൨. ഗന്ധാരവഗ്ഗോ
൪൦൬. ഗന്ധാരജാതകം (൭-൨-൧)
൭൬. ഹിത്വാ ഗാമസഹസ്സാനി, പരിപുണ്ണാനി സോളസ;
കോട്ഠാഗാരാനി ഫീതാനി, സന്നിധിം ദാനി കുബ്ബസി.
൭൭. ഹിത്വാ ഗന്ധാരവിസയം, പഹൂതധനധാരിയം [ധാനിയം (സീ. പീ.), ധഞ്ഞന്തി അത്ഥോ];
പസാസനതോ [പസാസനിതോ (സീ. സ്യാ.), പസാസനാതോ (പീ.)] നിക്ഖന്തോ, ഇധ ദാനി പസാസസി.
൭൮. ധമ്മം ഭണാമി വേദേഹ, അധമ്മോ മേ ന രുച്ചതി;
ധമ്മം മേ ഭണമാനസ്സ, ന പാപമുപലിമ്പതി.
൭൯. യേന കേനചി വണ്ണേന, പരോ ലഭതി രുപ്പനം;
മഹത്ഥിയമ്പി ചേ വാചം, ന തം ഭാസേയ്യ പണ്ഡിതോ.
൮൦. കാമം രുപ്പതു വാ മാ വാ, ഭുസംവ വികിരീയതു;
ധമ്മം മേ ഭണമാനസ്സ, ന പാപമുപലിമ്പതി.
൮൧. നോ ചേ അസ്സ സകാ ബുദ്ധി, വിനയോ വാ സുസിക്ഖിതോ;
വനേ അന്ധമഹിംസോവ [അന്ധമഹിസോവ (സീ. പീ.)] ചരേയ്യ ബഹുകോ ജനോ.
൮൨. യസ്മാ ച പനിധേകച്ചേ, ആചേരമ്ഹി [ആചാരമ്ഹി (സീ. പീ.)] സുസിക്ഖിതാ;
തസ്മാ വിനീതവിനയാ, ചരന്തി സുസമാഹിതാതി.
ഗന്ധാരജാതകം പഠമം.
൪൦൭. മഹാകപിജാതകം (൭-൨-൨)
൮൩. അത്താനം സങ്കമം കത്വാ, യോ സോത്ഥിം സമതാരയി;
കിം ത്വം തേസം കിമേ [കിമോ (സീ. പീ.), കിം മേ (സ്യാ.)] തുയ്ഹം, ഹോന്തി ഏതേ [ഹേതേ (സ്യാ.), സോ തേ (ക.)] മഹാകപി.
൮൪. രാജാഹം ഇസ്സരോ തേസം, യൂഥസ്സ പരിഹാരകോ;
തേസം സോകപരേതാനം, ഭീതാനം തേ അരിന്ദമ.
൮൫. ഉല്ലങ്ഘയിത്വാ [സ ലങ്ഘയിത്വാ (പീ.), സുലങ്ഘയിത്വാ (ക.)] അത്താനം, വിസ്സട്ഠധനുനോ സതം;
തതോ അപരപാദേസു, ദള്ഹം ബന്ധം ലതാഗുണം.
൮൬. ഛിന്നബ്ഭമിവ വാതേന, നുണ്ണോ [നുന്നോ (സീ.)] രുക്ഖം ഉപാഗമിം;
സോഹം അപ്പഭവം തത്ഥ, സാഖം ഹത്ഥേഹി അഗ്ഗഹിം.
൮൭. തം മം വിയായതം സന്തം, സാഖായ ച ലതായ ച;
സമനുക്കമന്താ പാദേഹി, സോത്ഥിം സാഖാമിഗാ ഗതാ.
൮൮. തം മം ന തപതേ ബന്ധോ, മതോ [വധോ (സീ. സ്യാ. പീ.)] മേ ന തപേസ്സതി;
സുഖമാഹരിതം തേസം, യേസം രജ്ജമകാരയിം.
൮൯. ഏസാ തേ ഉപമാ രാജ, തം സുണോഹി അരിന്ദമ [അത്ഥസന്ദസ്സനീ കതാ (പീ.)];
രഞ്ഞാ രട്ഠസ്സ യോഗ്ഗസ്സ, ബലസ്സ നിഗമസ്സ ച;
സബ്ബേസം സുഖമേട്ഠബ്ബം, ഖത്തിയേന പജാനതാതി.
മഹാകപിജാതകം ദുതിയം.
൪൦൮. കുമ്ഭകാരജാതകം (൭-൨-൩)
൯൦. അമ്ബാഹമദ്ദം വനമന്തരസ്മിം, നീലോഭാസം ഫലിതം [ഫലിനം (പീ.)] സംവിരൂള്ഹം;
തമദ്ദസം ഫലഹേതു വിഭഗ്ഗം, തം ദിസ്വാ ഭിക്ഖാചരിയം ചരാമി.
൯൧. സേലം സുമട്ഠം നരവീരനിട്ഠിതം [നരവിദ്ദുനിട്ഠിതം (ക.)], നാരീ യുഗം ധാരയി അപ്പസദ്ദം;
ദുതിയഞ്ച ആഗമ്മ അഹോസി സദ്ദോ, തം ദിസ്വാ ഭിക്ഖാചരിയം ചരാമി.
൯൨. ദിജാ ദിജം കുണപമാഹരന്തം, ഏകം സമാനം ബഹുകാ സമേച്ച;
ആഹാരഹേതൂ പരിപാതയിംസു, തം ദിസ്വാ ഭിക്ഖാചരിയം ചരാമി.
൯൩. ഉസഭാഹമദ്ദം യൂഥസ്സ മജ്ഝേ, ചലക്കകും വണ്ണബലൂപപന്നം;
തമദ്ദസം കാമഹേതു വിതുന്നം, തം ദിസ്വാ ഭിക്ഖാചരിയം ചരാമി.
൯൪. കരണ്ഡകോ [കരണ്ഡുനാമ (സീ. പീ.)] കലിങ്ഗാനം, ഗന്ധാരാനഞ്ച നഗ്ഗജി;
നിമിരാജാ വിദേഹാനം, പഞ്ചാലാനഞ്ച ദുമ്മുഖോ;
ഏതേ രട്ഠാനി ഹിത്വാന, പബ്ബജിംസു അകിഞ്ചനാ.
൯൫. സബ്ബേപിമേ ദേവസമാ സമാഗതാ, അഗ്ഗീ യഥാ പജ്ജലിതോ തഥേവിമേ;
അഹമ്പി ഏകോ ചരിസ്സാമി ഭഗ്ഗവി, ഹിത്വാന കാമാനി യഥോധികാനി.
൯൬. അയമേവ കാലോ ന ഹി അഞ്ഞോ അത്ഥി, അനുസാസിതാ മേ ന ഭവേയ്യ പച്ഛാ;
അഹമ്പി ഏകാ ചരിസ്സാമി ഭഗ്ഗവ, സകുണീവ മുത്താ പുരിസസ്സ ഹത്ഥാ.
൯൭. ആമം പക്കഞ്ച ജാനന്തി, അഥോ ലോണം അലോണകം;
തമഹം ദിസ്വാന പബ്ബജിം, ചരേവ ത്വം ചരാമഹന്തി.
കുമ്ഭകാരജാതകം തതിയം.
൪൦൯. ദള്ഹധമ്മജാതകം (൭-൨-൪)
൯൮. അഹം ചേ ദള്ഹധമ്മസ്സ [ദള്ഹധമ്മായ (പീ.)], വഹന്തി നാഭിരാധയിം;
ധരന്തീ ഉരസി സല്ലം, യുദ്ധേ വിക്കന്തചാരിനീ.
൯൯. നൂന രാജാ ന ജാനാതി [ന ഹ നൂന രാജാ ജാനാതി (സീ. പീ.)], മമ വിക്കമപോരിസം;
സങ്ഗാമേ സുകതന്താനി, ദൂതവിപ്പഹിതാനി ച.
൧൦൦. സാ നൂനാഹം മരിസ്സാമി, അബന്ധു അപരായിനീ [അപരായിണീ (സീ.), അപരായണീ (?)];
തദാ ഹി [തഥാ ഹി (പീ.)] കുമ്ഭകാരസ്സ, ദിന്നാ ഛകണഹാരികാ.
൧൦൧. യാവതാസീസതീ പോസോ, താവദേവ പവീണതി;
അത്ഥാപായേ ജഹന്തി നം, ഓട്ഠിബ്യാധിംവ ഖത്തിയോ.
൧൦൨. യോ പുബ്ബേ കതകല്യാണോ, കതത്ഥോ നാവബുജ്ഝതി;
അത്ഥാ തസ്സ പലുജ്ജന്തി, യേ ഹോന്തി അഭിപത്ഥിതാ.
൧൦൩. യോ പുബ്ബേ കതകല്യാണോ, കതത്ഥോ മനുബുജ്ഝതി;
അത്ഥാ തസ്സ പവഡ്ഢന്തി, യേ ഹോന്തി അഭിപത്ഥിതാ.
൧൦൪. തം വോ വദാമി ഭദ്ദന്തേ [ഭദ്ദം വോ (സീ. സ്യാ. പീ.)], യാവന്തേത്ഥ സമാഗതാ;
സബ്ബേ കതഞ്ഞുനോ ഹോഥ, ചിരം സഗ്ഗമ്ഹി ഠസ്സഥാതി.
ദള്ഹധമ്മജാതകം ചതുത്ഥം.
൪൧൦. സോമദത്തജാതകം (൭-൨-൫)
൧൦൫. യോ മം പുരേ പച്ചുഡ്ഡേതി [പച്ചുദേതി (സീ. സ്യാ. പീ.), പച്ചുട്ഠേതി (ക.)], അരഞ്ഞേ ദൂരമായതോ;
സോ ന ദിസ്സതി മാതങ്ഗോ, സോമദത്തോ കുഹിം ഗതോ.
൧൦൬. അയം വാ സോ മതോ സേതി, അല്ലസിങ്ഗംവ വച്ഛിതോ [അല്ലപിങ്കവ ഛിജ്ജിതോ (സീ. പീ.), അല്ലപീതംവ വിച്ഛിതോ (സ്യാ.)];
ഭുമ്യാ നിപതിതോ സേതി, അമരാ വത കുഞ്ജരോ.
൧൦൭. അനഗാരിയുപേതസ്സ, വിപ്പമുത്തസ്സ തേ സതോ;
സമണസ്സ ന തം സാധു, യം പേതമനുസോചസി.
൧൦൮. സംവാസേന ഹവേ സക്ക, മനുസ്സസ്സ മിഗസ്സ വാ;
ഹദയേ ജായതേ പേമം, തം ന സക്കാ അസോചിതും.
൧൦൯. മതം മരിസ്സം രോദന്തി, യേ രുദന്തി ലപന്തി ച;
തസ്മാ ത്വം ഇസി മാ രോദി, രോദിതം മോഘമാഹു സന്തോ.
൧൧൦. കന്ദിതേന ഹവേ ബ്രഹ്മേ, മതോ പേതോ സമുട്ഠഹേ;
സബ്ബേ സങ്ഗമ്മ രോദാമ, അഞ്ഞമഞ്ഞസ്സ ഞാതകേ.
൧൧൧. ആദിത്തം വത മം സന്തം, ഘതസിത്തംവ പാവകം;
വാരിനാ വിയ ഓസിഞ്ചം, സബ്ബം നിബ്ബാപയേ ദരം.
൧൧൨. അബ്ബഹീ വത മേ സല്ലം, യമാസി ഹദയസ്സിതം;
യോ മേ സോകപരേതസ്സ, പുത്തസോകം അപാനുദി.
൧൧൩. സോഹം അബ്ബൂള്ഹസല്ലോസ്മി, വീതസോകോ അനാവിലോ;
ന സോചാമി ന രോദാമി, തവ സുത്വാന വാസവാതി.
സോമദത്തജാതകം പഞ്ചമം.
൪൧൧. സുസീമജാതകം (൭-൨-൬)
൧൧൪. കാളാനി കേസാനി പുരേ അഹേസും, ജാതാനി സീസമ്ഹി യഥാപദേസേ;
താനജ്ജ സേതാനി സുസീമ [സുസിമ (ക.)] ദിസ്വാ, ധമ്മം ചര ബ്രഹ്മചരിയസ്സ കാലോ.
൧൧൫. മമേവ ദേവ പലിതം ന തുയ്ഹം, മമേവ സീസം മമ ഉത്തമങ്ഗം;
‘‘അത്ഥം കരിസ്സ’’ന്തി മുസാ അഭാണിം [അഭാസിം (ക.)], ഏകാപരാധം ഖമ രാജസേട്ഠ.
൧൧൬. ദഹരോ തുവം ദസ്സനിയോസി രാജ, പഠമുഗ്ഗതോ ഹോസി [ഹോഹി (സീ.), ഹോതി (ക.)] യഥാ കളീരോ;
രജ്ജഞ്ച കാരേഹി മമഞ്ച പസ്സ, മാ കാലികം അനുധാവീ ജനിന്ദ.
൧൧൭. പസ്സാമി വോഹം ദഹരിം കുമാരിം, സാമട്ഠപസ്സം സുതനും സുമജ്ഝം;
കാളപ്പവാളാവ പവേല്ലമാനാ, പലോഭയന്തീവ [സാ ലോഭയന്തീവ (പീ.)] നരേസു ഗച്ഛതി.
൧൧൮. തമേന പസ്സാമിപരേന നാരിം, ആസീതികം നാവുതികം വ ജച്ചാ;
ദണ്ഡം ഗഹേത്വാന പവേധമാനം, ഗോപാനസീഭോഗ്ഗസമം ചരന്തിം.
൧൧൯. സോഹം തമേവാനുവിചിന്തയന്തോ, ഏകോ സയാമി [പസ്സാമി (ക.)] സയനസ്സ മജ്ഝേ;
‘‘അഹമ്പി ഏവം’’ ഇതി പേക്ഖമാനോ, ന ഗഹേ രമേ [ന ഗേഹേ രമേ (സീ.), ഗേഹേ ന രമേ (സ്യാ. ക.)] ബ്രഹ്മചരിയസ്സ കാലോ.
൧൨൦. രജ്ജുവാലമ്ബനീ ചേസാ, യാ ഗേഹേ വസതോ രതി;
ഏവമ്പി ഛേത്വാന വജന്തി ധീരാ, അനപേക്ഖിനോ കാമസുഖം പഹായാതി.
സുസീമജാതകം ഛട്ഠം.
൪൧൨. കോടസിമ്ബലിജാതകം (൭-൨-൭)
൧൨൧. അഹം ദസസതംബ്യാമം, ഉരഗമാദായ ആഗതോ;
തഞ്ച മഞ്ച മഹാകായം, ധാരയം നപ്പവേധസി [ന പവേധയി (ക.)].
൧൨൨. അഥിമം ഖുദ്ദകം പക്ഖിം, അപ്പമംസതരം മയാ;
ധാരയം ബ്യഥസി [ബ്യാധസേ (സീ.), ബ്യധസേ (പീ.), ബ്യാധസി (ക.)] ഭീതാ [ഭീതോ (സീ. സ്യാ. പീ.)], കമത്ഥം കോടസിമ്ബലി [കോടിസിമ്ബലി (സീ. പീ.)].
൧൨൩. മംസഭക്ഖോ തുവം രാജ, ഫലഭക്ഖോ അയം ദിജോ;
അയം നിഗ്രോധബീജാനി, പിലക്ഖുദുമ്ബരാനി ച;
അസ്സത്ഥാനി ച ഭക്ഖിത്വാ, ഖന്ധേ മേ ഓഹദിസ്സതി.
൧൨൪. തേ രുക്ഖാ സംവിരൂഹന്തി, മമ പസ്സേ നിവാതജാ;
തേ മം പരിയോനന്ധിസ്സന്തി, അരുക്ഖം മം കരിസ്സരേ.
൧൨൫. സന്തി അഞ്ഞേപി രുക്ഖാ സേ, മൂലിനോ ഖന്ധിനോ ദുമാ;
ഇമിനാ സകുണജാതേന, ബീജമാഹരിതാ ഹതാ.
൧൨൬. അജ്ഝാരൂഹാഭിവഡ്ഢന്തി [അജ്ഝാരൂള്ഹാഭിവഡ്ഢന്തി (സീ. പീ.)], ബ്രഹന്തമ്പി വനപ്പതിം;
തസ്മാ രാജ പവേധാമി, സമ്പസ്സംനാഗതം ഭയം.
൧൨൭. സങ്കേയ്യ സങ്കിതബ്ബാനി, രക്ഖേയ്യാനാഗതം ഭയം;
അനാഗതഭയാ ധീരോ, ഉഭോ ലോകേ അവേക്ഖതീതി.
കോടസിമ്ബലിജാതകം സത്തമം.
൪൧൩. ധൂമകാരിജാതകം (൭-൨-൮)
൧൨൮. രാജാ അപുച്ഛി വിധുരം, ധമ്മകാമോ യുധിട്ഠിലോ;
അപി ബ്രാഹ്മണ ജാനാസി, കോ ഏകോ ബഹു സോചതി.
൧൨൯. ബ്രാഹ്മണോ അജയൂഥേന, പഹൂതേധോ [ബഹൂതേജോ (പീ. ക.), ബഹുതേന്ദോ (സ്യാ.)] വനേ വസം;
ധൂമം അകാസി വാസേട്ഠോ, രത്തിന്ദിവമതന്ദിതോ.
൧൩൦. തസ്സ തം ധൂമഗന്ധേന, സരഭാ മകസഡ്ഡിതാ [മകസദ്ദിതാ (സീ. സ്യാ.), മകസട്ടിതാ (പീ. ക.)];
വസ്സാവാസം ഉപാഗച്ഛും, ധൂമകാരിസ്സ സന്തികേ.
൧൩൧. സരഭേസു മനം കത്വാ, അജാ സോ നാവബുജ്ഝഥ;
ആഗച്ഛന്തീ വജന്തീ വാ [ആഗച്ഛന്തി വജന്തി വാ (സ്യാ. പീ.), ആഗച്ഛന്തിം വജന്തിം വാ (ക.)], തസ്സ താ വിനസും [വിനസ്സും (സീ.)] അജാ.
൧൩൨. സരഭാ സരദേ കാലേ, പഹീനമകസേ വനേ;
പാവിസും ഗിരിദുഗ്ഗാനി, നദീനം പഭവാനി ച.
൧൩൩. സരഭേ ച ഗതേ ദിസ്വാ, അജാ ച വിഭവം ഗതാ [അജേ ച വിഭവം ഗതേ (ക.)];
കിസോ ച വിവണ്ണോ ചാസി, പണ്ഡുരോഗീ ച ബ്രാഹ്മണോ.
൧൩൪. ഏവം യോ സം നിരംകത്വാ, ആഗന്തും കുരുതേ പിയം;
സോ ഏകോ ബഹു സോചതി, ധൂമകാരീവ ബ്രാഹ്മണോതി.
ധൂമകാരിജാതകം അട്ഠമം.
൪൧൪. ജാഗരജാതകം (൭-൨-൯)
൧൩൫. കോധ ജാഗരതം സുത്തോ, കോധ സുത്തേസു ജാഗരോ;
കോ മമേതം വിജാനാതി, കോ തം പടിഭണാതി മേ.
൧൩൬. അഹം ജാഗരതം സുത്തോ, അഹം സുത്തേസു ജാഗരോ;
അഹമേതം വിജാനാമി, അഹം പടിഭണാമി തേ.
൧൩൭. കഥം ജാഗരതം സുത്തോ, കഥം സുത്തേസു ജാഗരോ;
കഥം ഏതം വിജാനാസി, കഥം പടിഭണാസി മേ.
൧൩൮. യേ ധമ്മം നപ്പജാനന്തി, സംയമോതി ദമോതി ച;
തേസു സുപ്പമാനേസു, അഹം ജഗ്ഗാമി ദേവതേ.
൧൩൯. യേസം രാഗോ ച ദോസോ ച, അവിജ്ജാ ച വിരാജിതാ;
തേസു ജാഗരമാനേസു, അഹം സുത്തോസ്മി ദേവതേ.
൧൪൦. ഏവം ജാഗരതം സുത്തോ, ഏവം സുത്തേസു ജാഗരോ;