്ഥ ഉപ്പജ്ജതി, വിചാരോപി തത്ഥ ഉപ്പജ്ജതി, സബ്ബേപി ഫസ്സപ്പമുഖാ ധമ്മാ തത്ഥ ഉപ്പജ്ജന്തീ’’തി.

‘‘ഭന്തേ നാഗസേന, കിംലക്ഖണോ ഫസ്സോ’’തി? ‘‘ഫുസനലക്ഖണോ, മഹാരാജ, ഫസ്സോ’’തി.

‘‘ഓപമ്മം കരോഹീ’’തി. ‘‘യഥാ, മഹാരാജ, ദ്വേ മേണ്ഡാ യുജ്ഝേയ്യും, തേസു യഥാ ഏകോ മേണ്ഡോ, ഏവം ചക്ഖു ദട്ഠബ്ബം യഥാ ദുതിയോ മേണ്ഡോ, ഏവം രൂപം ദട്ഠബ്ബം. യഥാ തേസം സന്നിപാതോ, ഏവം ഫസ്സോ ദട്ഠബ്ബോ’’തി.

‘‘ഭിയ്യോ ഓപമ്മം കരോഹീ’’തി. ‘‘യഥാ, മഹാരാജ, ദ്വേ പാണീ വജ്ജേയ്യും, തേസു യഥാ ഏകോ പാണി, ഏവം ചക്ഖു ദട്ഠബ്ബം. യഥാ ദുതിയോ പാണി, ഏവം രൂപം ദട്ഠബ്ബം. യഥാ തേസം സന്നിപാതോ, ഏവം ഫസ്സോ ദട്ഠബ്ബോ’’തി.

‘‘ഭിയ്യോ ഓപമ്മം കരോഹീ’’തി. ‘‘യഥാ, മഹാരാജ, ദ്വേ സമ്മാ വജ്ജേയ്യും, തേസു യഥാ ഏകോ സമ്മോ, ഏവം ചക്ഖു ദട്ഠബ്ബം. യഥാ ദുതിയോ സമ്മോ, ഏവം രൂപം ദട്ഠബ്ബം. യഥാ തേസം സന്നിപാതോ, ഏവം ഫസ്സോ ദട്ഠബ്ബോ’’തി.

‘‘കല്ലോസി, ഭന്തേ നാഗസേനാ’’തി.

ഫസ്സലക്ഖണപഞ്ഹോ അട്ഠമോ.