൪൨൯. മഹാസുവജാതകം (൩)

൨൦. ദുമോ യദാ ഹോതി ഫലൂപപന്നോ, ഭുഞ്ജന്തി നം വിഹങ്ഗമാ [വിഹഗാ (സീ. പീ.)] സമ്പതന്താ;

ഖീണന്തി ഞത്വാന ദുമം ഫലച്ചയേ [ഞത്വാ ദുമപ്ഫലച്ചയേന (ക.)], ദിസോദിസം യന്തി തതോ വിഹങ്ഗമാ.

൨൧. ചര ചാരികം ലോഹിതതുണ്ഡ മാമരി, കിം ത്വം സുവ സുക്ഖദുമമ്ഹി ഝായസി;

തദിങ്ഘ മം ബ്രൂഹി വസന്തസന്നിഭ, കസ്മാ സുവ സുക്ഖദുമം ന രിഞ്ചസി.

൨൨. യേ വേ സഖീനം സഖാരോ ഭവന്തി, പാണച്ചയേ [പാണം ചജേ (ക.), പാണച്ചയേ മരണകാലേ ച സുഖദുക്ഖേസു ച ന ജഹന്തീതി സമ്ബന്ധോ] ദുക്ഖസുഖേസു ഹംസ;

ഖീണം അഖീണന്തി ന തം ജഹന്തി, സന്തോ സതം ധമ്മമനുസ്സരന്താ.

൨൩. സോഹം സതം അഞ്ഞതരോസ്മി ഹംസ, ഞാതീ ച മേ ഹോതി സഖാ ച രുക്ഖോ;

തം നുസ്സഹേ ജീവികത്ഥോ പഹാതും, ഖീണന്തി ഞത്വാന ന ഹേസ ധമ്മോ [ന സോസ (ക.), ന ഏസ (സ്യാ.)].

൨൪. സാധു സക്ഖി കതം ഹോതി, മേത്തി സംസതി സന്ഥവോ [മിത്തം സങ്ഗതി സന്ധവോ (ക.)];

സചേതം ധമ്മം രോചേസി, പാസംസോസി വിജാനതം.

൨൫. സോ തേ സുവ വരം ദമ്മി, പത്തയാന വിഹങ്ഗമ;

വരം വരസ്സു വക്കങ്ഗ, യം കിഞ്ചി മനസിച്ഛസി.

൨൬. വരഞ്ച മേ ഹംസ ഭവം ദദേയ്യ, അയഞ്ച രുക്ഖോ പുനരായും ലഭേഥ;

സോ സാഖവാ ഫലിമാ സംവിരൂള്ഹോ, മധുത്ഥികോ തിട്ഠതു സോഭമാനോ.

൨൭. തം പസ്സ സമ്മ ഫലിമം ഉളാരം, സഹാവ തേ ഹോതു ഉദുമ്ബരേന;

സോ സാഖവാ ഫലിമാ സംവിരൂള്ഹോ, മധുത്ഥികോ തിട്ഠതു സോഭമാനോ.

൨൮. ഏവം സക്ക സുഖീ ഹോഹി, സഹ സബ്ബേഹി ഞാതിഭി;

യഥാഹമജ്ജ സുഖിതോ, ദിസ്വാന സഫലം ദുമം.

൨൯. സുവസ്സ ച വരം ദത്വാ, കത്വാന സഫലം ദുമം;

പക്കാമി സഹ ഭരിയായ, ദേവാനം നന്ദനം വനന്തി.

മഹാസുവജാതകം തതിയം.