൧൨. വിഞ്ഞാണലക്ഖണപഞ്ഹോ

൧൨. ‘‘ഭന്തേ നാഗസേന, കിംലക്ഖണം വിഞ്ഞാണ’’ന്തി? ‘‘വിജാനനലക്ഖണം, മഹാരാജ, വിഞ്ഞാണ’’ന്തി.

‘‘ഓപമ്മം കരോഹീ’’തി. ‘‘യഥാ, മഹാരാജ, നഗരഗുത്തികോ മജ്ഝേ നഗരസിങ്ഘാടകേ നിസിന്നോ പസ്സേയ്യ പുരത്ഥിമദിസതോ പുരിസം ആഗച്ഛന്തം, പസ്സേയ്യ ദക്ഖിണദിസതോ പുരിസം ആഗച്ഛന്തം, പസ്സേയ്യ പച്ഛിമദിസതോ പുരിസം ആഗച്ഛന്തം, പസ്സേയ്യ ഉത്തരദിസതോ പുരിസം ആഗച്ഛന്തം. ഏവമേവ ഖോ, മഹാരാജ, യഞ്ച പുരിസോ ചക്ഖുനാ രൂപം പസ്സതി, തം വിഞ്ഞാണേന വിജാനാതി. യഞ്ച സോതേന സദ്ദം സുണാതി, തം വിഞ്ഞാണേന വിജാനാതി. യഞ്ച ഘാനേന ഗന്ധം ഘായതി, തം വിഞ്ഞാണേന വിജാനാതി. യഞ്ച ജിവ്ഹായ രസം സായതി, തം വിഞ്ഞാണേന വിജാനാതി. യഞ്ച കായേന ഫോട്ഠബ്ബം ഫുസതി, തം വിഞ്ഞാണേന വിജാനാതി, യഞ്ച മനസാ ധമ്മം വിജാനാതി, തം വിഞ്ഞാണേന വിജാനാതി. ഏവം ഖോ, മഹാരാജ, വിജാനനലക്ഖണം വിഞ്ഞാണ’’ന്തി.

‘‘കല്ലോസി, ഭന്തേ നാഗസേനാ’’തി.

വിഞ്ഞാണലക്ഖണപഞ്ഹോ ദ്വാദസമോ.