൯. നവകനിപാതോ
൪൨൭. ഗിജ്ഝജാതകം (൧)
൧. പരിസങ്കുപഥോ നാമ, ഗിജ്ഝപന്ഥോ സനന്തനോ;
തത്രാസി മാതാപിതരോ, ഗിജ്ഝോ പോസേസി ജിണ്ണകേ;
തേസം അജഗരമേദം, അച്ചഹാസി ബഹുത്തസോ [പഹുത്തതോ (ക. സീ.), പഹൂതസോ (സ്യാ. പീ.), ബഹുധസോ (ക.)].
൨. പിതാ ച പുത്തം അവച, ജാനം ഉച്ചം പപാതിനം;
സുപത്തം ഥാമസമ്പന്നം [പക്ഖസമ്പന്നം (സീ. സ്യാ. പീ.)], തേജസ്സിം ദൂരഗാമിനം.
൩. പരിപ്ലവന്തം പഥവിം, യദാ താത വിജാനഹി;
സാഗരേന പരിക്ഖിത്തം, ചക്കംവ പരിമണ്ഡലം;
തതോ താത നിവത്തസ്സു, മാസ്സു ഏത്തോ പരം ഗമി.
൪. ഉദപത്തോസി [ഉദ്ധം പത്തോസി (ക. സീ.)] വേഗേന, ബലീ പക്ഖീ ദിജുത്തമോ;
ഓലോകയന്തോ വക്കങ്ഗോ, പബ്ബതാനി വനാനി ച.
൫. അദ്ദസ്സ പഥവിം ഗിജ്ഝോ, യഥാസാസി [യഥാസ്സാസി (സ്യാ. അട്ഠ. പാഠന്തരം)] പിതുസ്സുതം;
സാഗരേന പരിക്ഖിത്തം, ചക്കംവ പരിമണ്ഡലം.
൬. തഞ്ച സോ സമതിക്കമ്മ, പരമേവച്ചവത്തഥ [പരമേവ പവത്തഥ (സീ. സ്യാ.)];
തഞ്ച വാതസിഖാ തിക്ഖാ, അച്ചഹാസി ബലിം ദിജം.
൭. നാസക്ഖാതിഗതോ പോസോ, പുനദേവ നിവത്തിതും;
ദിജോ ബ്യസനമാപാദി, വേരമ്ഭാനം [വേരമ്ബാനം (സീ. പീ.)] വസം ഗതോ.
൮. തസ്സ പുത്താ ച ദാരാ ച, യേ ചഞ്ഞേ അനുജീവിനോ;
സബ്ബേ ബ്യസനമാപാദും, അനോവാദകരേ ദിജേ.
൯. ഏവമ്പി ഇധ വുഡ്ഢാനം, യോ വാക്യം നാവബുജ്ഝതി;
അതിസീമചരോ ദിത്തോ, ഗിജ്ഝോവാതീതസാസനോ;
സ വേ ബ്യസനം പപ്പോതി, അകത്വാ വുഡ്ഢസാസനന്തി.
ഗിജ്ഝജാതകം പഠമം.
൪൨൮. കോസമ്ബിയജാതകം (൨)
൧൦. പുഥുസദ്ദോ സമജനോ, ന ബാലോ കോചി മഞ്ഞഥ;
സങ്ഘസ്മിം ഭിജ്ജമാനസ്മിം, നാഞ്ഞം ഭിയ്യോ അമഞ്ഞരും.
൧൧. പരിമുട്ഠാ പണ്ഡിതാഭാസാ, വാചാഗോചരഭാണിനോ;
യാവിച്ഛന്തി മുഖായാമം, യേന നീതാ ന തം വിദൂ.
൧൨. അക്കോച്ഛി മം അവധി മം, അജിനി മം അഹാസി മേ;
യേ ച തം ഉപനയ്ഹന്തി, വേരം തേസം ന സമ്മതി.
൧൩. അക്കോച്ഛി മം അവധി മം, അജിനി മം അഹാസി മേ;
യേ ച തം നുപനയ്ഹന്തി, വേരം തേസൂപസമ്മതി.
൧൪. ന ഹി വേരേന വേരാനി, സമ്മന്തീധ കുദാചനം;
അവേരേന ച സമ്മന്തി, ഏസ ധമ്മോ സനന്തനോ.
൧൫. പരേ ച ന വിജാനന്തി, മയമേത്ഥ യമാമസേ;
യേ ച തത്ഥ വിജാനന്തി, തതോ സമ്മന്തി മേധഗാ.
൧൬. അട്ഠിച്ഛിന്നാ പാണഹരാ, ഗവസ്സ [ഗവാസ്സ (സീ. സ്യാ. പീ.)] ധനഹാരിനോ;
രട്ഠം വിലുമ്പമാനാനം, തേസമ്പി ഹോതി സങ്ഗതി;
കസ്മാ തുമ്ഹാക നോ സിയാ.
൧൭. സചേ ലഭേഥ നിപകം സഹായം, സദ്ധിംചരം സാധുവിഹാരിധീരം;
അഭിഭുയ്യ സബ്ബാനി പരിസ്സയാനി, ചരേയ്യ തേനത്തമനോ സതീമാ.
൧൮. നോ ചേ ലഭേഥ നിപകം സഹായം, സദ്ധിംചരം സാധുവിഹാരിധീരം;
രാജാവ രട്ഠം വിജിതം പഹായ, ഏകോ ചരേ മാതങ്ഗരഞ്ഞേവ നാഗോ.
൧൯. ഏകസ്സ ചരിതം സേയ്യോ, നത്ഥി ബാലേ സഹായതാ;
ഏകോ ചരേ ന പാപാനി കയിരാ, അപ്പോസ്സുക്കോ മാതങ്ഗരഞ്ഞേവ നാഗോതി.
കോസമ്ബിയജാതകം ദുതിയം.
൪൨൯. മഹാസുവജാതകം (൩)
൨൦. ദുമോ യദാ ഹോതി ഫലൂപപന്നോ, ഭുഞ്ജന്തി നം വിഹങ്ഗമാ [വിഹഗാ (സീ. പീ.)] സമ്പതന്താ;
ഖീണന്തി ഞത്വാന ദുമം ഫലച്ചയേ [ഞത്വാ ദുമപ്ഫലച്ചയേന (ക.)], ദിസോദിസം യന്തി തതോ വിഹങ്ഗമാ.
൨൧. ചര ചാരികം ലോഹിതതുണ്ഡ മാമരി, കിം ത്വം സുവ സുക്ഖദുമമ്ഹി ഝായസി;
തദിങ്ഘ മം ബ്രൂഹി വസന്തസന്നിഭ, കസ്മാ സുവ സുക്ഖദുമം ന രിഞ്ചസി.
൨൨. യേ വേ സഖീനം സഖാരോ ഭവന്തി, പാണച്ചയേ [പാണം ചജേ (ക.), പാണച്ചയേ മരണകാലേ ച സുഖദുക്ഖേസു ച ന ജഹന്തീതി സമ്ബന്ധോ] ദുക്ഖസുഖേസു ഹംസ;
ഖീണം അഖീണന്തി ന തം ജഹന്തി, സന്തോ സതം ധമ്മമനുസ്സരന്താ.
൨൩. സോഹം സതം അഞ്ഞതരോസ്മി ഹംസ, ഞാതീ ച മേ ഹോതി സഖാ ച രുക്ഖോ;
തം നുസ്സഹേ ജീവികത്ഥോ പഹാതും, ഖീണന്തി ഞത്വാന ന ഹേസ ധമ്മോ [ന സോസ (ക.), ന ഏസ (സ്യാ.)].
൨൪. സാധു സക്ഖി കതം ഹോതി, മേത്തി സംസതി സന്ഥവോ [മിത്തം സങ്ഗതി സന്ധവോ (ക.)];
സചേതം ധമ്മം രോചേസി, പാസംസോസി വിജാനതം.
൨൫. സോ തേ സുവ വരം ദമ്മി, പത്തയാന വിഹങ്ഗമ;
വരം വരസ്സു വക്കങ്ഗ, യം കിഞ്ചി മനസിച്ഛസി.
൨൬. വരഞ്ച മേ ഹംസ ഭവം ദദേയ്യ, അയഞ്ച രുക്ഖോ പുനരായും ലഭേഥ;
സോ സാഖവാ ഫലിമാ സംവിരൂള്ഹോ, മധുത്ഥികോ തിട്ഠതു സോഭമാനോ.
൨൭. തം പസ്സ സമ്മ ഫലിമം ഉളാരം, സഹാവ തേ ഹോതു ഉദുമ്ബരേന;
സോ സാഖവാ ഫലിമാ സംവിരൂള്ഹോ, മധുത്ഥികോ തിട്ഠതു സോഭമാനോ.
൨൮. ഏവം സക്ക സുഖീ ഹോഹി, സഹ സബ്ബേഹി ഞാതിഭി;
യഥാഹമജ്ജ സുഖിതോ, ദിസ്വാന സഫലം ദുമം.
൨൯. സുവസ്സ ച വരം ദത്വാ, കത്വാന സഫലം ദുമം;
പക്കാമി സഹ ഭരിയായ, ദേവാനം നന്ദനം വനന്തി.
മഹാസുവജാതകം തതിയം.
൪൩൦. ചൂളസുവജാതകം (൪)
൩൦. സന്തി രുക്ഖാ ഹരിപത്താ [ഹരിതപത്താ (സീ. സ്യാ. പീ.)], ദുമാ നേകഫലാ ബഹൂ;
കസ്മാ നു സുക്ഖേ [സുക്ഖ (ക.)] കോളാപേ, സുവസ്സ നിരതോ മനോ.
൩൧. ഫലസ്സ ഉപഭുഞ്ജിമ്ഹാ, നേകവസ്സഗണേ ബഹൂ;
അഫലമ്പി വിദിത്വാന, സാവ മേത്തി യഥാ പുരേ.
൩൨. സുഖഞ്ച രുക്ഖം കോളാപം, ഓപത്തമഫലം ദുമം;
ഓഹായ സകുണാ യന്തി, കിം ദോസം പസ്സസേ ദിജ.
൩൩. യേ ഫലത്ഥാ സമ്ഭജന്തി, അഫലോതി ജഹന്തി നം;
അത്തത്ഥപഞ്ഞാ ദുമ്മേധാ, തേ ഹോന്തി പക്ഖപാതിനോ.
൩൪. സാധു സക്ഖി കതം ഹോതി, മേത്തി സംസതി സന്ഥവോ;
സചേതം ധമ്മം രോചേസി, പാസംസോസി വിജാനതം.
൩൫. സോ തേ സുവ വരം ദമ്മി, പത്തയാന വിഹങ്ഗമ;
വരം വരസ്സു വക്കങ്ഗ, യം കിഞ്ചി മനസിച്ഛസി.
൩൬. അപി നാമ നം പസ്സേയ്യം [അപി നാമ നം പുന പസ്സേ (സീ. സ്യാ.)], സപത്തം സഫലം ദുമം;
ദലിദ്ദോവ നിധി ലദ്ധാ, നന്ദേയ്യാഹം പുനപ്പുനം.
൩൭. തതോ അമതമാദായ, അഭിസിഞ്ചി മഹീരുഹം;
തസ്സ സാഖാ വിരൂഹിംസു [വിരൂള്ഹസ്സ (ക.)], സീതച്ഛായാ മനോരമാ.
൩൮. ഏവം സക്ക സുഖീ ഹോഹി, സഹ സബ്ബേഹി ഞാതിഭി;
യഥാഹമജ്ജ സുഖിതോ, ദിസ്വാന സഫലം ദുമം.
൩൯. സുവസ്സ ച വരം ദത്വാ, കത്വാന സഫലം ദുമം;
പക്കാമി സഹ ഭരിയായ, ദേവാനം നന്ദനം വനന്തി.
ചൂളസുവജാതകം ചതുത്ഥം.
൪൩൧. ഹരിതചജാതകം (൫)
൪൦. സുതം മേതം മഹാബ്രഹ്മേ, കാമേ ഭുഞ്ജതി ഹാരിതോ;
കച്ചേതം വചനം തുച്ഛം, കച്ചി സുദ്ധോ ഇരിയ്യസി.
൪൧. ഏവമേതം മഹാരാജ, യഥാ തേ വചനം സുതം;
കുമ്മഗ്ഗം പടിപന്നോസ്മി, മോഹനേയ്യേസു മുച്ഛിതോ.
൪൨. അദു [ആദു (സീ. പീ.)] പഞ്ഞാ കിമത്ഥിയാ, നിപുണാ സാധുചിന്തിനീ [ചിന്തനീ (സീ. പീ.)];
യായ ഉപ്പതിതം രാഗം, കിം മനോ ന വിനോദയേ.
൪൩. ചത്താരോമേ മഹാരാജ, ലോകേ അതിബലാ ഭുസാ;
രാഗോ ദോസോ മദോ മോഹോ, യത്ഥ പഞ്ഞാ ന ഗാധതി.
൪൪. അരഹാ സീലസമ്പന്നോ, സുദ്ധോ ചരതി ഹാരിതോ;
മേധാവീ പണ്ഡിതോ ചേവ, ഇതി നോ സമ്മതോ ഭവം.
൪൫. മേധാവീനമ്പി ഹിംസന്തി, ഇസിം ധമ്മഗുണേ രതം;
വിതക്കാ പാപകാ രാജ, സുഭാ രാഗൂപസംഹിതാ.
൪൬. ഉപ്പന്നായം സരീരജോ, രാഗോ വണ്ണവിദൂസനോ തവ;
തം പജഹ ഭദ്ദമത്ഥു തേ, ബഹുന്നാസി മേധാവിസമ്മതോ.
൪൭. തേ അന്ധകാരകേ [കരണേ (സീ. സ്യാ. പീ.)] കാമേ, ബഹുദുക്ഖേ മഹാവിസേ;
തേസം മൂലം ഗവേസിസ്സം, ഛേച്ഛം രാഗം സബന്ധനം.
൪൮. ഇദം വത്വാന ഹാരിതോ, ഇസി സച്ചപരക്കമോ;
കാമരാഗം വിരാജേത്വാ, ബ്രഹ്മലോകൂപഗോ അഹൂതി.
ഹരിതചജാതകം [ഹാരിതജാതകം (സീ. പീ.)] പഞ്ചമം.
൪൩൨. പദകുസലമാണവജാതകം (൬)
൪൯. ബഹുസ്സുതം ചിത്തകഥിം [ചിത്തകഥം (സ്യാ. ക.)], ഗങ്ഗാ വഹതി പാടലിം [പാടലം (സീ. പീ.)];
വുയ്ഹമാനക ഭദ്ദന്തേ, ഏകം മേ ദേഹി ഗാഥകം [ഗീതകം (ക. അട്ഠ.)].
൫൦. യേന സിഞ്ചന്തി ദുക്ഖിതം, യേന സിഞ്ചന്തി ആതുരം;
തസ്സ മജ്ഝേ മരിസ്സാമി, ജാതം സരണതോ ഭയം.
൫൧. യത്ഥ ബീജാനി രൂഹന്തി, സത്താ യത്ഥ പതിട്ഠിതാ;
സാ മേ സീസം നിപീളേതി, ജാതം സരണതോ ഭയം.
൫൨. യേന ഭത്താനി പച്ചന്തി, സീതം യേന വിഹഞ്ഞതി;
സോ മം ഡഹതി [ദയ്ഹതി (ക.)] ഗത്താനി, ജാതം സരണതോ ഭയം.
൫൩. യേന ഭുത്തേന [ഭത്തേന (സ്യാ. ക.)] യാപേന്തി, പുഥൂ ബ്രാഹ്മണഖത്തിയാ;
സോ മം ഭുത്തോ ബ്യാപാദേതി, ജാതം സരണതോ ഭയം.
൫൪. ഗിമ്ഹാനം പച്ഛിമേ മാസേ, വാതമിച്ഛന്തി പണ്ഡിതാ;
സോ മം [സോ മേ (സീ. പീ.)] ഭഞ്ജതി ഗത്താനി, ജാതം സരണതോ ഭയം.
൫൫. യം നിസ്സിതാ ജഗതിരുഹം, സ്വായം അഗ്ഗിം പമുഞ്ചതി;
ദിസാ ഭജഥ വക്കങ്ഗാ, ജാതം സരണതോ ഭയം.
൫൬. യമാനയിം സോമനസ്സം, മാലിനിം ചന്ദനുസ്സദം;
സാ മം ഘരാ നിച്ഛുഭതി [നീഹരതി (സീ. സ്യാ.)], ജാതം സരണതോ ഭയം.
൫൭. യേന ജാതേന നന്ദിസ്സം, യസ്സ ച ഭവമിച്ഛിസം;
സോ മം ഘരാ നിച്ഛുഭതി [നീഹരതി (സീ. സ്യാ.)], ജാതം സരണതോ ഭയം.
൫൮. സുണന്തു മേ ജാനപദാ, നേഗമാ ച സമാഗതാ;
യതോദകം തദാദിത്തം, യതോ ഖേമം തതോ ഭയം.
൫൯. രാജാ വിലുമ്പതേ രട്ഠം, ബ്രാഹ്മണോ ച പുരോഹിതോ;
അത്തഗുത്താ വിഹരഥ, ജാതം സരണതോ ഭയന്തി.
പദകുസലമാണവജാതകം ഛട്ഠം.
൪൩൩. ലോമസകസ്സപജാതകം (൭)
൬൦. അസ്സ ഇന്ദസമോ രാജ, അച്ചന്തം അജരാമരോ;
സചേ ത്വം യഞ്ഞം യാജേയ്യ, ഇസിം ലോമസകസ്സപം.
൬൧. സസമുദ്ദപരിയായം, മഹിം സാഗരകുണ്ഡലം;
ന ഇച്ഛേ സഹ നിന്ദായ, ഏവം സേയ്യ [സയ്ഹ (സീ. സ്യാ. പീ.)] വിജാനഹി.
൬൨. ധിരത്ഥു തം യസലാഭം, ധനലാഭഞ്ച ബ്രാഹ്മണ;
യാ വുത്തി വിനിപാതേന, അധമ്മചരണേന വാ.
൬൩. അപി ചേ പത്തമാദായ, അനഗാരോ പരിബ്ബജേ;
സായേവ ജീവികാ സേയ്യോ, യാ ചാധമ്മേന ഏസനാ.
൬൪. അപി ചേ പത്തമാദായ, അനഗാരോ പരിബ്ബജേ;
അഞ്ഞം അഹിംസയം ലോകേ, അപി രജ്ജേന തം വരം.
൬൫. ബലം ചന്ദോ ബലം സുരിയോ, ബലം സമണബ്രാഹ്മണാ;
ബലം വേലാ സമുദ്ദസ്സ, ബലാതിബലമിത്ഥിയോ.
൬൬. യഥാ ഉഗ്ഗതപം സന്തം, ഇസിം ലോമസകസ്സപം;
പിതു അത്ഥാ ചന്ദവതീ, വാജപേയ്യം [വാചപേയ്യം (പീ. ക.)] അയാജയി.